پارلامەنت سەنات كوميتەتىندە ءبىرقاتار زاڭ جوبالارى قارالدى
كەلىسىم ەكى مەملەكەتتىڭ اۋماعىنا كەلۋ، وندا بولۋ نەمەسە تۇرۋ شارتتارىن ورىندامايتىن نەمەسە ورىنداۋدى توقتاتقان ادامداردى انىقتاۋ جانە ولاردىڭ ءقاۋىپسىز ءارى تارتىپكە ساي قايتارۋ، سونداي- اق سول ادامداردىڭ ترانزيتىنە ىقپال ەتۋگە ارنالعان راسىمدەردى بەلگىلەيدى.
كوميتەتتە قازاقستان مەن رەسەي فەدەراتسياسىنىڭ ۇكىمەتتەرى اراسىنداعى رەادميسسيا تۋرالى كەلىسىمدى جانە رەادميسسيا تۋرالى كەلىسىمدى ىسكە اسىرۋ ءتارتىبى تۋرالى اتقارۋ حاتتاماسىن راتيفيكاتسيالاۋ تۋرالى زاڭ جوباسى قارالدى.
قۇجاتتار كەلىسىم جاساعان تاراپتىڭ مەملەكەت اۋماعىنا رۇقساتسىز كەلگەن ادامداردىڭ رەادميسسياسى جونىندەگى قۇقىقتىق جانە ۇيىمداستىرۋ ماسەلەلەرىن رەتتەۋدى كوزدەيدى.
وتىرىستا ازاماتتىق پروتسەستىك كودەكسىنىڭ جوباسى ەكىنشى وقىلىمدا قارالدى.
قۇجات قۇقىقتىق ساياسات تۇجىرىمداماسىن جانە سۋديالاردىڭ Ⅵسەزىندە مەملەكەت باسشىسى قويعان مىندەتتەردى ورىنداۋ ءۇشىن، سوت ءىسىن جۇرگىزۋدى جانە ازاماتتىق پروتسەستىك زاڭنامانى جەتىلدىرۋ ماقساتىندا ازىرلەنگەن بولاتىن.
كودەكس جوباسىن تالقىلاۋ بارىسىندا كوميتەتتەردىڭ ەسكەرتپەلەرى مەن ۇسىنىستارى ەسكەرىلىپ، ءماجىلىس ماقۇلداعان كودەكس جوباسىنا تومەندەگى نەگىزگى باعىتتار بويىنشا وزگەرىستەر مەن تولىقتىرۋلار ەنگىزۋ قاجەتتىگى تۋىندادى.
«مەملەكەت قۇرىلىسىنداعى 100 ناقتى قادام» مەملەكەتتىڭ بەس ينستيتۋتتىق رەفورماسىن ىسكە اسىرۋ جونىندەگى ۇلت جوسپارىن ورىنداۋ جولىندا جوعارعى سوتتا ءىرى ينۆەستورلار قاتىساتىن ينۆەستيتسيالىق داۋلاردى قاراۋ جونىندەگى ارنايى مامانداندىرىلعان سوت القاسىن، جوعارعى سوت جانىنداعى حالىقارالىق كەڭەس قۇرۋدى، ازاماتتىق- قۇقىقتىق داۋلار جونىندەگى سوتتا راسىمدەردى وڭايلاتۋ جانە سوت ۇدەرىستەرىن جەدەلدەتۋ ءۇشىن سوتقا پروكۋرورلاردىڭ قاتىسۋىن قىسقارتۋدى كوزدەيتىن تۇزەتۋ ەنگىزىلەدى.
سونداي- اق سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قارادى.
زاڭ جوباسى كەيبىر زاڭنامالىق اكتىلەردى ازاماتتىق پروتسەستىك كودەكسىنىڭ جوباسىنا سايكەس كەلتىرۋ قاجەتتىگىنە بايلانىستى ازىرلەندى.
زاڭ جوباسىن تالقىلاۋ بارىسىندا كوميتەتتەردىڭ ەسكەرتپەلەرى مەن ۇسىنىستارى ەسكەرىلىپ، ءماجىلىس ماقۇلداعان كودەكس جوباسىنا تومەندەگى نەگىزگى باعىتتار بويىنشا وزگەرىستەر مەن تولىقتىرۋلار ەنگىزۋ قاجەتتىگى تۋىندادى.
ازاماتتىق كودەكستىڭ 22-بابىنىڭ 1-تارماعى كودەكس جوباسىنىڭ 35 -تاراۋىنا سايكەستەندىرىلەدى، ول بويىنشا ون تورتتەن ون سەگىزگە دەيىنگى جاستاعى كامەلەتكە تولماعانداردىڭ ءوز كىرىستەرىن دەربەس پايدالانۋ قۇقىقتارىن شەكتەۋ نەمەسە ايىرۋ تۋرالى وتىنىشتەر جونىندەگى ازاماتتىق ىستەر قامقورلىق جاساۋ جانە كۇتۋ ورگاندارىندا ەمەس، سوتتاردا قارالىپ، شەشىلەدى.
كودەكس جوباسىنا سايكەس كەلتىرۋ ماقساتىندا «سالىق جانە بيۋدجەتكە تولەنەتىن مىندەتتى تولەمدەر تۋرالى» (سالىق كودەكسى) كودەكسكە قايتارىلعان مەملەكەتتىك باجدىڭ سارالانعان كولەمى بەلگىلەندى، سونداي- اق سوت بۇيرىعى كۇشىن توقتاتقان جاعدايدا ءوندىرىپ الۋشى تولەگەن مەملەكەتتىك باج قايتارىلمايتىنى تۋرالى ەرەجە بەلگىلەندى.
«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ ەرەجەلەرى ەرىكسىز تۇردە ەمدەۋگە جىبەرۋ تۋرالى ماتەريالداردى سوتتا قارالۋ مەرزىمىن ناقتىلاۋ، سونداي- اق سۋبەكتىنىڭ جاتىپ ەمدەلۋ مەرزىمىن ۇزارتۋ تۋرالى ءوتىنىش بەرۋ جونىندەگى بولىگى كودەكس جوباسىمەن سايكەستەندىرىلەدى.
«قازاقستان رەسپۋبليكاسىنداعى بانكتەر جانە بانك قىزمەتى تۋرالى» زاڭعا ەلەكتروندى سوت ءوندىرىسىن جۇرگىزۋ بارىسىندا سوتقا قاجەتتى قۇجاتتاردى بەرۋ راسىمدەرىن وڭايلاتۋعا مۇمكىندىك بەرەتىن وزگەرىستەر ەنگىزىلەدى.
سونىمەن قاتار، كودەكس جوباسىمەن جەر كودەكسىنە، اكىمشىلىك قۇقىق بۇزۋشىلىق تۋرالى جانە «قازاقستان رەسپۋبليكاسىنداعى كەدەن ءىسى تۋرالى» كودەكستەرگە، سونداي- اق زاڭ تەحنيكاسىنىڭ تالاپتارىنا سايكەس كەلتىرۋگە باعىتتالعان وزگەرىستەر ەنگىزىلەدى.
زاڭ جوبالارى پالاتانىڭ قاراۋىنا جىبەرىلدى.
اۆتور: سەرىك قاراجان
