ەلباسى ۇسىنعان رەفورمانى ىسكە اسىرۋدا «بولاشاق» ستيپەندياسىنىڭ ماڭىزى زور - گ. ءابدىقالىقوۆا

بۇل پىكىردى بۇگىن اقوردادا وتكەن شەتەلدە كادرلار دايارلاۋ جونىندەگى رەسپۋبليكالىق كوميسسياسىنىڭ كەزەكتى وتىرىسىندا ق ر مەملەكەتتىك حاتشىسى گۇلشارا ءابدىقالىقوۆا ايتتى.

«ەلباسى ۇسىنعان «100 ناقتى قادام» ۇلت جوسپارى مەن 5 ينستيتۋتتىق رەفورمانى ىسكە اسىرۋدا «بولاشاق» ستيپەندياسىنىڭ ماڭىزى زور.

ويتكەنى العا قويعان مىندەتتەردى ساپالى ورىنداۋدا ءبىرىنشى كەزەكتە الەمنىڭ ۇزدىك جوعارى وقۋ ورىندارىن بىتىرگەن جوعارى بىلىكتى ماماندار قاجەت. وزدەرىڭىز بىلەسىزدەر، 18 -ناۋرىزدا وتكەن كوميسسيا وتىرىسىندا مۇددەلى مەملەكەتتىك ورگاندارعا بىرنەشە تاپسىرما بەردىك. ءبىرىنشى، 2016-2020 -جىلدارعا ارنالعان جاڭا جوسپاردى جاساۋ. ەكىنشى، PhD جوباسىن ىسكە اسىرۋ بويىنشا تۇجىرىمداما جاساۋ. ءۇشىنشى، 2014 -جىلعى تاعلىمداما بويىنشا جانە 2015 -جىلعا ماگيسترانتتار مەن تاجىريبەدەن ءوتۋدى بەلگىلەۋ»، - دەدى وتىرىستى اشقان مەملەكەتتىك حاتشى.

وتىرىس بارىسىندا ءبىلىم جانە عىلىم ءمينيسترى اسلان ءسارىنجىپوۆ «بولاشاق» حالىقارالىق ستيپەندياسىنىڭ 2016-2020 -جىلدارعا ارنالعان دامۋ جوسپارىنىڭ جوباسىن ۇسىندى. كوميسسيا مۇشەلەرى «بولاشاق» باعدارلاماسى بويىنشا Split PhD ىسكە اسىرۋ تۇجىرىمداسىن ماقۇلدادى. تۇجىرىمداما قازاقستاننىڭ يندۋستريالىق- يننوۆاتسيالىق دامۋ مەملەكەتتىك باعدارلاماسى اياسىندا ەلدەگى جوعارى وقۋ ورىندارىندا عىلىمي كادرلار دايارلاۋدىڭ جاڭا جۇيەسىن ەنگىزۋدى كوزدەيدى.

سونىمەن قاتار وتىرىستا الدىن الا كونكۋرستىق ىرىكتەۋدەن وتكەن ۇمىتكەرلەرگە «بولاشاق» حالىقارالىق ستيپەندياسىن تاعايىنداۋ ماسەلەسى قارالدى.

 قورىتىندىسىندا ق ر مەملەكەتتىك حاتشىسى گ. ءابدىقالىقوۆا شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ جۇمىسىن ودان ءارى ۇيىمداستىرۋ اياسىندا ءبىرقاتار تاپسىرما بەردى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى