قازاقستاندىق بايكەرلەر كاسكادەرلىك ونەردى كاسىپكە اينالدىرعان - فوتو
قازاقستان بويىنشا بايكەرلىك ونەردى قولعا العان ۆياچەسلاۆ حلوپتسيەۆ باستاعان توپتىڭ ونەرىن NUR. KZ ءتىلشىسى تاماشالاپ قايتتى.
بۇل توپتا نەگىزىنەن كاسكادەرلىكتى مەڭگەرگەن بەس ازامات ەڭبەك ەتەدى. ولار كادىمگى بيشىلەر سياقتى كۇندەلىكتى ەكى رەت دايىندىق جاتتىعۋلارىن جاسايدى. توپپەن ءبىر ۋاقىتتا موتوتسيكىلدىڭ ۇستىنە شىعىپ، الدىڭعى دوڭعالاقتارىن كوتەرۋ سىندى ءتۇرلى تريۋكتاردى بىردەي ۇيلەسىمدى جاساۋعا دايىندالادى.
«ءبىزدى نەگىزىنەن كوپشىلىك ەرىككەندەر، جانكەشتىلەر دەپ ويلايدى. نەگىزىنەن بايكەرلىكتى قاراپايىم سپورت، ونەر دەۋگە بولادى. بۇل قازىر مەنىڭ نەگىزگى جۇمىسىم. وسىنىڭ ارقاسىندا جانىمداعى ءتورت بالاعا اينالىسار كاسىپ تاۋىپ بەردىم. ءارى سول كاسىپتىڭ ارقاسىندا ءتۇرلى قالالار مەن ەلدەردى ارالاپ، اقشا تاۋىپ ءجۇرمىز.
ارينە جاتتىعۋلاردىڭ كەزىندە تۇرعىندار ۇستىمىزدەن شاعىم ءتۇسىرىپ، پوليتسەيلەردى شاقىرىپ جاتادى. ونداي كەزدە ساۋ ەكەنىمىزدى كورسەتىپ ماسەلەنى ۋشىقتىرماي شەشۋگە تىرىسامىز. ەڭ باستىسى جىل ساناپ ءبىزدى بايكەرلەردى تۇسىنەتىندەردىڭ قاتارى كوبەيىپ كەلە جاتىر»، - دەيدى توپ باسشىسى ۆياچەسلاۆ حلوپتسيەۆ.
ال مىنا سۋرەتتەردەگى كوپتەگەن موتوتسيكلدەگى ازاماتتار نەگىزىنەن وسى بايكەرلەردىڭ ونەرىنە قىزىعا قارايتىن اۋەسقويلار. ولار ارينە قالا سىرتىنداعى الاڭداردا تاجىريبە الماسادى.
ۆياچەسلاۆ جاقىندا رەسەيلىك بايكەرلەردىڭ سايىسىنا قاتىسۋدى جوسپارلاپ وتىر. وندا ارينە ەڭ اۋىر، قيىن تريۋكتاردى جاساۋ كەرەك.
ەگەر ول سايىستان ابىرويمەن ورالار بولسا، قاسىنداعى شاكىرتتەرىمەن بىرگە شەتەلدىك بايكەرلەردىڭ اراسىندا ابىرويى كوتەرىلە تۇسەرى انىق. ءارى قارجىلاي سىيلىققا يە بولارىن دا جاسىرمايدى.
Nur.kz
