ن. نازاربايەۆ: دۇنيەجۇزىلىك ساۋدا ۇيىمىنا مۇشە بولۋ - كۇللى قازاقستاننىڭ جەڭىسى، ونىڭ جاھاندىق ەكونوميكانىڭ بولىنبەس بولشەگى رەتىندە مويىندالۋىنىڭ ايعاعى
«د س ۇ- عا مۇشە بولۋ - كۇللى قازاقستاننىڭ جەڭىسى، ونىڭ جاھاندىق ەكونوميكانىڭ بولىنبەس بولشەگى رەتىندە مويىندالۋىنىڭ ايعاعى. ۇيىم مۇشەلىگىنە بەس حالىقتىق رەفورمانى ىسكە اسىرۋعا كىرىسكەن كەزەڭدە قادام باسۋىمىزدىڭ سيمۆولدىق ءمانى بار. د س ۇ جۇمىسىنىڭ ستاندارتتارى - اشىقتىق، تيىمدىلىك، باسەكەگە قابىلەتتىلىك - وسى رەفورمالاردىڭ رۋحىنا ساي كەلەدى»، - دەپ اتاپ كورسەتتى قازاقستان پرەزيدەنتى.
مەملەكەت باسشىسى «د س ۇ- عا كىرگەننەن كەيىن ءبىز وتاندىق كاسىپورىندارىمىزعا جاردەمدەسۋدەن باس تارتپايمىز»، - دەپ اتاپ ءوتتى.
«ەندى مەملەكەت كورسەتەتىن قولداۋ شارالارى حالىقارالىق ەرەجەلەرگە ساي بولۋى ءتيىس. سونىمەن قاتار قازاقستاندىق كاسىپورىندار د س ۇ قاعيدالارى بويىنشا باسەكەگە قابىلەتتىلىككە ۇيرەنۋى قاجەت. ءبىز جاھاندىق نارىق شارتتارىنا ساي بولۋ ءۇشىن ۇلكەن دايىندىقتان وتتىك. وتاندىق وندىرۋشىلەرگە قولداۋ كورسەتىپ، بيزنەس ءۇشىن قولايلى جاعدايلار جاسادىق. ءبىرىڭعاي كەدەندىك جانە ەكونوميكالىق كەڭىستىكتە شىڭدالدىق. الدىمىزدا ءالى دە اۋقىمدى جۇمىستار كۇتىپ تۇر. باسەكە كۇشەيەدى. وعان دايىن بولۋىمىز كەرەك»، - دەدى ق ر پرەزيدەنتى.
«دۇنيەجۇزىلىك ساۋدا ۇيىمىنا مۇشە بولۋ ءبىزدىڭ ەكونوميكامىزدى جاڭا كوكجيەكتەرگە باستايدى. كاسىپورىندارىمىزدىڭ شەتەل نارىقتارىنا شىعۋىن قامتاماسىز ەتەدى. ال تۇتىنۋشىلار ءۇشىن تاۋارلار مەن قىزمەتتەردىڭ كەڭ اۋقىمىنا تاڭداۋ جاساۋعا جول اشادى. دسۇ بەرەتىن ارتىقشىلىقتاردى پايدالانا بىلەتىنىمىزدى دالەلدەۋ قاجەت بولادى. بۇل قازاقستاننىڭ قولىنان كەلەدى جانە ءبىز الەمنىڭ وزىق ەلدەرى قاتارىنان لايىقتى ورىن الامىز دەپ كامىل سەنەمىن»، - دەپ ءتۇيدى ن. نازاربايەۆ.
