زاڭسىزدىققا جول بەرگەن شەنەۋنىكتەردى جۇمىسىنان بوساتۋ ۇسىنىلدى
بۇعان ناقتى دالەلدەرى مەن بۇلتارتپاس ايعاقتارى بار. قىزمەتىنەن قۋىلۋى مۇمكىن شەنەۋنىكتەردىڭ ىشىندە وبلىستىق قۇرىلىس باسقارماسىنىڭ جەتەكشىسى دميتري پەتكو مەن ونىڭ قاراماعىنداعى اسىلبەك قۇسايىنوۆ تا بار.
ولار كوكشەتاۋدا حالىققا قىزمەت كورسەتۋ ورتالىعىنىڭ عيماراتىن تۇرعىزۋعا بايقاۋ جاريالاپ، 6 كومپانيانىڭ ىشىنەن «وميس-ستروي» سەرىكتەستىگىن جەڭىمپاز دەپ تانىعان. الايدا بۇل سەرىكتەستىك بۇعان دەيىن دە كوپتەگەن نىساننىڭ قۇرىلىسىنا سالعىرت قاراعان ەكەن.
قۇزىرلى ورگاندار تەكسەرۋ جۇرگىزىپ، جوبالىق قۇنى 860 ميلليون تەڭگە تۇراتىن عيمارات سول كۇيى سالىنباي قالعان.
ال مەملەكەت قارجىسى بيۋدجەتكە كەرى قايتارىلىپتى. بۋراباي اۋداندىق ساۋلەت جانە قالا قۇرىلىسى ءبولىمىنىڭ جەتەكشىسى رايىمبەك ماحاليەۆ بولسا، ءىس جۇزىندە تۇرعىزىلماعان نىسانداردى قابىلداپ العان.
ءبىراق ايىپتالۋشىلاردىڭ ءارقايسىسى تارتىپتىك كەڭەستە ءوز بەتتەرىنشە اقتالىپ باقتى.
قۋانىش جاپاقوۆ، تارتىپتىك كەڭەستىڭ ءتوراعاسى:
- جيىندا بارلىعى 6 ماسەلە قارالدى. ولاردىڭ ىشىندە 11 ءىس مەملەكەتتىك قىزمەتكەرلەرگە قاتىستى. ولار شەشىم قابىلداۋ كەزىندە زاڭسىزدىققا جول بەرگەن. سونداي-اق ستەپنوگور قالالىق اكىمى اپپاراتىنداعى بىرنەشە لاۋازىمدى تۇلعا، وزدەرىنە تارتىپتىك كەڭەستىڭ مىندەتىن الىپ، جەرگىلىكتى اۋىلشارۋاشىلىعى ءبولىمىنىڭ جەتەكشىسىن جاۋاپكەرشىلىكتەن اراشالاپ الىپ قالماقشى بولعان.
www.24.kz
