وزبەك ءانشىسى توسەكتە جاتقان اعىلشىندى انىمەن ەمدەدى - كەسكىن

بۇل تۋرالى Podrobno.uz. سايتى حابارلادى.

«وزبەكستاننىڭ حالىق ءارتىسى مۋنوجات يۋلچييەۆا ورىنداعان «ۋششوك» ءانى ۇزاق ۋاقىتتاردان بەرى توسەككە تاڭىلىپ جاتقان اعىلشىندى جازىپ شىعاردى. مۇنى ءانشىنىڭ ءوزى ايتىپ بەردى»، - دەپ جازادى پورتال ءتىلشىسى.

«انگليادا وتكەن كونسەرتتەردىڭ بىرىندە مەن ءبىرىنشى قاتاردا «ۋششوك» ءانىن بار ىقىلاسىمەن تىڭداپ وتىرعان كىسىگە نازار اۋداردىم. كونسەرتتەن كەيىن ول ماعان كەلدى. سويتسەم، بۇعان دەيىن ۇزاق ۋاقىت توسەكتە تاڭىلىپ جاتقان ەكەن. ءبىر جولى دوستارى وعان مەنىڭ وسى ءانىم جازىلعان ديسكىنى سىيلايدى. قاريانى «ۋششوك» اۋەنىنىڭ تەبىرەنتكەنى سونداي، ول مۇنى كۇن سايىن ساعاتتاپ تىڭدايتىن بولادى. سوسىن ول ءاننىڭ ءسوزىن وزىنە اۋدارىپ بەرۋدى سۇرايدى. كوزىنە جاس الىپ تۇرعان قارت ماعان: «ماعان سەن، قىزىم، ءسىزدىڭ كلاسسيكالىق مۋزىكاڭىز مەنى ەمدەپ شىعاردى. بۇگىن مەن ءبىرىنشى رەت ءوز بەتىممەن كوشەگە شىقتىم»، - دەدى. بۇعان پالەندەي بىردەڭەنى قوسىپ-الۋدىڭ قاجەتى جوق شىعار»، - دەدى مۋنوجات يۋلچييەۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى