الماتى وبلىسىنىڭ اكىمى اتا-انادان ەرتە ايىرىلعان وقۋشىنىڭ ءوتىنىشىن ورىنداۋعا ۋادە بەردى
قوعامدىق قابىلداۋدا ايماق باسشىسى اتا- انادان جاستاي ايىرىلعان بيىلعى مەكتەپ ءبىتىرۋشى تۇلەكتىڭ ءوتىنىشىن ورىنداۋعا ۋادە بەردى.
«اقسۋ اۋدانى، قاپال اۋىلىنىڭ مەكتەپ ءبىتىرۋشىسى، ۇ ب ت- دان شەكتى مولشەردەن اسىرىپ بالل جيناعان سىمبات تۇرسىنبەك وبلىس اكىمىنىڭ گرانتىمەن ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە وقىعىسى كەلەتىنىن ايتتى. اتا-انادان جاستاي ايىرىلعان سىمباتتىڭ بۇل ءوتىنىشىن مىندەتتى تۇردە ورىندايتىنىن ايتقان وبلىس اكىمى ءبىلىم باسقارماسىنىڭ باسشىسىنا بۇل ءىستى وڭ شەشىپ بەرۋدى تاپسىردى»، دەلىنگەن وبلىس اكىمىنىڭ باسپا ءسوز قىزمەتى تاراتقان اقپاراتتا.
كەزدەسۋدە وبلىس اكىمى ەلباسىنىڭ باستاماسىمەن قولعا الىنعان «نۇرلى جول» باعدارلاماسىنا تالدىقورعان - وسكەمەن، ءۇشارال - دوستىق اۆتوجولدارى ەنگىزىلگەنىن ايتتى. «ءۇشارال - دوستىق جولىنىڭ جوبالىق- سمەتالىق قۇجاتتامالارى جۋىق ارادا قولعا الىنۋى ءتيىس. ال 2016 -جىلدان باستاپ جولدىڭ قۇرىلىسى باستالادى»، دەدى وبلىس باسشىسى.
پرەزيدەنتتىڭ ءتۋريزمدى دامىتۋ تۋرالى تاپسىرماسىنا سايكەس ەڭ الدىمەن الاكول كولىنىڭ جاعالاۋىن كوركەيتۋ، جولىن جوندەۋ، كولىك قاتىناسىن رەتتەۋ بويىنشا اتقارىلىپ جاتقان جۇمىستارعا توقتالىپ ءوتتى.
