قازاقستان مەن وزبەكستاننىڭ شەكارا قىزمەتتەرى مەملەكەتتىك شەكارادا قازاقستاندىق ازاماتتىڭ ءولتىرىلۋ فاكتىسى بويىنشا تەكسەرىس جۇرگىزۋدە
دەپ حابارلادى ق ر ۇلتتىق قاۋپسىزدىك كوميتەتى شەكارا قىزمەتىنىڭ باسپا ءسوز قىزمەتىنەن.
«28 - ماۋسىمدا ساعات 21.50-دە ق ر ۇلتتىق قاۋپسىزدىك كوميتەتى شەكارا قىزمەتىنە سارى اعاش شەكارا جاساعىنان سىرداريا وزەنىنىڭ جوعارعى جاعىندا اتىس ەستىلگەنى تۋرالى حابار كەلىپ ءتۇستى»، - دەلىنگەن حابارلامادا.
ق ر شەكارا جاساعى وقيعا ورنىنا كەلگەندە سىرداريا وزەنىنىڭ قازاقستاندىق جاعالاۋىندا موتورلى قايىق پەن بالىق اۋلاۋعا قاجەتتى جاراقتاردى جانە ەكى ازاماتتى اڭعاردى. ازاماتتاردىڭ ءبىرى قازا تاپقان.
بۇل اقپارات بارلىق قۇقىق قورعاۋ ورگاندارىنا تاراتىلدى.
سارى اعاش اۋداندىق ىشكى ىستەر ءبولىمى جەدەل توبى مەن شەكارا قىزمەتى بىرلەسىپ موتورلى قايىقتا كىم بولعانىن انىقتادى. ولاردىڭ ەكەۋى دە قازاقستان رەسپۋبليكاسىنىڭ ازاماتتارى: ع. مۇراتبايەۆ ەلدى مەكەنىنىڭ تۇرعىنى 1989 - جىلى تۋعان باقىشيەۆ جەڭىس ساپار ۇلى جانە قازا تاپقان ازامات - 1978 - جىلى تۋعان، قىزىل اسكەر ەلدى مەكەنىنىڭ تۇرعىنى احمەتوۆ ءۋاليحان قادىر ۇلى بولىپ شىقتى.
قازىر قۇقىق قورعاۋ ورگاندارى قازاقستان رەسپۋبليكاسى ازاماتىنىڭ ولىمىنە قاتىستى قىلمىستىق ءىس قوزعادى.
شەكارا قىزمەتى وزبەكستان رەسپۋبليكاسى ۇ ق ق شەكارا قىزمەتىنىڭ وكىلدەرىمەن كەزدەسۋ ۇيىمداستىردى. وزبەكستاندىق تاراپ شەكارا جاساعىنىڭ قارۋ قولدانعانىن راستادى.
وزبەكستان رەسپۋبليكاسى ۇ ق ق شەكارا قىزمەتىنىڭ اقپاراتىنشا، قازاقستاندىق ازاماتتار موتورلى قايىقتا وتىرىپ، وزبەكستان مەملەكەتىنىڭ اۋماعىندا بالىق اۋلاعان. الايدا امان قالعان ج. س. باقىشيەۆ مۇنى مويىنداماي وتىر، ونىڭ ايتۋىنشا، ولار بالىقتى سىرداريا وزەنىنىڭ ورتاسىنان، ياعني مەملەكەتتىك شەكارا اۋماعىندا اۋلاعان.
قازىرگى ۋاقىتتا ق ر ۇ ق ك شەكارا قىزمەتى مەن وزبەكستان رەسپۋبليكاسى ۇ ق ق شەكارا قىزمەتى ەكىجاقتى تەكسەرىس جۇرگىزىپ جاتىر.
