قىتايدان تاۋارىن كىرگىزە الماعان ساۋداگەرلەر «قورعاس» بەكەتىن تالقانداي جازدادى
العان زاتتارى بەكەتتە بوگەلىپ قالعان ولار ءتىپتى، كەدەندە تۇنەۋگە ءماجبۇر. سويتسە، ەركىن ەكونوميكالىق ايماق ەرەجەسى بويىنشا قانداستارىمىز جاپپاي كاسىپكەر دەپ تانىلىپ، باس-باسىنا باج سالىعى سالىنىپتى. ياعني العان زاتىڭىزدىڭ ىشىندە، ءتىپتى شۇلىق بولسا دا ەكى دانادان اسسا - ءسىز ساۋداگەرسىز.
سوڭعى تيىنىنا دەيىن تاۋار الىپ قويعان جۇرت ەندى نە ساتىپ العان زاتىنا قولى جەتە الماي، نە ەلگە وتە الماي، ايدالادا قالعان.
قىتايعا قىدىرىپ شىققان تۋريستەر ەكى اپتادان بەرى شەكارادا شۇبىرىپ ءجۇر. ءبىرى تاۋارىن تىزەرلەپ وتىرىپ وتىنسە، ەندى ءبىرىنىڭ جۇلىسامىن دەپ كوزى كوگەرگەن.
اشۋعا بۋلىققان جۇرت تاۋارى جاتقان قويمانى تالقانداۋعا شاق ءجۇر. ال ىشتەن «توقتات» دەگەن ءبىر ءتىرى جان تابىلمادى. قايتا كوزىنشە جۇكتەرىمەن ويناپ، ونسىز دا اشۋلى توپتى ىزالاندىرا ءتۇستى.
«باستىقتار كەلدى. ءبارى قالتالارىنا قولىن سالىپ الادى دا كەتەدى. ءبىزدى ادام قاتارىنا سانامايدى! مىنا جەردە 4 كۇن قونىپ جاتقاندار بار، 5 كۇن قونىپ جاتقاندار بار. وندا نەگە اشادى؟ جاۋىپ تاستاسىن!»، - دەيدى ءداريا ماشانوۆا.
قورعاستاعى قازاق-قىتاي بازارى و باستا ەركىن ەكونوميكالىق ايماق رەتىندە اشىلعان. ەشبىر ۆيزانى قاجەت ەتپەيتىن ەكى ورتاعا تۋريستەر ءتىپتى سوناۋ تارازدان اۆتوبۋس جالداپ كەلگەن. ەندى تاۋارىن الىپ وتە الماي، ءتورت كۇننەن بەرى كولىكتىڭ ىشىندە تۇنەپ ءجۇر.
ارتىمىزدا-قىتاي، ال الدا بولسا، قازاقستان. ەكى ەل اراسىنداعى تاۋار الماسۋ ءتارتىبىن ءدال قازىر كەدەنشىلەر، ءتىپتى شەكاراشىلار دا ەمەس، مىنەكەي مىنا ءتورت بۇرىشتى تەمىر شەشىپ وتىر. تاۋارى سىيعانى وتەدى، ال سىيماعان قانداستارىمىز زاتىن قۇشاقتاپ 7 شاقىرىم جاياۋ جۇرۋگە ءماجبۇر.
تۋريستەردى جىلاتقان ءتارتىپ جاقىندا ەنگىزىلگەن. تەمىرگە سىيماعان تاۋاردى پوشتا ارقىلى شەكارادان وتكىزۋگە مۇمكىندىك بەرىلگەن ەكەن. وندا دا ۇيىڭىزگە ەمەس، شەكارانىڭ كەلەسى بەتىنە دەيىن عانا. ءارى تاسىمالىنا ءبىر جانە ءاربىر كەلىسى ءۇشىن تاعى اقىسى تولەنۋى ءتيىس.
الىنعان زاتتاردىڭ دەكلاراتسياسىن تاپسىرىپ، سالىعىن تولەسە، ەشقانداي كەدەرگى جوق»، - دەيدى «التىنكول» كەدەن بەكەتىنىڭ باستىعى ءمادي بازاروۆ.
تەك تاۋاردىڭ وزىندىك قۇنىنان بىرنەشە ەسە اسىپ تۇسەتىن تولەماقى تۋرالى تۋريستەردىڭ كوبى شەكاراعا كەلگەندە ءبىر-اق ەستىگەن. ەندى كەدەن بەكەتىندە تەنتىرەپ، قىتايدان ەلگە قايتا الماي ءجۇر.
