قازاقستاندا قۇرىلاتىن قۇقىق قورعاۋ ورگاندارى اكادەمياسىنا تۇركيا تاجىريبەسى پايدالانىلادى - فوتو
توپ قۇرامىندا پارلامەنت دەپۋتاتى نۇرلان ءابدىروۆ، پرەزيدەنت اكىمشىلىگىنىڭ ءبولىم مەڭگەرۋشىسىنىڭ ورىنباسارى الەكسەي كالايچيدي، جوعارعى سوتتىڭ، باس پروكۋراتۋرانىڭ جانە ءبىرقاتار وبلىستىق پروكۋراتۋرانىڭ وكىلدەرى بولدى. بۇل تۋرالى ق ر باس پروكۋراتۋراسىنىڭ باسپا ءسوز قىزمەتىنەن حابارلاندى.
دەلەگاتسيانىڭ ساپارىنا تۇركيا رەسپۋبليكاسى ۇكىمەتىنىڭ جانىنداعى تۇركيا ىنتىماقتاستىق جانە ۇيلەستىرۋ جونىندەگى اگەنتتىك (TIKA) پەن قازاقستاننىڭ تۇركيا رەسپۋبليكاسىنداعى ەلشىلىگى قولداۋ كورسەتكەن. قازاقستاندىق دەلەگاتسيا ساپار بارىسىندا اكادەميا باسشىلىعىمەن كەزدەسىپ، وقۋ ورنى قىزمەتىنىڭ نەگىزگى باعىتتارىمەن تانىستى.
تۇركيالىق ارىپتەستەر وقۋ مەكەمەسىنىڭ قۇرىلىمى، مۇنداعى وقۋ ءىسىنىڭ ەرەكشەلىكتەرى تۋرالى جانە تىڭداۋشىلاردىڭ ساناتتارىن ارتتىرۋ، عىلىمي-ادىستەمەلىك جانە ماتەريالدىق-تەحنيكالىق بازاسى جايىندا اڭگىمەلەپ بەردى.
ايتا كەتەرلىگى، ءادىل سوت اكادەمياسى سۋديا نەمەسە پروكۋرور ماماندىعىن تاڭداعان ءاربىر زاڭگەر ءبىلىم الۋعا مىندەتتى، ايرىقشا مارتەبەگە يە ءبىلىم بەرۋ مەكەمەسى بولىپ تابىلادى. مەكەمە الەمنىڭ 80 نەن استام ەلدەرىنىڭ وقۋ ورىندارىمەن جانە قۇقىق قورعاۋ ورگاندارىمەن بەلسەندى ىنتىماقتاستىق ورناتقان. مۇنداعى وقۋ باعدارلاماسى تىڭداۋشىلارعا تەوريالىق ءبىلىمدى پروكۋرورلىق جانە سۋديالىق جۇمىستارمەن ءىس جۇزىندە بايلانىستىرا وتىرىپ سىڭىرەدى. ءدارىس بەرۋ جۇمىستارىن تاجىريبەلى پروكۋرورلار مەن سۋديالار جۇزەگە اسىرادى.
ساپار بارىسىندا قازاقستاننىڭ تۇركيا رەسپۋبليكاسىنداعى ەلشىسى جانسەيىت تۇيمەبايەۆ ءادىل سوت اكادەمياسىنىڭ پرەزيدەنتى يىلماز اكچيل مىرزاعا، ونىڭ ەكى ەلدىڭ وكىلەتتى ورگاندارى اراسىنداعى ءوزارا ىقپالداستىقتى دامىتۋعا قوسقان ايرىقشا ۇلەسىن اتاپ كورسەتە وتىرىپ، «قازاقستان مەن تۇركيا اراسىنداعى دوستىق پەن ىنتىماقتاستىقتى دامىتقانى ءۇشىن» ەستەلىك مەدالىن تاپسىردى.
«ساپار اياسىندا جەكەلەگەن مەملەكەتتىك ورگانداردىڭ ءبىرىنشى باسشىلارىمەن قىزمەتتىك كەزدەسۋلەر ۇيىمداستىرىلدى. اتاپ ايتقاندا پارلامەنتتىڭ باس حاتشىسى يرفان نەزيروگلۋمەن، كونستيتۋتسيالىق سوت ءتوراعاسىنىڭ مىندەتىن اتقارۋشى بۋرحان ۋستۋنمەن، قىلمىستىق جانە ازاماتتىق ىستەر بويىنشا جوعارعى سوت ءتوراعاسى يسمايل رۋشتۋمەن، جوعارعى اسكەري سوت ءتوراعاسى احمەت زيكيليمانمەن، باس پروكۋرور مەحمەت اكاردجامەن، باس اسكەري پروكۋرور الي ۋزۋنمەن جانە ادىلەت مينيسترلىگى مەن جوعارعى سوت وكىلدەرىمەن كەزدەسۋ بارىسىندا قازاقستاندىقتار تۇركيانىڭ زاڭنامالارىمەن جانە قۇقىقتىق جۇيەسىمەن، ورتالىق مەملەكەتتىك ورگانداردىڭ وكىلەتتەرىمەن جەتە تانىستى. كەزدەسۋ بارىسىندا قابىلداۋشى تاراپتىڭ وكىلدەرى قازاقستاننىڭ قارىشتاپ دامىپ كەلە جاتقاندىعىن جوعارى باعالاپ، سونىمەن قاتار ەلباسى نۇرسۇلتان نازاربايەۆتىڭ ەكى باۋىرلاس ەل دوستىعىنىڭ نىعايىپ، ىنتىماقتاستىعىنىڭ ارتۋىنا قوسىپ جاتقان ەلەۋلى ەڭبەگىن اتاپ ءوتتى. تۇركيانىڭ ءادىل سوت اكادەمياسىنىڭ وڭ تاجىريبەسى قازاقستانداعى باس پروكۋراتۋرانىڭ جانىنان قۇرىلىپ جاتقان قۇقىق قورعاۋ ورگاندارى اكادەمياسىنىڭ قىزمەتىندە كەڭىنەن پايدالانىلاتىن بولادى»، دەلىنگەن باسپا ءسوز بايانىندا.
