قازاق جاۋىنگەرلەرى امەريكالىق گەنەرالداردى ءتانتى ەتتى
الماتى وبلىسىندا وتكەن «دالا قىرانى» اسكەري جاتتىعۋىنا كۋا بولعان امەريكالىق گەنەرالدار وسىنداي باعا بەرىپ وتىر.
ولار ءتىپتى، ساربازدارىمىزدىڭ ءۇش تىلدە ەركىن سايراپ، بۇيرىقتار مەن تاپسىرمالاردى ءدال ورىنداعانىنا قايران قالدى دەپ حابارلايدى ك ت ك ارناسى.
سەناري بويىنشا، نارازىلىق ءبىلدىرىپ اتويلاپ شىققان جۇرتقا ساربازدار الدىمەن «تارقاڭدار» دەدى. ءبىراق بۇعان ەشكىم قۇلاق اسار ەمەس. باس-كوز دەمەي، جاۋنگەرلەردىڭ وزدەرىن توپەلەپ جاتىر. بولماعان سوڭ، ساقاداي ساي تۇرعان ساربازدار دا ارەكەتكە كوشتى.
بۇل الماتى وبلىسىنىڭ ىلە پوليگونىندا ءوتىپ جاتقان «دالا قىرانى-2015» جاتتىعۋىنىڭ ءبىر بولىگى عانا. مۇندا ەلىمىزدەن بولەك ا ق ش، ۇلى بريتانيا، نەپال، اۋعانستان، قىرعىزستاننىڭ اسكەرلەرى جينالعان. بارلىعىنىڭ ماقساتى ءبىر - بوگدە ەل ساربازدارىمەن بىرگە بىتىمگەرلىك وپەراتسيالارىن بىرلەسىپ جۇرگىزۋدى ۇيرەنۋ.
«بيىلعى جىلدىڭ ماڭىزى ءبىزدىڭ اسكەرلەرىمىزگە ەمەس، كوماندالىق-شتابتىق جاتتىعۋلارعا كوڭىل بولۋدەمىز. اسكەري شەشىم قابىلداۋ پروتسەسىن ۇيرەندىك ءبىرىنشى كەزەڭدە. سول كەزەڭدى قازىر پراكتيكالىق رەتىندە وتكىزۋدەمىز»، - دەيدى قازاقستان بىتىمگەرلىك باتالونىنىڭ كومانديرى ايان نۇرقاسوۆ.
ساربازدارىمىز شەتەلدىكتەردەن ۇيرەنگەنىن ءىس جۇزىندە كورسەتپەك بولدى. ونىسى شتابتا اعىلشىن تىلىندە بۇيرىق بەرۋدەن باستالدى. سەناري بويىنشا، «بلاۋدلاند» اسكەري ايماعىنا شابۋىل جاسالعان. وعان تويتارىس بەرۋ ءۇشىن بىرنەشە ەلدىڭ جاۋىنگەرلەرىنەن قۇرالعان اسكەري جاساق جۇمسالماق.
ورتالىق شتابتان بۇيرىق العان جاساق شالت قيمىلداپ، تاپسىرمالارىن ورىنداي باستادى. وسى جاتتىعۋدى باستان-اياق باقىلاعان امەريكالىق گەنەرالدار قازاق ساربازدارىنىڭ قيمىلىنا تاڭداي قاقتى.
«وسىنداي بىرلەسكەن جاتتىعۋلاردى وتكىزىپ كەلە جاتقانىمىزعا بىرنەشە جىل بولدى. «قازبات» جاۋىنگەرلەرى بۇل جولى دا دايىندىعىنىڭ جوعارى دەڭگەيدە ەكەنىن كورسەتتى. ولار ب ۇ ۇ اياسىنداعى بىتىمگەرلىك شارالارىنىڭ نەگىزگى ماقساتىن جاقسى تۇسىنەدى جانە تاپسىرمالاردى ءدال ءارى تياناقتى تۇردە ورىندايدى»، - دەيدى ا ق ش قۇرلىق اسكەرى ورتالىق باسقارما باستىعىنىڭ ورىنباسارى ۋيليام حيكمان.
بۇل جولى جاتتىعۋلارعا قاتىسقان ەلدەردەن بولەك، تۇركيا، موڭعوليا گەنەرالدارى باقىلاۋشى رەتىندە كەلىپتى. دەمەك، الداعى ۋاقىتتا «دالا قىرانىنا» قاتىسۋشى ەلدەر قاتارى ارتا ءتۇسۋى مۇمكىن.
