حاكەرلەر قازاق شەنەۋنىكتەرىن شوشىتتى
بۇل جولى حاكەرلەر ينۆەستيتسيالار جانە دامۋ مينيسترلىگىنىڭ سايتىنا بۇزىپ كىرىپ، اعىلشىن تىلىندەگى ۇندەۋىن ءىلىپ كەتكەن.
«بىرنەشە IP مەكەن-جايدان شابۋىل جاسالعان. حاكەرلەردىڭ ءىزى ساۋد ارابياسى، باحرەين جانە الجيردەن شىعىپ وتىر»، - دەيدى KAZNEX INVEST ا ق باسقارۋشى ديرەكتورى الىبەك يسابەكوۆ.
يسلامشىل توپتاردى قولداپ پالەستينانى ازات ەتۋگە شاقىرعان ۇندەۋ بار بولعانى 5 مينۋت قانا تۇردى. جەكسەنبىدەگى شابۋىلدى بايقاعان مينيسترلىك ونى دەرەۋ ءوشىرىپ تاستادى.
حاكەرلەر شابۋىلداعان بولىمدە شەتەلدىك ينۆەستورلار تۋرالى اقپارات وتە كوپ ساقتالعان ەكەن. بۇل وقىس جاعدايدان سوڭ قازىر ۇكىمەتتىك سايتتار قاۋىپسىزدىگىن كۇشەيتۋگە كىرىسكەن.
ال قولدانىستاعى زاڭ بويىنشا، حاكەرلىك شابۋىل ءۇشىن 10 جىلعا دەيىن باس بوستاندىعىنان ايىرۋ جازاسى قاراستىرىلعان.
