ايەل ءۇشىن ەڭ جامانى - جالعىزدىق
ابىروي بولعاندا ارتىنشا ولاردىڭ جالعان ەكەنى، الدەكىمدەردىڭ قىساستىقپەن جاريا ەتىپ جىبەرگەنى ءمالىم بولدى. ايتسە دە، سوڭعى جىلدارى ايەلدەردىڭ الكوگولدى ىشىمدىككە قۇمارتىپ بارا جاتقانى توسىن جاڭالىق بولماي قالدى. «اۋرۋىن جاسىرعان ولەدى» دەگەن. وتباسىنىڭ بەرەكەسى بولۋى ءتيىس انالاردىڭ اراققا سالىنىپ كەتۋىنىڭ سەبەبى نەدە؟ - بۇگىنگى تاڭدا ديسپانسەرلىك ەسەپتە 8620 ادام تىركەلگەن بولسا، ونىڭ 1011- ءى ايەلدەر، - دەيدى بۇل جونىندە جامبىل وبلىستىق ناركولوگيالىق ديسپانسەرىنىڭ باس دارىگەرى جاقىپ جەكسەمبيەۆ. - شىنىن ايتۋ كەرەك، كۇندەلىكتى ومىردە ايەلدەردىڭ ماسكۇنەمدىگى جايىندا كوپشىلىك جاقسى بىلە بەرمەيدى. ماسەلەن، اشى سۋمەن دوس بولعان ايەلدەردىڭ سانى ەرلەرگە قاراعاندا، الدەقايدا از دەيدى. ءبىراق بۇل - قاتە. شىندىعىندا، ەرلەردىڭ ىشىمدىككە سالىنۋى بىردەن كوزگە ءتۇسىپ قالادى. ال ايەلدەر بولسا مۇنداي جامان ادەتتەن ۇيالادى، كوپ رەتتە ونداي قىلىقتارىن جاسىرىپ جۇرەدى. اسىرەسە، ەت جاقىندارىنا بىلدىرمەۋگە تىرىسادى. ءبىزدىڭ ديسپانسەردە ەمدەلىپ جۇرگەن ايەلدەردىڭ ءبىرى جۇمىس ساتىسى بويىنشا العا باسۋدىڭ ورنىنا بوس ۋاقىتىن بالا تاربيەلەۋگە ارنايدى. بىلايشا قاراساڭىز، ەشقانداي سوكەتتىك جوق. ايتسە دە، قىرىق جاسقا اياق باسقان كەزدە ەرلى- زايىپتىلار اراسىنداعى اراقاتىناس وزگەرگەن. جۇبايلاردىڭ ورتاق اڭگىمەسى ازايىپ، ءبىر- بىرىنە دەگەن قىزىعۋشىلىقتارى جوعالادى. مۇنداي كورىنىستەردىڭ سوڭى كوبىنە شاڭىراقتىڭ شايقالۋىنا اكەلىپ سوعادى. - ءبىزدىڭ تۇسىنىگىمىزدە ايەلدىڭ اراققا سالىنۋىنا نەگىزىنەن تۇرمىستىڭ تومەندىگى، كۇنكورىستىڭ قيىندىعى سەبەپ بولاتىن سياقتى ەدى...
- ارينە، ايەل كۇيزەلىسكە ۇشىراعان كەزدە ءىشىپ كەتۋى مۇمكىن. ءبىراق، قازىر مۇندايلاردىڭ قاتارىندا داۋلەتتى وتباسىلاردىڭ ايەلدەرى دە بار. ولاردا ءبارى بار. كۇيەۋ، بالا، ءۇي، بايلىق. ءبىراق كۇيەۋى تەك ءوز جۇمىسىمەن عانا اينالىسادى، بالالارى مەكتەپتە نەمەسە بالاباقشادا. كوردىڭىز بە، ايەل تاعى دا جالعىز قالدى. وتباسى، جۇمىسى بار، ءبىراق، ومىردەن ءلاززات المايدى. وسىدان كەيىن الدىمەن قىمبات ىشىمدىك ءىشىپ، كەيىننەن ەسىرتكى پايدالانۋعا بەيىمدەلىپ كەتكەن ايەلدەر دە جەتەرلىك. ءتىپتى، ۇيىقتاۋ ءۇشىن نەمەسە اشۋىن باسىپ، ءوزىن تىنىشتاندىرۋ ءۇشىن ءجيى- ءجيى اشى سۋدان ۇرتتاپ، التى اي نەمەسە ءبىر جىلداي ۋاقىت وتكەندە سول «دارىسىنەن» باس تارتا المايتىن جاعدايعا جەتكەندەر دە بار. وكىنىشكە قاراي، ءبىزدىڭ قوعامدا ءالى دە سالاماتتى ءومىر سالتىن ۇستانىپ، باسسەينگە، فيتنەس- ورتالىققا بارۋ دەگەن جۇزەگە اسپاي وتىر.
ورالحان ءداۋىت، «ەگەمەن قازاقستان»
