ق ر پرەزيدەنتىنىڭ دۇنيەجۇزىلىك ساۋدا ۇيىمىنا كىرۋ جونىندەگى كەلىسسوزدەردىڭ اياقتالۋىنا بايلانىستى قازاقستان حالقىنا ۇندەۋى- كەسكىن
«قازاقپارات» ح ا ءا ق ر پرەزيدەنتى ۇندەۋىنىڭ تولىق ءماتىنىن تاراتادى.
قۇرمەتتى قازاقستاندىقتار!
ەلىمىز اسا ماڭىزدى تاعى ءبىر تاريحي وقيعا قارساڭىندا تۇر. ءبىز دۇنيەجۇزىلىك ساۋدا ۇيىمىنا كىرۋ جونىندەگى كەلىسسوزدەردى تابىستى اياقتادىق.
دۇنيەجۇزىلىك ساۋدا ۇيىمىنا مۇشە بولۋ ءبىزدىڭ ەكونوميكامىزدى جاڭا كوكجيەكتەرگە باستايدى. كاسىپورىندارىمىزدىڭ شەتەل نارىقتارىنا شىعۋىن قامتاماسىز ەتەدى. ال تۇتىنۋشىلار ءۇشىن تاۋارلار مەن قىزمەتتەردىڭ كەڭ اۋقىمىنا تاڭداۋ جاساۋعا جول اشادى.
بۇگىندە ساۋدا- ساتتىعىمىزدىڭ 90 پروتسەنتى دۇنيەجۇزىلىك ساۋدا ۇيىمىنا مۇشە ەلدەرگە تيەسىلى. قازاقستان شەتەلدىك ينۆەستورلار مەن سەرىكتەستەر ءۇشىن بۇرىنعىدان دا تارتىمدى بولا تۇسەدى. جاڭا وندىرىستەر مەن جۇمىس ورىندارىن اشۋعا مۇمكىندىكتەر تۋادى. ءبىز بۇل ناتيجەگە جەتۋ ءۇشىن 19 جىل تاباندى تۇردە جۇمىس جۇرگىزدىك، كەلىسسوزدەر وڭاي بولعان جوق. وسى جىلدارى ءبىزدىڭ ۇكىمەت جانە ساراپشىلارىمىز ەلىمىزگە ءتيىمدى شارتتارعا قول جەتكىزۋ ءۇشىن تالماي ەڭبەك ەتتى. ءبىز دۇنيەجۇزىلىك ساۋدا ۇيىمى مەن ەۋرازيالىق ەكونوميكالىق وداقتىڭ تالاپتارىن ۇشتاستىرا الدىق. بۇل رەتتە ۇلتتىق مۇددەلەرىمىزدى دە قورعاي بىلدىك.
د س ۇ- عا مۇشە بولۋ - كۇللى قازاقستاننىڭ جەڭىسى. بۇل - ەلىمىزدىڭ جاھاندىق ەكونوميكانىڭ بولىنبەس بولشەگى رەتىندە مويىندالۋىنىڭ ايعاعى. ۇيىم مۇشەلىگىنە بەس حالىقتىق رەفورمانى ىسكە اسىرۋعا كىرىسكەن كەزەڭدە قادام باسۋىمىزدىڭ سيمۆولدىق ءمانى بار.
ءبىز جاھاندىق نارىق شارتتارىنا ساي بولۋ ءۇشىن ۇلكەن دايىندىقتان وتتىك. وتاندىق وندىرۋشىلەرگە قولداۋ كورسەتىپ، بيزنەس ءۇشىن قولايلى جاعدايلار جاسادىق. ءبىرىڭعاي كەدەندىك جانە ەكونوميكالىق كەڭىستىكتە شىڭدالدىق. الدىمىزدا ءالى دە اۋقىمدى جۇمىستار كۇتىپ تۇر. باسەكە كۇشەيەدى. وعان دايىن بولۋىمىز كەرەك. سەبەبى، شەتەلدەن كەلەتىن تاۋارلارعا ءبىز شەكارامىزدى اشامىز، تاۋار قازاقستانعا كوپتەپ كەلەتىن بولادى. ساپاسى جوعارى بولسا، باعاسى تومەندەۋ بولسا، ول تاۋارلاردى حالىق تۇتىنىپ، ءبىزدىڭ تاۋار وندىرەتىن كاسىپورىندار جۇمىسىنىڭ توقتاپ قالۋ قاۋپى بار. بارلىق بيزنەسمەندەرگە مەنىڭ تالايدان بەرى ايتىپ كەلە جاتقانىم سوندىقتان: باسەكەگە ساي بولۋ كەرەك.
د س ۇ بەرەتىن ارتىقشىلىقتاردى پايدالانا بىلەتىنىمىزدى دالەلدەۋ قاجەت بولادى. بۇل قازاقستاننىڭ قولىنان كەلەدى جانە ءبىز الەمنىڭ وزىق ەلدەرى قاتارىنان لايىقتى ورىن الامىز دەپ كامىل سەنەمىن.
