قازاقستاننىڭ دۇنيەجۇزىلىك ساۋدا ۇيىمىنا كىرۋى ەڭ الدىمەن تۇتىنۋشىلارعا ءتيىمدى - دوسىم ساتپايەۆ

«ەلىمىزدىڭ دۇنيەجۇزىلىك ساۋدا ۇيىمىنا ەنۋى قاراپايىم تۇتىنۋشىلار ءۇشىن وتە ءتيىمدى. تاۋارلاردىڭ باعاسى تۇسەدى. نارىقتا ساپالى تاۋارلار پايدا بولادى، ولاردىڭ اسسورتيمەنتى كەڭەيەدى. قاراپايىم قازاقستاندىقتار ءۇشىن ارينە، وتە جاقسى» ، - دەدى د. ساتپايەۆ.

الايدا، ساراپشىنىڭ ايتۋىنشا، د س ۇ- عا مۇشە بولۋ ءوندىرىس سالاسى جاقسى جولعا قويىلعان ءارى باسەكەگە قابىلەتتى ەلدەرگە عانا پايداسىن تيگىزەدى.

ساياسات تانۋشى وتاندىق وندىرۋشىلەر ساپاسى جوعارى، باعاسى ارزان تاۋار وندىرە الماسا، د س ۇ تالاپتارىنا ساي جاسالعان ونىمدەرمەن باسەكەگە تۇسە الماي قالۋى عاجاپ ەمەس ەكەندىگىن دە ايتتى.

ەسكە سالا كەتەيىك، كەشە قازاقستاننىڭ د س ۇ- عا كىرۋى بويىنشا جۇمىس توبىنىڭ مۇشە- ەلدەرى فينالدىق وتىرىستا ۇيىمعا كىرۋ جونىندەگى تۇپكىلىكتى قۇجاتتاردى ماقۇلدادى. بارلىق قاجەتتى راسىمدەردى ورىنداعاننان كەيىن اعىمداعى جىلدىڭ جەلتوقسان ايىندا قازاقستان الەمدىك ساۋدانىڭ 98 پايىزىن رەتتەپ وتىرعان حالىقارالىق ۇيىمنىڭ تولىققاندى مۇشەسى بولماق.

جۇمىس توبىنىڭ وتىرىسى بارىسىندا قازاقستاننىڭ ءىرى ينۆەستورلارى جانە نەگىزگى ساۋدا ارىپتەستەرى بولىپ وتىرعان امەريكا قۇراما شتاتتارى، ەۋروپالىق وداق، رەسەي فەدەراتسياسى، قىتاي حالىق رەسپۋبليكاسى، ءۇندىستان، جاپونيا، كورەيا رەسپۋبليكاسى سياقتى د س ۇ- نىڭ باستى مۇشەلەرى ءوز زاڭنامالارىن د س ۇ نورمالارىمەن سايكەس كەلتىرۋ ماقساتىندا قازاقستان جۇرگىزگەن ەلەۋلى رەفورمالاردى وڭ باعالادى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى