پارلامەنت سۋديالاردىڭ ءومىر بويعى تولەمىن قامتاماسىز ەتەتىن زاڭدى قابىلدادى

 پارلامەنت قابىلداعان زاڭ مەملەكەت باسشىسىنىڭ قول قويۋىنا جولدانادى.

كونستيتۋتسيالىق زاڭ سۋديالاردى زەينەتاقىمەن قامسىزداندىرۋ ينستيتۋتىن قايتا ۇيىمداستىرۋ ارقىلى وتستاۆكاداعى سۋديالارعا ءومىر بويى اي سايىنعى قامتىلىم تولەۋدىڭ ەنگىزىلۋىن كوزدەيدى.

«قۇجات بويىنشا كەمىندە ون بەس جىل سۋديالىق جۇمىس ءوتىلى بار جانە زاڭدا بەلگىلەنگەن زەينەتكەرلىك جاسقا تولعان وتستاۆكاداعى سۋديالارعا ءومىر بويى تولەمدى قامتاماسىز ەتۋ كوزدەلەدى. ول تولەم سۋديانىڭ سوڭعى اتقارعان قىزمەتىندە العان جالاقىسىنىڭ ەلۋ پايىزى كولەمىندە بولادى جانە سول سۋديالاردى ارى قاراي ىنتالاندىرۋ ءۇشىن ءار قوسىمشا ىستەگەن قىزمەتتىك جىلى ءۇشىن ءبىر پايىز قوسىلىپ وتىرادى»، - دەدى ق ر جوعارعى سوتىنىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى يلياس يسپانوۆ.

ونىڭ ايتۋىنشا، سۋديانىڭ ءومىر بويعى قامتاماسىز ەتۋ تولەمىنىڭ ەڭ جوعارى مولشەرى باسقا دا قۇقىق قورعاۋ ارنايى ورگانى سەكىلدى 109 ايلىق ەسەپتىك كورسەتكىشتەن اسپايدى.

بۇل ماسەلە رەسپۋبليكالىق بيۋدجەت كوميسسياسىنىڭ وتىرىسىندا قولداۋ تاپقان. بۇل رەتتە رەسپۋبليكالىق بيۋدجەت ەسەبىنەن سۋديالارعا تولەنەتىن قوسىمشا مىندەتتى زەينەتاقى جارنالارى الىپ تاستالادى. كونستيتۋتسيالىق زاڭ 2016 - جىلعى 1 - قاڭتاردان باستاپ قولدانىسقا ەنگىزىلەدى.

«زاڭ كۇشىنە ەنسە، وتاندىق سوت سالاسىن دامۋىنا ىقپال ەتەدى، تۇراقتى جانە بىلىكتى سۋديالاردان تۇراتىن سوت كورپۋسىن قالىپتاستىرۋعا مۇمكىندىك بەرەدى. وسىلايشا، سۋديالاردىڭ ءومىر بويعى تولەمىن قامتاماسىز ەتەتىن زاڭدى قابىلداۋ قازاقستاننىڭ حالىقارالىق رەيتينگىن دە كوتەرەدى، ەڭ باستىسى، سۋديالاردىڭ الەۋمەتتىك جاعدايىن جاقسارتادى»، - دەيدى ي. يسپانوۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى