استانادا اقىن وڭايگۇل تۇرجاننىڭ جىر كەشى ءوتتى- فوتو

اقىن شىعارماشىلىعىنا وراي ۇيىمداستىرىلعان درامالىق- سازدى جىر كەشى ازاتتىق تاقىرىبىنا ارنالعان.

كەش بارىسىندا ءانشى تامارا اسار، كۇيشى رىمحان ءابىلحان ۇلى، ءانشى مارات سافاروۆ، سونداي- اق ماڭعىستاۋ وبلىستىق فيلارمونياسىنىڭ «اقجارما» فولكلورلىق- ەتنوگرافيالىق ءانسامبلى ءوز ونەرلەرىمەن ءتانتى ەتتى. ونەرپازدار وڭايگۇل تۇرجاننىڭ سوزىنە جازىلعان «نارلى مەكەن»، «قارا جورعا»، «قازاق ەلىم!» اندەرىن ورىندادى.

كەش قوناقتارى رەتىندە بەلگىلى اقىن- جازۋشىلار، ق ر پارلامەنتى سەناتى مەن ءماجىلىسىنىڭ دەپۋتاتتارى، استانا قالاسى اكىمدىگىنىڭ وكىلدەرى، ب ا ق وكىلدەرى جانە باسقا دا جىرسۇيەر قاۋىم كەلدى.

ايتا كەتەيىك، ءوزىنىڭ مازمۇندى جىرلارىمەن رەسپۋبليكامىزعا تانىمال و. تۇرجاننىڭ عىلىم سالاسىندا دا وزىندىك قولتاڭباسى بار. ونىڭ «ماحامبەت ولەڭدەرىنىڭ پوەتيكاسى» اتتى مونوگرافياسى ەكىنشى قايتارا باسىلىپ شىقتى. سونداي- اق ىستامبۇل ۋنيۆەرسيتەتىنىڭ پروفەسسورلارى ايلا جانە ايدەمير وكايمەن بىرىگىپ جوعارى وقۋ ورىندارىنا ارنالعان «جۇرتشىلىقپەن بايلانىس: نەگىزگى ۇعىمدار، ستراتەگياسى مەن تاجىريبەلەرى» اتتى وقۋلىق جازىپ، جارىققا شىعاردى. مۇنىمەن قوسا، ول اۋدارما سالاسىنا دا قوماقتى ۇلەس قوستى. شەتەلدىك كلاسسيك- قالامگەرلەر س. سۆەيگ، ز. فرەيد، ۆ. شوينكا، گ. ۆاسيليەۆ شىعارمالارىن قازاق تىلىنە اۋداردى.

و. تۇرجان ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ دوتسەنتى، فاريزا وڭعارسىنوۆا نەگىزىن قالاعان «تۇمار» جۋرنالىنىڭ باس رەداكتورى، فيلولوگيا عىلىمدارىنىڭ كانديداتى، عالىم- زەرتتەۋشى، اۋدارماشى. ول «سامال» (1987)، «شەرقالا» (1998)، «جىر- دالا» (2001)، «تەڭىزدەر دە شولدەيدى» (2003)، «جىر كىتابى» (2007) اتتى بىرنەشە جىر جيناقتارىنىڭ اۆتورى. قازاقستان جازۋشىلار وداعىنىڭ مۇشەسى، تولەگەن ايبەرگەنوۆ اتىنداعى ادەبي سىيلىقتىڭ لاۋرەاتى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى