كوسەمدەردىڭ قۇپيا كەڭەسشىلەرى

ماسەلەن، كەشەگى كەلمەسكە كەتكەن ك س ر و- نىڭ مۇددەسىنە ونداعان جىلدار بويى اق جانە قارا ماگياشىلار، تەلەپاتتار، گيپنوزشىلار قىزمەت ەتىپ كەلگەن ەكەن.

الدىمەن ارعى تاريحتى ءسوز ەتسەك، ەرتەدەگى حاندار مەن امىرشىلەردىڭ جاندارىنا اقىلگوي كەڭەسشىلەرمەن قاتار كورىپكەل ديۋانالار، كوزبوياۋشىلار، باقسى-بالگەرلەر ۇستاعانى جايىندا تاريحتا كوپتەگەن دەرەكتەر بار. سونىڭ ءبىرى ابىلاي حاننىڭ جالاڭاياق ازدەر اتتى اۋليەسىنە قاتىستى.

ابىلاي حان قىرعىزعا قارسى سوعىس اشقاندا، جالاڭاياق ازدەر جەردەن ءبىر ۋىس توپىراق الىپ، جاۋعا قارسى شاشىپ جىبەرگەندە، جاۋدىڭ الدىن قالىڭ تۇمان باسىپ، تۇك كورمەي جەڭىلىسكە ۇشىراعانى جايىندا تاريحتا اۋىزشا، جازباشا اڭگىمەلەر ساقتالعان. بۇل وقيعانى اقىن ءشادى جاڭگىر ۇلى دا جىرعا قوسقان.

ايگىلى ش. ءۋاليحانوۆ بىلاي دەيدى: « بۇقار جىراۋ حاننىڭ جانىندا كەڭەسشىسى عانا ەمەس جول اشىپ وتىراتىن باتاگوي اقساقالى بولعان. جورىققا شىعار الدىندا بۇقاردان جولىنىڭ بولار بولماسىن نەمەسە شايقاستىڭ تاعدىرى قالاي اياقتالاتىنىن سۇراپ وتىرعان. قيىن جاعدايدا قالعاندا اسكەرگە قۋات دەم بەرىپ قانا قويماي، جاعدايدىڭ قازاق جاساعى پايداسىنا شەشىلۋىنە ىقپال ەتكەن.

ابىلاي حان جوڭعارلارعا قارسى جورىقتارىنىڭ بىرىندە جاناتاي باتىر مەن قانجىعالى بوگەنباي باتىردى مىڭ ساربازبەن بارلاۋعا جىبەرەدى. بارلاۋعا كەتكەن باتىرلاردىڭ ۇزاق ۋاقىت ورالماۋىن جامان ىرىمعا بالاعان ابىلاي بۇقار جىراۋدان باتىرلارعا نە بولعانىن سۇرايدى؟

سوندا بۇقار جىراۋ باتىرلاردىڭ كوپ ولجامەن ورالاتىندىعىن بولجايدى» دەسە، ءماشھۇر ءجۇسىپ: « ابىلاي حان ءبىر جاققا اتتاناردا بۇقارەكەڭدى الدىرىپ، ايدىڭ، كۇننىڭ ءساتىن سۇرايدى ەكەن، ساۋە كورىپ دەيدى ەكەن. سوندا بۇقارەكەڭ: - سارى بۋرا كەلىپ، سەنىڭ تۋىڭنىڭ تۇبىنە تۇرىپ، پالەن جاققا قاراي شابىندى، - دەيدى. سول ايتقان جاعىنا بەت الىپ اتتانسا، شاۋىپ، جانشىپ الىپ كەلەدى ەكەن. ەگەر سارى بۋرا كەلىپ، تۋىنىڭ تۇبىنە شوگىپ، موينىن سالىپ جاتىپ الدى دەسە، اتتانبايدى ەكەن»، - دەيدى.

بۇل ەندى ەستە جوق ەسكى زامان. وزىمىزگە جاقىن ۋاقىتقا ويىسساق، بويىندا ەرەكشە قاسيەتى بار جانداردى ارناۋلى قىزمەت وكىلدەرى ىزدەپ تاۋىپ، مەملەكەتتىڭ قىزىعۋشىلىعىنا قىزمەت ەتۋگە، ونىڭ ىشىندە قيىن سۇراقتاردى شەشۋ ىسىنە تارتىپ كەلە جاتقالى كەمىندە ءبىر عاسىر ۋاقىت وتكەنگە ۇقسايدى.

حرۋشيەۆتىڭ تۇسىندا ەكستراسەنستەر ونىڭ جەكە باسىن قورعاۋ قىزمەتىنە ارنايى كىرىسسە، برەجنيەۆ پەن گورباچيەۆ زامانىندا پاراپسيحولوگتاردى پارتيالىق ەليتانى ەمدەۋ ىسىنە قولدانىپتى. قازىر ءتىپتى الەمدەگى ءىرى كومپانيالاردىڭ ءبارى دە الگىندەي استرالدى قامقورلىق اياسىندا دەسەدى.

1985-جىلى جازدا جاستار مەن ستۋدەنتتەردىڭ حالىقارالىق فەستيۆالى باستالار الدىندا ماسكەۋ مەتروپوليتەنىندەگى «ۆدنح» ستانساسىندا جارىلىس ۇيىمداستىرۋ جوسپارلانعانى جايىندا اقپارات تارايدى. الگى ستانساداعى قۇپيا تەحنيكالىق كابينەتتە مەملەكەتتىك قاۋىپسىزدىك كوميتەتى وكىلدەرى مەن اسكەري بارلاۋ قىزمەتىنىڭ وكىلدەرى باس قوسىپ، ساعات سايىن بىرىككەن جينالىس وتكىزەدى.

ال تۇندە مەترو جۇمىسىن توقتاتقاندا بوس ستانسانىڭ زالىندا ەكى بارلاۋشى، انىعىن ايتقاندا قوس ەكستراسەنس قالىپ جۇمىس ىستەيدى. ولار ءار بۇرىشتى ءتىنتىپ، قولدارىن ەربەڭدەتىپ، الاقاندارىمەن مينا ىزدەيدى. ەرتەڭىنە ولار جينالىستا «بۇل جەر تازا. ەشتەڭە جوق جانە بولمايدى دا. ءبىز كورىپ تۇرعان جوقپىز» دەپ باياندايدى.

بارلاۋ جۇمىسىنا تارتىلعان ەكستراسەنستەر قورىتىندىدا قاتەلەسپەگەن، ماسكەۋ مەتروسىندا باتىستا جوسپارلانعان تەراكت بولعان جوق. ال ولار ونى قالاي جولىن كەستى - بەلگىسىز.

بويىندا ەرەكشە قاسيەتى بار جانداردىڭ باس بارلاۋ باسقارماسىمەن قويان-قولتىق جۇمىس ىستەگەنى نكۆد زامانىنان بەرمەن بەلگىلى.

1923-جىلدان باستاپ سول كەزدەگى بيلىك ن ك ۆ د- نىڭ بارلاۋ مەكتەبىندە ساباق بەرگەن الەكساندر بارچەنكو دەگەن پروفەسسورعا ءىرى كولەمدەگى قاراجات تولەپ تۇرىپتى.

بۇل پروفەسسوردىڭ اسا ماڭىزدى اقپاراتتى قارۋ قولدانباي-اق، ويدىڭ، گيپنوزدىڭ، پسيحولوگيالىق ءىس-ارەكەتتىڭ ناتيجەسىندە قولعا تۇسىرە الاتىن قاسيەتى بولعان. بارچەنكو 1929-جىلدان باستاپ ن ك ۆ د- نىڭ 3-بولىمشەسىن جاساقتاپ، وعان بويىندا ەرەكشە قاسيەتى بار جانداردى توپتاستىرادى. سونىڭ ارقاسىندا كەيىننەن ولار ءتىپتى اتوم قارۋىن جاساۋ تەحنولوگياسىن ۋىستارىنا تۇسىرەدى.

اۆتورى بەلگىلى فيزيولوگ لەونيد ۆاسيليەۆ بولىپ كەلەتىن ارنايى ادىستەمە بويىنشا جاس جىگىتتەردى بايلانىسسىز ۇرىسقا دايىنداپ، قارسىلاستى كورمەي-بىلمەي-اق قالاي قورقىتىپ-ۇركىتۋ ارقىلى باسىمدىققا يە بولۋعا ۇيرەتەدى. وسىلايشا، 1930-جىلدىڭ ورتاسىنا قاراي ك س ر و- نىڭ ن ك ۆ د- ءسى جۇزدەگەن پسيحوفيزيكالىق مۇمكىندىكتەرگە يە بارلاۋشىلارمەن تولىعادى. ولارعا كەز كەلگەن ادامنىڭ سەنىمىنە يە بولىپ، ءوزىنىڭ ەركىنە باعىندىرىپ الۋ ەش قيىندىق تۋدىرمايدى.

جەز مۇرت كوسەم ستاليننىڭ ۇلى وتان سوعىسى كەزىندەگى كەڭەسشىسى ايگىلى ۆولف مەسسينگ بولعان. وزىنەن باسقا ەشكىمگە سەنبەيتىن ساق ستاليننىڭ وعان يلانعان-يلانباعانىن بىلمەيمىز، ءبىراق مەسسينگ 1942-جىلى-اق جوعارعى باس قولباسشىعا بەرليننىڭ قۇلايتىن كۇنىن دالمە-ءدال ايتىپ بەرىپتى.

ستاليننىڭ بالاسى ۆاسيلي 1950-جىلى بۇكىلوداقتىق حوككەي كومانداسىمەن بىرگە سۆەردلوۆسكىگە ۇشپاق بولعاندا، ول مىنگەن ۇشاقتىڭ جارىلاتىنىن ۆولف مەسسينگ كوسەمگە الدىن الا ەسكەرتەدى. شىنىندا دا، ۇشاق قونۋعا بەت العاندا جارىلىپ كەتەدى، ءبارى قازا تابادى. تەك ستاليننىڭ بالاسى امان قالعان.

نيكيتا سەرگەيەۆيچ حرۋشيەۆ جەكە باس كۇزەتىنە ءتورت بىردەي ەكستراسەنستى قىزمەتكە الدى. بەريانىڭ تۇتقىندالۋ تاريحىنان كەيىن حرۋشيەۆ پارتيالاس سەرىكتەرىنەن قاتتى سەسكەنەتىن بولعان، سوندىقتان پاراپسيحولوگتار كوسەمگە وزدەرىنىڭ بولجامدارىن تۇراقتى تۇردە ۇسىنىپ وتىرعان.

حرۋشيەۆتى ورنىنان وڭاي سىرعىتىپ جىبەرگەن لەونيد يليچ برەجنيەۆ ەكستراسەنستەردى ءوزىنىڭ كۇزەتىنە الماعانمەن، ولاردىڭ قىزمەتىنەن باس تارتپاپتى. ك س ر و عىلىم اكادەمياسىنىڭ مۇشە-كوررەسپوندەنتى سپيريدونوۆ باسقاراتىن التى ادامنان تۇراتىن جۇمىس توبىن قۇرىپ، ولاردان ىشكى ساياساتتان باستاپ ءوزىنىڭ جەكە قاۋىپسىزدىگىنە قاتىستى بولجامدارىن اپتا سايىن تالاپ ەتىپ وتىرعان.

وسىعان قاتىستى ءبىر فاكتىنى كەلتىرە كەتەلىك. 1969-جىلى 22- قاڭتاردا گەنسەككە قاستاندىق جاسالاتىنىن قۇپيا ىلىمگە يە ماماندار ءبىر اۋىزدان قايتالايدى. سوندىقتان برەجنيەۆكە عارىشتى باعىندىرعان باتىرلارمەن بىرگە ءبىر كولىكتە جۇرۋگە بولمايتىنى ەسكەرتىلگەن.

گەنسەك ءوزىنىڭ قوزعالىس مارشرۋتىن وزگەرتىپ، بارار جەرىنە قاۋىپسىز جولمەن جەتەدى دە، وق عارىشكەرلەرگە قارسى اتىلادى. بولجام جاساعان توپ مۇشەلەرى مەملەكەتتىك دارەجەدە ماراپاتتالىپ، جايلى پاتەرلەر مەن كولىكتەرگە يە بولادى.

بوريس ەلتسيننىڭ باسقارۋى كەزىندە ونىڭ باس كۇزەتشىسى كورىپكەل يۆان فومينمەن ۇنەمى جەكە بايلانىستا بولعانى، ونىڭ رەسەيلىك تۇڭعىش پرەزيدەنتكە قاتىستى وقيعالاردى دالمە-ءدال بولجاپ وتىرعانى ايتىلادى.

رەسەيدىڭ قازىرگى پرەزيدەنتى پۋتيننىڭ كرەملدە جەكە پاراپسيحولوگتار مەن ەكستراسەنستەر ورتالىعى جۇمىس ىستەيتىن كورىنەدى. ونداعى مامانداردىڭ ءدال نەمەن اينالىساتىنى بىزگە بەلگىسىز. ايتەۋىر ولاردىڭ جۇمىسى ءتۇرلى دەڭگەيدەگى ساياسي سۇراقتاردىڭ جاۋابىن تاۋىپ، باسقا مەملەكەتتەرمەن جوعارى دەڭگەيدەگى بايلانىستاردى ورناتۋعا باعىتتالاتىنى انىق.

اتاقتى تسرۋ قاي ءبىر جىلى شپيوندىق بارلاۋ قىزمەتىنە كورىپكەلدەر مەن ەكستراسەنستەردى پايدالانىپ كەلگەنىن مويىندادى. كەزىندە ا ق ش- تىڭ اسكەري بارلاۋ قىزمەتى كورىپكەلدەردىڭ كومەگىمەن قىتاي مەن سەمەيدەگى يادرولىق جانە ك س ر و- داعى باسقا دا اسكەري قۇپيا وبەكتىلەردىڭ قاي جەردە ورنالاسقانىن ءدال تاۋىپ وتىرىپتى.

تسرۋدىڭ تاپسىرماسىمەن الەمگە ايگىلى ەكستراسەنس ۋري گەللەر ك س ر و- نىڭ سوڭعى پرەزيدەنتى، قاسقا باس ميحايل گورباچيەۆقا دەيىن ويشا سيگنال جىبەرۋ ارقىلى دۋالاعان كورىنەدى.

1997-جىلدان باستاپ قانا تسرۋ قىزمەتتىڭ ونداي تۇرىنە جۇگىنۋىن دوعارعان دەسەدى. بۇل ءبىر جاعىنان شپيون-سپۋتنيكتەر مەن تاراقان مەن شىبىنعا چيپ تۇرىندەگى ميكروقوندىرعى ورناتۋ ءىسىنىڭ كەڭ دامىعاندىعىنا دا بايلانىستى بولسا كەرەك.

سيقىرشىلىق پەن كورىپكەلدىك، ساۋەگەيلىك بۇگىندە ا ق ش پەن انگليا، قىتاي، جاپونيا، فيليپپين ەلدەرىندە «مەتوفيزيكالىق مەديتسينا» رەتىندە قاراستىرىلا باستادى. استرولوگيا استرونوميا سەكىلدى عىلىم بولىپ ەسەپتەلىنۋدە. ارينە، قوعامدا تۋعاننان التىنشى، جەتىنشى كوزى اشىلعان ەرەكشە سەزىمتال ادامدار بار - ولار بەينە ءبىر رەنتگەن-اپپارات سىندى ءبىز كورمەگەندى كورەدى، ءبىز ەستىمەگەندى ەستيدى، ءبىز سەزبەگەندى سەزەدى.

ولار بولاشاققا بال اشۋ، ادامدى سەندىرۋ، قورقىتۋ ارقىلى ونى جاقسىلاپ «پروگراممالايدى». بولماسا ادامعا باقىت، دەنساۋلىق، جاقسىلىق تىلەپ، ادامدى جاقسى ويعا جەتەلەپ، سول ارقىلى تابىسقا جەتۋىنە جول باستايدى. ادامنىڭ ەنەرگەتيكالىق ورتالىعىنا (چاكرا) اسەر ەتۋ ارقىلى ومىرىندەگى، ورگانيزمىندەگى بەلگىلى ءبىر وزگەرىستەرگە جول اشادى.

ءبىز مۇنى جازعاندا، وقىرماندارعا كورىپكەلدەردى، سيقىرشىلاردى ناسيحاتتاعالى وتىرماعانىمىز تۇسىنىكتى. ونسىز دا قاراپايىم جۇرتتى الداپ-ارباپ جۇرگەندەر بۇگىندە اينالامىزدا جىرتىلىپ ايىرىلادى.

عىلىم مۇنى كورىپكەلدەر ادامدى سەندىرۋ ارقىلى باعدارلاما ءتۇزىپ، سول باعدارلامانىڭ ءىس جۇزىندە ورىندالعانى دەپ تۇسىندىرگەن بولادى. قاسيەتتى قۇراننىڭ ايتۋىنشا، كاپىر جىندار كوكتەگى پەرىشتەلەردىڭ اڭگىمەسىنە تىڭشىلىق جاساپ، العان مالىمەتتەرىن ءتاۋىپ، باقسى-بالگەرلەرگە وتىرىك قوسىپ قۇلاقتارىنا سىبىرلايدى.

جىنداردىڭ كورىپكەل، بالشىلارعا جەتكىزگەن كەيبىر حابار-وشارلارى كەي جاعدايدا ءدال كەلىپ تە جاتادى. ءبىراق سولاي ەكەن دەپ، ەكستراسەنسكە بال اشتىرىپ، بولاشاقتى بىلۋگە ارەكەتتەنۋ يسلام ءدىنى بويىنشا ۇلكەن كۇنا بولىپ ەسەپتەلەدى. كاپىر بولاسىز. بال اشتىرعان سايىن ادامنىڭ جولى اشىلۋدىڭ ورنىنا قايتا جابىلا بەرەتىن كورىنەدى. بولاشاعىن بولجاتقان سايىن ەنەرگەتيكالىق الەمىندە جىرتىق تەسىك كوبەيىپ، ودان قارا كۇشتەردىڭ ەنىپ كەتۋ مۇمكىندىگى جوعارىلايدى.

قاراڭعى كۇشتەر بيزنەس، بايلىق پەن اقشا ارقىلى ارەكەت ەتكەندى جاقسى كورەدى. ال ونىڭ تەرىس كۇشىن مەملەكەتتىك دەڭگەيدە شپيوندىق بارلاۋ قىزمەتىنە پايدالانىپ، قارسىلاس ەلدىڭ ءال-اۋقاتىن السىرەتۋ ارەكەتى بۇگىنگى الەمدە استرالدى تۇردە ءجۇرىپ جاتقانىنا سەنۋ-سەنبەۋ ءوز ەركىڭىزدە.

تورەعالي تاشەنوۆ

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى