استانانىڭ ىرگەسىندە سايرامبايدىڭ سانسىز جىلقىسى ءجۇر
دەيدى ەلوردانىڭ ىرگەسىندەگى «شاۋشەن» شارۋا قوجالىعىنىڭ يەسى سايرامباي دونەنبايەۆ «استانا اقشامى» گازەتىنە بەرگەن سۇحباتىندا.
دونەنبايەۆتار اۋلەتىندە اتاسىنان قالعان ەر- توقىم ساقتاۋلى تۇر. اتاسى جىلقىلى باي بولعان ەكەن. ەلدى اشارشىلىق جايلاعان كەزدە بار مالىن حالىققا ازىق ەتىپ، تاراتىپ بەرىپتى. ال استىنداعى جالعىز اتىن سويىپ بەرگەن سوڭ ءوزى دە دۇنيەدەن وتكەن ەكەن. اۋلەتكە قونعان ىرىس دونەنبايدىڭ ون ءۇش بالاسىنان امان قالعان جالعىز تۇياق، «شاۋشەن» اتانعان ءالىقۇلعا جەتىپتى. ءالىقۇلدان جەتى بالا تاراپ، ولار اتا- ءداستۇرىن جالعاستىرىپ، بۇگىندە وسىنشاما بايلىققا كەنەلىپ وتىر.
«شاۋشەن» دەپ اتالاتىن ءالىقۇل ۇلدارىنىڭ جەكە شارۋاشىلىعى اياعىنان تىك تۇرىپ، ارتىق ءوسىم بولعاندا ەڭ الدىمەن 1932-1933 - جىلدارداعى اشارشىلىق قۇرباندارى جانە 1941-1945 - جىلدارداعى ۇلى وتان سوعىسى جاۋىنگەرلەرىنە ارنالعان ەسكەرتكىش اشادى.
يسلامدا «مال- مۇلىكتەرىڭدى زەكەتپەن قورعاڭدار» دەيدى. قىرىق ءۇي تۇرعىزىپ جۇمىسشىلارىنا بەرگەن، اۋىل ورتالىعىنان بالالار جاتىپ وقيتىن ينتەرنات اشىپ، اعاش وتىرعىزىپ، ساياباق سالدىرعان سايرامباي ەكەن. مەشىت سالدىرىپ، يمامنىڭ جالاقىسىن دا ايىرىپ وتىرۋ زەكەت ەسەبىنەن بەرىلەدى. ودان بولەك مۇقتاج جاندارعا كورسەتكەن قىرۋار كومەگىن ءسوز ەتىپ وتىرعان جوقپىز.
مال باعۋدىڭ بەينەتىن ءبىر ادامداي بىلەتىن سايرامباي ءالىقۇل ۇلى جىلقىنى اسىلداندىرۋدى دا جولعا قويعان. «ورلوۆ» پەن «دون» جىلقىسىن بۋدانداستىرىپ، ەت باعىتىنداعى ىستىق- سۋىققا ءتوزىمدى، تەز قوڭ بايلايتىن جىلقى تۇلىگىن ءوسىرىپ شىعاردى. قوي مالىن اسىلداندىرۋ جۇمىسى دا جۇرگىزىلۋدە.
«ارينە، مەملەكەت تاراپىنان قولداۋ كورسەتىلەدى. وتكىزىلگەن ەتتىڭ ءار كيلوگرامىنا 100 تەڭگە دەمەۋ قارجى (دوتاتسيا) الامىز. جىلقى ۇيىرلەرىن ءالى دە كوبەيتۋگە بولار ەدى، ءبىراق دايىن ءونىمدى الىپ تۇراتىن كەپىلدى مۇمكىندىك قاراستىرىلماعان. ءوز ونىمدەرىمىزدى ءوزىمىز بازارعا اپارىپ ساتىپ جاتقان جايىمىز بار. بۇل دا جاقسى. الايدا، بازاردىڭ نارقىنا، حالىقتىڭ سۇرانىسىنا قاراپ قانا جوسپارلاي الامىز.
مال باسىن كوبەيتۋگە وسى دا كەدەرگى كەلتىرىپ تۇر. تەندەرگە قاتىسىڭدار دەپ جاتادى، سوعان قولىمىز ءبىر جەتپەي قويدى. ەسىگىنىڭ الدىندا «تىشقاق لاعى جوق» ادامداردىڭ تەندەر ۇتىپ الىپ، شارۋاسىن «دوڭگەلەتىپ» جۇرگەنىن ەستىپ، تاڭ قالامىن. ودان بولەك، كورىپ وتىرسىزدار، شارۋاشىلىعىمىز قالادان اسا قاشىق بولماعان سوڭ، جەلى باسىنان جاڭا ساۋىلعان بيەنىڭ ءسۇتىن ىشۋگە كەلۋشىلەر كوپ. كوزىن تاپقانعا مالدىڭ بەرەكەسى جەتىپ ارتىلادى»، - دەيدى سايرامباي دونەنبايەۆ.
