ەلوردادا ەلباسى ۇزەڭگىلەستەرىنىڭ جاستارمەن كەزدەسۋى ءوتتى
«بۇگىن بىزگە قوناق بولىپ ەلباسىنىڭ تەمىرتاۋدا ەڭبەك جولىن باستاعان كەزدەگى ارىپتەستەرى مەن كۋرستاستارى كەلدى. وسى كەزدەسۋدىڭ ماقساتى - مەملەكەت باسشىسىنىڭ ءومىربايانىن، مەملەكەتتىك- ساياسي قىزمەتىندەگى جولىن، جۇمىسىنىڭ اۋقىمىن، ومىردەگى ۇستانىمدارىن قوعامعا، جاستارعا كەڭىنەن جەتكىزۋ. سوندىقتان ءبىز وسى ماڭىزدى كەزدەسۋدى ۇيىمداستىرىپ وتىرمىز. كەشە دە بەلگىلى قوعامدىق جانە مەملەكەتتىك قايراتكەر ورالباي ابدىكارىموۆپەن جۇزدەسكەن بولاتىنبىز. بۇل كەزدەسۋلەر استانا كۇنىنىڭ قارساڭىندا جاسالعان كەشەندى جوسپارىمىزعا بايلانىستى وتكىزىلۋدە»، - دەدى «قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ كىتاپحاناسى» م م ديرەكتورىنىڭ ورىنباسارى جاپسارباي قۋانىشەۆ.
اتاپ ايتقاندا جاستارمەن جۇزدەسۋگە تەمىرتاۋ قالالىق پارتيا ۇيىمىنىڭ يدەولوگيا جونىندەگى حاتشىسى رەتىندە ەلباسىمەن قاتار قىزمەتتەر اتقارعان نينا ۆاحيتوۆا، تەمىرتاۋداعى زاۋىتتىڭ ج ت و و- ىندا كۋرستاس بولعان، مەتاللۋرگيا فاكۋلتەتىندە بىرگە وقىعان توقتارحان ىسقاقوۆ، ەلباسىمەن تەمىرتاۋداعى زاۋىتتىڭ ج ت و و مەتاللۋرگيا فاكۋلتەتىندە بىرگە وقىعان كۋرستاسى ۆيكتور نيكونوۆ، تۇڭعىش پرەزيدەنتتىڭ قىزمەتتەسى، ءبىر توپتا وقىعان دوسى ەرمەك تولەۋبايەۆ، سونداي-اق ن. ءا. نازاربايەۆپەن قاراعاندى مەملەكەتتىك پوليتەحنيكالىق ينستيتۋتىندا ءبىر توپتا وقىعان قۋانىش وماشەۆ قاتىستى.
ايتا كەتەيىك، بۇگىنگى شارا تەمىرتاۋداعى تۇڭعىش پرەزيدەنتىنىڭ تاريحي-مادەني ورتالىعىنىڭ قاتىسۋىمەن ۇيىمداستىرىلدى. كەزدەسۋ قوناقتارى ەلباسىنىڭ ەرەن ەڭبەگىن اڭگىمە-ەستەلىكتەر ارقىلى جان-جاقتى اشىپ كورسەتتى. سونىمەن قاتار ولار جاستار تاراپىنان قويىلعان سۇراقتارعا جاۋاپ قايتاردى.
اۆتور: رۋسلان عابباسوۆ
