ديپلومات رەتىندە قازاقستان حالقىن تەرەڭىرەك ءبىلۋ ءۇشىن قازاق ءتىلىن جەتىك ءبىلۋىم كەرەك - ا ق ش ەلشىسى
بۇگىن اقوردادا ق ر مەملەكەتتىك حاتشىسى گۇلشارا ابدىقالىقوۆامەن كەزدەسۋى الدىندا ب ا ق وكىلدەرىنە سۇحبات بەرگەن قازاقستانداعى ا ق ش- تىڭ جاڭادان تاعايىندالعان توتەنشە جانە وكىلەتتى ەلشىسى دجوردج البەرت كرول وسىلاي دەدى.
«قازاق ءتىلىن ۇيرەنۋگە تىرىسىپ ءجۇرمىن. قازاق ءتىلى قۇلاققا وتە جاعىمدى، اۋەزدى ەستىلەدى، وزىندىك نازىكتىگى بار. مەن ديپلومات رەتىندە قازاقستان حالقىن تەرەڭىرەك ءبىلۋ ءۇشىن قازاق ءتىلىن جەتىك ءبىلۋىم كەرەك. ويتكەنى، ءتىل - حالىقتىڭ جان- دۇنيەسى. دەگەنمەن، قازاقستان كوپ ۇلتتى مەملەكەت بولعاندىقتان ورىس، اعىلشىن تىلىندە دە ەركىن تىلدەسە بەرۋگە بولادى. ءبىراق، قازاق ءتىلىن ءبىلۋ، ءتۇسىنۋ ديپلومات ءۇشىن بارىنشا ماڭىزدى»، - دەدى ول.
ەلشى ءوز سوزىندە قازاق تىلىندە قاتە سويلەيتىندىگىنە ۇيالاتىندىعىن ايتىپ، ول كەمشىلىگىن تۇزەتۋگە تىرىسىپ جۇرگەندىگىن اتاپ ءوتتى.
«سىزدەرگە جانە وتباسىلارىڭىزعا زور دەنساۋلىق، مول باقىت، ۇزاق ءومىر، ەڭبەكتە تابىس تىلەيمىن»، - دەدى ب ا ق وكىلدەرىنە دجوردج البەرت كرول قازاق تىلىندە.
اۆتور: مارلان جيەمباي
