دۇنيەجۇزىلىك ساۋدا ۇيىمىنا مۇشە بولۋ قازاقستاندىق ەكونوميكانى جاڭا كوكجيەكتەرگە باستايدى - ن. نازاربايەۆ
«بۇگىن جەنيەۆادا جۇمىس توبىنىڭ فينالدىق وتىرىسى بولدى، وندا قازاقستاننىڭ دۇنيەجۇزىلىك ساۋدا ۇيىمىنا كىرۋى جونىندەگى كەلىسسوزدەردىڭ اياقتالعانى تۋرالى رەسمي حابارلاندى. بۇل وقيعا - ءبىز ءۇشىن تاريحي ءسات. قازاقستان د س ۇ- نىڭ 162- مۇشەسى بولادى. دۇنيەجۇزىلىك ساۋدا ۇيىمىنا مۇشە بولۋ ءبىزدىڭ ەكونوميكامىزدى جاڭا كوكجيەكتەرگە باستايدى. كاسىپورىندارىمىزدىڭ شەتەل نارىقتارىنا شىعۋىن قامتاماسىز ەتەدى. ال تۇتىنۋشىلار ءۇشىن تاۋارلار مەن قىزمەتتەردىڭ كەڭ اۋقىمىنا تاڭداۋ جاساۋعا جول اشادى. بۇگىندە ساۋدا- ساتتىعىمىزدىڭ 90 پروتسەنتى دۇنيەجۇزىلىك ساۋدا ۇيىمىنا مۇشە ەلدەرگە تيەسىلى. قازاقستان شەتەلدىك ينۆەستورلار مەن سەرىكتەستەر ءۇشىن بۇرىنعىدان دا تارتىمدى بولا تۇسەدى. جاڭا وندىرىستەر مەن جۇمىس ورىندارىن اشۋعا مۇمكىندىكتەر تۋادى»، - دەپ اتاپ ءوتتى ن. نازاربايەۆ.
مەملەكەت باسشىسىنىڭ ايتۋىنشا، د س ۇ- عا كىرۋ جونىندەگى كەلىسسوزدەر 19 جىل بويى تاباندى جۇرگىزىلگەن.
«وسى جىلدارى ءبىزدىڭ ۇكىمەت جانە ساراپشىلارىمىز ەلىمىزگە ءتيىمدى شارتتارعا قول جەتكىزۋ ءۇشىن تالماي ەڭبەك ەتتى. بۇل رەتتە ۇلتتىق مۇددەلەرىمىزدى دە قورعاي بىلدىك. ءبىز ەكونوميكامىزدىڭ ەڭ ءتۇيىندى ماسەلەلەرىندە ۇستانىمدارىمىزدى كەلىستىك. سولاردىڭ ءبىرى - اۋىل شارۋاشىلىعىن قولداۋ - ناق وسى تارماق بويىنشا كۇردەلى كەلىسسوزدەر جۇرگىزىلدى، بىزدەردەن سۋبسيديالاردى تومەندەتۋدى تالاپ ەتتى، ءبىراق تا ءبىز ءوز ۇستانىمدارىمىزدى قورعاپ قالدىق. بۇل جانە «قازاقستاندىق ۇلەس» ماسەلەلەرى جانە قارجى قىزمەتى جانە تەلەكوممۋنيكاتسيالار نارىعى. ءبىز دۇنيەجۇزىلىك ساۋدا ۇيىمى مەن ەۋرازيالىق ەكونوميكالىق وداقتىڭ تالاپتارىن ۇشتاستىرا الدىق»، - دەپ اتاپ كورسەتتى ق ر پرەزيدەنتى.
