قىتايداعى تاجىكستان ەلشىسى ر. اليموۆ قازاقستاننىڭ انتيادرولىق باستاماسىنىڭ ماڭىزى تۋرالى باياندادى - فوتو
ق ح ر- داعى تاجىكستاننىڭ توتەنشە جانە وكىلەتتى ەلشىسى راشيد اليموۆ «قازاقستان بۇگىن جانە ەرتەڭ» اتتى دوڭگەلەك ۇستەل بارىسىندا وسىلاي مالىمدەدى.
«2014-جىلعى كوكتەمدە بەس يادرولىق دەرجاۆا - ۇلى بريتانيا، قىتاي، ا ق ش، رەسەي جانە فرانسيا ورتالىق ازياداعى يادرولىق قارۋدان ازات ايماق تۋرالى كەلىسىمنىڭ حاتتاماسىنا قول قويدى. ءسويتىپ، بۇل مەملەكەتتەر كەلىسىمگە مۇشە-مەملەكەتتەرگە قارسى يادرولىق قارۋدى قولدانباۋ جانە قاۋىپ-قاتەر تۋعىزباۋ تۋرالى وزدەرىنە مىندەتتەمە قابىلدادى»، - دەدى ول.
ونىڭ سوزىنە قاراعاندا، ايماقتا 20 جىلدان استام ۋاقىتقا سوزىلعان، ق ر پرەزيدەنتىنىڭ باستاماسىمەن جانە ورتالىق ازيانىڭ بارلىق ەلدەرىنىڭ قولداۋمەن بولعان كەلىسىم مەحانيزمىن جۇزەگە اسىرۋ مارافونى وسىلاي اياقتالدى.
سونداي-اق ول 1990-جىلدىڭ باسىندا قازاقستان اۋماعىندا جەر شارىنىڭ كەز كەلگەن نۇكتەسىنە جەتە الار 1200 وق تۇمسىعى بار 110 بالليستيكالىق زىمىران ورنالاسقاندىعىن ەسكە سالدى.
«ساراپشىلاردىڭ باعالاۋىنشا، مۇندا الەمدەگى ءتورتىنشى يادرولىق قۋات بولعان. قازاقستان بۇدان ءوز ەركىمەن باس تارتتى»، - دەپ قوستى ول.
قازاقستاننىڭ انتيادرولىق باعىتتاعى سىندارلى ءىس-شارالارىن، ق ر پرەزيدەنتىنىڭ باستاماسىمەن ب ۇ ۇ- نىڭ 29- تامىزدى حالىقارالىق يادرولىق سىناقتارعا قارسى كۇرەس كۇنى دەپ بەكىتۋىن، سونداي-اق ن. نازاربايەۆتىڭ ازياداعى ءوزارا ءىس-قيمىل جانە سەنىم شارالارى كەڭەسىن قۇرۋ جونىندەگى يدەياسىنىڭ جۇزەگە اسقاندىعىن تىلگە تيەك ەتتى.
ەسكە سالا كەتسەك، بۇل شارانى قىتايدىڭ شەت ەلدەرمەن حالىقتىق دوستاستىق قاۋىمى مەن ق ح ر- داعى قازاقستان ەلشىلىگى جانە قىتاي جانە ورتالىق ازيا دوستاستىق قاۋىمى ۇيىمداستىردى. باس قوسۋعا 70 تەن استام ادام - ديپلوماتيالىق كورپۋس، عىلىمي ورتا، ب ا ق وكىلدەرى قاتىستى.
