فرانسيادا ارىق ارۋلارعا ءسان ساحناسىنا شىعۋعا تىيىم سالادى
تالقىلاۋ بارىسىندا جاعانى ۇستاتار دەرەكتەر جاريا ەتىلگەن.
فرانسيادا انورەكسيا دەرتىنە شالدىققاندار سانى 40 مىڭنان اسىپ جىعىلادى ەكەن. سونداي-اق ولاردىڭ %99 ى جەتكىنشەك قىزدار.
بۇدان بىلاي مودەل قىزدار جۇمىسقا قابىلدانباس بۇرىن تارازىعا تۇرۋى ءتيىس. دەنەسىنىڭ سالماق يندەكسى قالىپتى 18 كورسەتكىشىنەن تومەن ارۋلارعا ءسان الەمىمەن قوش ايتىسۋعا تۋرا كەلەدى. ماسەلەن بويى 175 سانتيمەتر قىزداردىڭ سالماعى 55 كەلىدەن تومەن بولماۋى ءتيىس.
«ءبىز بۇل زيانكەستىككە جول بەرمەۋىمىز ءتيىس. وسى رەتتە جۇدەۋ جاندارعا مودەلدىك كاسىپپەن اينالىسۋعا ءۇزىلدى- كەسىلدى تىيىم سالىنادى. ياعني، مەملەكەت جۇمىس بەرۋشىنىڭ تەكسەرۋ تالاپتارىن انىقتاۋدى ءوز قولىنا الۋى ءتيىس. ال ەرەجەگە باعىنباعاندار قاتاڭ جازالاناتىن بولادى»، - دەيدى ۇلتتىق اسسامبلەيا دەپۋتاتى وليۆە ۆەران.
قىزمەتىنە سەلقوس قاراعان جۇمىس بەرۋشىلەر 75 مىڭ ەۋروعا دەيىن ايىپپۇل تولەۋگە مىندەتتەلۋى مۇمكىن. ءتىپتى 6 ايعا دەيىن باس بوستاندىعىنان ايىرۋ جازاسى دا قاراستىرىلعان ەكەن.
