كۇدىكتى نە سەبەپتى پوليتسەيدى پىشاقتاپ ولتىرگەنى ءمالىم بولدى - پاۆلودار
كۇدىكتىنىڭ كەسكىن-كەلبەتى تۇرعىنداردىڭ كومەگىمەن انىقتالىپ، پوليتسەيلەر 33 جاستاعى جىگىتتى ءبىر ءتۇن وتپەي قولعا ءتۇسىردى. سويتسە، ۇيىندەگى جانجالدان كەيىن اشۋمەن شىققان ول ساقشىنى تاپانشاسىن تارتىپ الۋ ءۇشىن ءولتىرىپتى.
بۇل تۋرالى ك ت ك حابارلادى.
قاندى وقيعا تۋرا پوليتسيا پۋنكتىندە بولعان. ۇيىنەن ايەلىمەن ۇرىسىپ شىققان 33 جاستاعى پاۆلودارلىق جىگىت تۋرا بولىمشەگە كىرىپ كەلىپ، اعا لەيتەنانتتىڭ موينى مەن كەۋدەسىنە 8 رەت پىشاق سۇعىپتى. ساقشى قورعانىپ تا ۇلگەرمەگەن ەكەن. قانسىراعان پوليتسەيدىڭ دالاعا شىعىپ، اينالاداعىلاردى كومەككە شاقىرۋعا عانا شاماسى كەلگەن.
- ينسپەكتوردىڭ كومەكشىسى 10 مينۋت بۇرىن عانا دۇكەنگە كەلىپ، كەرەگىن الىپ كەتكەن. اياق استى بولىمشە جاقتان «كومەكتەسىڭدەر» دەگەن جانايقايى شىقتى. ءبارىن تاستاپ، سوندا جۇگىردىك. كومەككە كەلگەندەردىڭ اراسىنداعى دارىگەر قىز ساقشىنىڭ جاراسىن تاڭۋ ءۇشىن جەرگە جاتقىزدى. ءبىز جەدەل جاردەم مەن پوليتسيا شاقىردىق، - دەيدى وقيعا كۋاگەرى ءاليا ساميروۆا.
بۇل كەزدە ۋچاسكەلىك ينسپەكتوردىڭ كومەكشىسى جۇمىستا جالعىز بولىپتى. ال، قاسكويدىڭ بولىمشەدەن قاشىپ بارا جاتقانى بەينەباقىلاۋ كامەراسىنا ءتۇسىپ قالعان. ساقشىلار سول تاسپاداعى ادامنىڭ ءتۇرىن تۇرعىنداردىڭ كومەگىمەن انىقتادى. كەيىن بۇكىل پاۆلودارلىق پوليتسەي جۇمىلىپ، ءبىر تاۋلىككە جەتپەي قىلمىسكەردى تۋىستارىنىڭ ۇيىنەن تاپتى.
پاۆلودار وبلىستىق ءى ءى د باستىعى مارات قوجايەۆ: «پاۆلودار قالاسىنىڭ 33 جاستاعى جۇمىسسىز تۇرعىنى ۇستالدى. ايتۋىنشا، ول تاپانشانى تارتىپ الۋ ءۇشىن قىلمىسقا بارىپتى. ءبىراق، ۋچاسكەلىك ينسپەكتوردىڭ قالتاسىندا قارۋ بولماعان. سوندىقتان قورعانا دا المادى، ال قاسىنداعى پوليتسەي تۇرعىنداردىڭ شاقىرۋىمەن كەتكەنى انىقتالدى»، - دەيدى.
قاسكويدى مۇنىڭ الدىندا ۇيىنەن ايەلى قۋىپ جىبەرگەن ەكەن. سوعان اشۋلانعان جىگىت، اتىلىپ ولمەك بولىپ پوليتسيا بولىمىنە كىرگەن دەگەن اقپارات بار.
- ال حاركي ارلي پاۆلودارلىق پوليتسيا پۋكتىندە 6 جىلدان بەرى جۇمىس ىستەپتى. نەبارى 30 جاستاعى ساقشىنىڭ ارتىندا كىشكەنتاي قىزى مەن ايەلى قالدى. مارقۇمنىڭ دەنەسى تۋعان جەرى جامبىل وبلىسىندا جەرلەنەدى. ال، اشۋمەن پوليتسەيدى پىشاقتاپ تاستاعان قاسكوي قازىر ۋاقىتشا ۇستاۋ يزولياتورىنا جابىلدى. ەندى ول ءومىر بويى باس بوستاندىعىنان ايىرىلۋى مۇمكىن.
