كينوتەاترلار نەگە قازاق تىلىنە قاتىستى زاڭ تالابىن ورىندامايدى؟
ا ق ش-تىڭ اتاقتى «The Imitation Game» دەپ اتالاتىن تاريحي دراماسى وتاندىق پروكاتقا شىققالى ەكى اپتانىڭ ءجۇزى بولدى.
ەكىنشى دۇنيەجۇزىلىك سوعىس كەزىندە نەمىستەردىڭ اتىشۋلى شيفرلىق ماشيناسى «ەنيگمانىڭ» تاس- تالقانىن شىعارعان اعىلشىن كريپتوگرافى الان تيۋرينگتىڭ ءومىرىن وزەك ەتكەن ءفيلمدى كورگەننىڭ ءبارى ماقتايدى.
جاڭا كينو شىعىپتى دەگەندى ەستىسەك بولدى، ۋاقىت تاۋىپ، كينوتەاترعا بارۋعا تىرىسامىز. ا ق ش- تىڭ اتاقتى «The Imitation Game» دەپ اتالاتىن تاريحي دراماسى وتاندىق پروكاتقا شىققالى ەكى اپتانىڭ ءجۇزى بولدى.
ەكىنشى دۇنيەجۇزىلىك سوعىس كەزىندە نەمىستەردىڭ اتىشۋلى شيفرلىق ماشيناسى «ەنيگمانىڭ» تاس-تالقانىن شىعارعان اعىلشىن كريپتوگرافى الان تيۋرينگتىڭ ءومىرىن وزەك ەتكەن فيلمدى كورگەننىڭ ءبارى ماقتايدى.
«وسكاردىڭ» سەگىز اتالىمىنا ۇسىنىلعان كينونىڭ وسال بولۋى مۇمكىن ەمەس. «يگرا ۆ يميتاتسيۋ» دەسەك، وقىرمانعا تۇسىنىكتىرەك بولار. ويتكەنى وتاندىق ەكرانداردان كورسەتىلەتىن شەتەلدىك فيلمدەردىڭ بارلىعى دەرلىك پروكاتقا ورىس تىلىندەگى دۋبلياجبەن شىعادى. قازاقشاسىن ىزدەپ الماتىداعى «مەن» دەگەن كينوتەاترلاردىڭ ءبىرازىن شارلادىق، اياعىمىز جەتپەگەنىنە تەلەفون شالدىق. ەلىمىزدەن پايدا تاپقانى بولماسا، كينوتەاترلار قازاقستاننىڭ مەملەكەتتىك ءتىلىن دە، «مادەنيەت تۋرالى» زاڭىن دا مەنسىنبەيتىن بولىپ شىقتى.
الدىمەن «АDK» ويىن- ساۋىق ورتالىعىندا ورنالاسقان «Chaplin» كينوتەاترىنا باردىق. كاسسادا وتىرعان قاراتورى قىزبەن ديالوگىمىز ۇزاققا سوزىلعان جوق:
- «يگرا ۆ يميتاسيۋ» ءفيلمىن قازاقشا دۋبلياجبەن كورگىمىز كەلىپ ەدى...
- كەشىرىڭىز، بىزدە تەك ورىسشا.
- سۋبتيترلىق اۋدارما دا جوق پا؟
- جوق.
- قازاق تىلىندە باسقا نە كورسەك بولادى؟
- وكىنىشكە قاراي، ءقازىر ەشتەڭە جوق.
- نەگە؟
- كەشىرىڭىز، مەن تەك بيلەت ساتۋشىمىن، - دەپ كاسسير قىز ارتىق سۇراققا جاۋاپ بەرگىسى كەلمەيتىنىن اڭعارتتى. كينوتەاتردىڭ اكىمشىسىن شاقىرىپ بەرۋىن سۇرادىق. ءوزىن گيۋزال دەپ تانىستىرعان اكىمشى قىز ساۋالدارىمىزعا بارىنشا سىپايى جاۋاپ بەرۋگە تىرىستى. ءبىراق سۇراقتىڭ بارىنە قاناعاتتانارلىق جاۋاپ الا المادىق. ول قازاقشا دۋبلياجدالعان فيلمنىڭ سوڭعى رەت قاشان كورسەتىلگەنىن ەسىنە تۇسىرە المادى. «پروكاتقا جىبەرىلەتىن فيلمدەر نەگە مەملەكەتتىك تىلگە اۋدارىلمايدى؟» دەگەن ساۋالىمىزعا العاشىندا شامدانىپ قالدى، اڭگىمەنى شورت كەسكىسى دە كەلدى. ساباسىنا ءتۇسىرۋ ءۇشىن زاڭدى العا تارتتىق. ق ر «مادەنيەت تۋرالى» زاڭىنا 2010 -جىلى مامىردا ەنگىزىلگەن وزگەرتۋلەر مەن تولىقتىرۋلار بويىنشا «شەتەل تەلەارنالارىنان رەترانسلياتسيالانعان فيلمدەردى قوسپاعاندا، قازاقستان رەسپۋبليكاسىنىڭ اۋماعىنا پروكاتتاۋ ماقساتىندا اكەلىنەتىن (جەتكىزىلەتىن) بارلىق فيلمدەرگە 2012 -جىلعى 1 -قاڭتاردان باستاپ قازاق تىلىندە دۋبلياج جاسالۋعا ءتيىس».
اكىمشى قىز جۋرناليست ەكەنىمىزدى تۇسىنگەن سوڭ ءمان-جايدى تۇسىندىرۋگە تىرىستى. فيلمدەردىڭ قازاقشا نۇسقاسىن ەشكىم سۇرامايدى ەكەن، سۇرانىس بولماعان سوڭ پروكاتتاۋشىلار وعان دۋبلياج جاساپ، باسى ارتىق شىعىن جاساۋدىڭ ءجونى جوق دەپ ەسەپتەسە كەرەك.
ءدال وسىنداي جاۋاپتى «ارمان» كينوتەاترىنىڭ اكىمشىسىنەن دە ەستىدىك. «Esentai mall», «Globus»، «سپۋتنيك» ويىن- ساۋىق ورتالىقتارىندا ورنالاسقان «Kinopark» كينوتەاترلار جەلىسى دە مەملەكەتتىك ءتىلدى قاجەتسىنە قويماپتى.
كورسەتىلەتىن كينولاردىڭ اپتالىق كەستەسىنەن قازاق تىلىندە دۋبلياجدالعان ءبىر دە ءبىر فيلم تابا المادىق. «جۋىردا» دەپ جارناماسىن جالاۋلاتىپ قويعان فيلمدەر دە تەك ورىس تىلىندە كورسەتىلەدى ەكەن. سوڭعى ءۇمىتىمىز قازاقستانداعى Premium-كلاسقا جاتاتىن تۇڭعىش كينوتەاتر، بەلگىلى سەناريست ءارى رەجيسسەر تيمۋر بەكمامبەتوۆتىڭ ەسىمىن يەمدەنگەن «Bekmambetov Cinema»-دا ەدى. حابارلاستىق.
«كاسسا» دەپ تەلەفون تۇتقاسىن كوتەرگەن جىگىت قۋانتا قويمادى. وتاندىق فيلمدەردىڭ ءبىرلى-جارىمى بولماسا، شەكارا اسىپ كەلەتىن فيلمدەرگە دۋبلياج جاسالمايدى ەكەن.
«كينوتەاترلاردىڭ جازىعى جوق»
كينوتەاترلار زاڭدى نەگە بەلشەسىنەن باسىپ وتىر؟ ەشكىم قۇلاق اسپايتىن بولسا، مۇنداي زاڭدى قابىلداۋدىڭ قانداي قاجەتتىلىگى بار؟ قابىلداندى ەكەن، ورىندالۋى نەگە قاداعالانبايدى؟ بۇل سۇراقتاردى ش. ايمانوۆ اتىنداعى «قازاق فيلم» ا ق باس رەداكتورى ءديدار امانتايعا قويدىق. ونىڭ ايتۋىنشا، «مادەنيەت تۋرالى» زاڭنىڭ 28-4 -بابىنىڭ 1-تارماقشاسىندا ەلىمىزدىڭ اۋماعىندا فيلمدەردى پروكاتتاۋ قازاق تىلىندە جانە وزگە تىلدەردە جۇزەگە اسىرىلاتىنى ايتىلعان، ءبىراق «بارلىق فيلم تۇگەل دەرلىك قازاق تىلىندە پروكاتقا شىقسىن» دەگەن مىندەت قويىلماعان ەكەن.
ال 2-تارماقشاسىندا ۇلتتىق فيلمدەردى «قازاق تىلىندە پروكاتتاۋ جۇزەگە اسىرىلۋى ءتيىس» دەلىنگەن. ۇلتتىق مارتەبە العان فيلمدەردى «قازاق فيلم» تۇسىرەتىنى بەلگىلى. مۇندا تۇسىرىلەتىن بارلىق فيلمدەر ادەتتە قازاقشا تۇسىرىلەدى، ورىسشا تۇسىرىلگەندەرى مىندەتتى تۇردە قازاق تىلىنە دۋبلياجدالادى. سوندىقتان «قازاق فيلمدە» قازاق ءتىلىنىڭ اسىعى تۇگەل. بۇل تۇرعىدان ءديدار امانتايعا قارسى ءۋاج ايتا المايمىز.
باس رەداكتور اتالعان باپتىڭ داۋ تۋدىرىپ وتىرعان 3-تارماقشاسىنا دا تۇسىنىكتەمە بەردى. «بۇل تارماقشادا قازاقستانعا اكەلىنەتىن فيلمدەردىڭ قانشا داناسىنا دۋبلياج جاسالۋى كەرەكتىگى ناقتى ايتىلماعان. بۇل - ءبىر. ەكىنشىدەن، سول قازاقشا دۋبلياج جاسالعان نۇسقاسى «پروكاتقا شىعۋى ءتيىس» (كينوتەاترلاردا كورسەتىلسىن) دەگەن ءسوز تاعى جوق»، - دەيدى د. امانتاي.
ياعني، ديستريبيۋتورلار پروكاتتالۋى ءتيىس فيلم كوشىرمەسىنىڭ ءبىر داناسىنا عانا قازاقشا دۋبلياج جاساپ، كوزدەن تاسالاۋ جەرگە ىسىرىپ قويا سالۋى مۇمكىن.
تالاپ ەتىپ جاتسا، كورسەتە قويادى. «قازاق فيلمنىڭ» باس رەداكتورىنا كينوتەاترلاردان قازاق تىلىنە دۋبلياجدالعان بىردە-ءبىر فيلم تاپپاعانىمىزدى، كينوتەاتر اكىمشىلىگىنىڭ العا تارتار ءۋاجىن ايتتىق. سويتسەك، پروكاتتاۋشىلاردى قىسپاققا الۋعا قاقىمىز جوق ەكەن. «شەتەلدىك كينولاردىڭ الەم كورەرمەندەرىنە تارالۋ پروتسەسىنە ەكى بۋىن قاتىسادى: ديستريبيۋتورلار مەن پروكاتتاۋشىلار. پروكاتتاۋشىلار دەپ وتىرعانىمىز - كينوتەاترلار، ال ديستريبيۋتورلار - ءونىمدى ۇسىنۋشىلار.
ماسەلەن، ءسىز جۋرنالدا كەتكەن قاتەلىكتەر ءۇشىن دۇڭگىرشەكتى كىنالاي المايسىز عوي. ولار - باسپا ءونىمىن تاراتۋشىلار عانا. ال ساپاسىنا، ىشىندەگى كونتەنتىنە جۋرنال رەداكسياسى جاۋاپتى. سول سياقتى كينوتەاترلاردان فيلمدەردىڭ قازاقشا نۇسقاسىن تالاپ ەتۋىڭىز ورىنسىز. زاڭنىڭ ورىنداماعانى ءۇشىن ديستريبيۋتورلاردى جاۋاپقا تارتۋ كەرەك»، - دەيدى ءديدار امانتاي.
كينوتەاترلاردى بەكەر جازعىرعانىمىزدى تۇسىندىك تە، قايسىسىنىڭ قانداي ديستريبيۋتورلارمەن جۇمىس ىستەيتىنىن انىقتاۋعا تىرىستىق.
قازاقستاندىق كينو نارىعىنىڭ نەگىزگى ويىنشىلارى - «20th Century Fox» كينوستۋدياسىنىڭ ونىمدەرىن جەتكىزۋشى «Kinopark», «Disney», «Sony», «Bazelevs», «West» كينوستۋديالارى شىعاراتىن فيلمدەردى ۇسىناتىن «مەلومان»، «Warner Brothers», «Paradise»، «ۆولگا» كينوستۋديالارى تۇسىرگەن فيلمدەردى جەتكىزەتىن «ارمان»، «Central Partnership» ونىمدەرىن وتاندىق نارىققا ەنگىزەتىن «ينتەرفيلم distribution » سياقتى كومپانيالار.
بارلىعىن تۇگەندەمەسەك تە، نەگىزگىلەرىن تىزىمدەدىك. شەتەلدىك كينولاردى ەكسپونەنتتەر (ءوز قۇزىرىنا قارامايتىن كينوتەاترلار) ارقىلى پروكاتقا شىعاراتىن كومپانيالارمەن بايلانىس ورناتۋ وڭايعا تۇسپەسىن بىلگەن سوڭ، جەكەمەنشىك كينوتەاترلارى بار «Kinopark», «Star sinema» سىندى ديستريبيۋتورلاردى سوزگە تارتپاق بولدىق.
«Kinopark» كومپانياسىنىڭ «Esentai mall», «Globus»، «سپۋتنيك» سياقتى ويىن- ساۋىق ورتالىقتارىندا جەكە كينوتەاترلارى بار. ال «Star sinema» ادام قاراسى ازايمايتىن «Aport», «Mega» «پرايم پلازا» ورتالىقتارىنا ءوز كينوتەاترلارىن ورنالاستىرعان.
وكىنىشكە قاراي، ارەكەتىمىز ناتيجەسىز اياقتالدى. كاسسادان باستالعان ساتىلى قوڭىراۋلار تىزبەگى ۇزاققا سوزىلعانىمەن، بىزبەن تىلدەسكەن ادامنىڭ بىردە- بىرەۋى جاۋاپكەرشىلىكتى ءوز موينىنا العىسى كەلگەن جوق.
«پروكاتقا وسى كىسى جاۋاپتى» دەپ ءبىرىن-ءبىرى نۇسقاۋدان ءارى اسپايدى. «وسىعان حابارلاس» دەپ، ءبىرى 11 تاڭبالى(ۇيالى تەلەفون - رەد.)، تاعى ءبىرى 5 تاڭبالى(جۇمىس تەلەفون - رەد.) ءنومىر ۇسىندى. كوپشىلىگى جۋرناليست ەكەنىمىزدى بىلگەن سوڭ، ات-توندارىن الا قاشادى.
كاسىبىڭدى ايتپاساڭ، قاراپايىم كورەرمەنگە اقپارات ۇسىنا قويۋلارى ەكىتالاي. «Kinopark»- تىڭ ولگا ەسىمدى قىزمەتكەرى عانا كومپانيانىڭ فيلمدەردى قازاق تىلىنە دۋبلياجداۋعا نەلىكتەن قۇلىقسىز ەكەنىن تۇسىندىرمەك بولدى.
ونىڭ ايتۋىنشا، مەملەكەتتىك تىلدەگى فيلمدەرگە كورەرمەن قاۋىمنىڭ سۇرانىسى تىم تومەن. ويتكەنى قازاق تىلىندەگى اۋدارماعا كوڭىلدەرى تولمايدى- مىس. ەكىنشىدەن، شەتەلدىك كينولارعا قازاقشا دۋبلياج جاساۋ ءۇشىن قىرۋار قارجى كەتەدى جانە ول ءفيلمنىڭ ەلىمىزدەگى پروكاتىنان تۇسكەن قارجى ءوزىن-ءوزى اقتاي الماي، شىعىنعا باتىرادى ەكەن.
ۇشىنشىدەن، ەلگە اكەلىپ، وعان قازاقشا دۋبلياج جاسالىپ بولعانشا ارادا ءبىراز ۋاقىت ءوتىپ، كورەرمەن الەمدىك پرەمەرانى ۋاقىتىنان تىم كەشىگىپ كورەدى. كومپانيا وكىلىنىڭ ايتار ءۋاجى - وسى.
دەمەك «Kinopark» تا، ونىڭ وزگە ۇزەڭگىلەستەرى دە جۋىق ارادا كوزى قاراقتى كورەرمەنگە مەملەكەتتىك تىلدە كينو ۇسىنا قويمايتىن سياقتى. جۇبانارىمىز - سوڭعى ءتورت جىلدا «نۇر وتان» پارتياسى مەن «بولاشاق» قاۋىمداستىعىنىڭ قولداۋىمەن قازاقشا سويلەگەن گولليۆۋدتىڭ 9 ءفيلمى.
2011 -جىلدان بەرى «Walt Disney/Pixar», «Sony Pictures», «Columbia Pictures», «Marvel» سياقتى ءىرى گولليۆۋد كينوستۋديالارى تۇسىرگەن «كولىكتەر-2»، «قارا كيىمدىلەر-3»، «جاڭا ورمەكشى ادام»، «باتىل جۇرەك»، «مونسترلار ۋنيۆەرسيتەتى» ، «جالعىز رەيندجەر»، «كەرنەگەن قۋات»، «مالەفيسەنتا»، «گالاكتيكا ساقشىلارى» سياقتى 9 تۋىندى قازاقشا سويلەدى. قازاق تىلىنە دۋبلياجدالعان فيلمدەر شىعىنعا باتىرادى دەگەن سىڭارجاق كوزقاراستىڭ تاس- تالقانىن شىعارعان دا - وسى فيلمدەر.
تابىستى جارىستىرۋ قانشالىقتى قيسىندى؟
مەملەكەتتىك تىلگە اۋدارىلعان ەڭ العاشقى گولليۆۋد تۋىندىسى - «كولىكتەر-2» ءمۋلتفيلمى 2011 -جىلى 23 -ماۋسىمدا وتاندىق پروكاتقا شىققان ەدى. قازاق ءتىلى «كولىكتەر-2» دىبىستالعان 39 ءتىل بولدى. دۋبلياجعا 40 دارا داۋىس قاتىستى. 7 اپتا ىشىندە ءفيلمنىڭ قازاقشا نۇسقاسىن 24 مىڭ ادام تاماشالاپ، كاسسالىق تابىس 15253977 تەڭگەنى قۇراعان بولاتىن (سول جىلعى ۆاليۋتا باعامى بويىنشا 104659 ا ق ش دوللارى). دۋبلياج جۇمىستارىنا جۇمسالعان 100 مىڭ دوللاردى شەگەرسەك، تازا تابىسى - 4 مىڭ ا ق ش دوللارىنا تەڭ. «كولىكتەر-2» مەملەكەتتىك تىلدە سويلەگەن العاشقى گولليۆۋدتىق تۋىندى بولعاندىقتان تۇسكەن پايدانى ازسىنۋدىڭ ءجونى جوق. باستىسى، شىعىن اقتالدى.
ايگىلى «Men in Black-3» تە «قارا كيىمدىلەر 3» دەگەن اتپەن وتاندىق پروكاتتىڭ كورىگىن قىزدىرعان ەدى. فانتاستيكالىق كومەديانىڭ قازاقشا بەيىمدەلگەن نۇسقاسى كورسەتىلىمنەن 3122140 تەڭگە تاپتى. دۋبلياج جۇمىستارىمەن «كولىكتەر-2»-نى دايىنداعان توپ اينالىستى. فيلم 2012 -جىلى 24 -مامىردا پروكاتقا شىققان بولاتىن. ورىسشا جانە قازاقشا نۇسقاسىن قوسقاندا «قارا كيىمدىلەر-3» قازاقستاننان 240336929 تەڭگە (1531770 ا ق ش دوللارى) پايدا ءتۇسىردى.
قازاقشا دۋبلياجدالعان فيلمدەردىڭ ىشىندە ءوزىن-ءوزى اقتاماعانى - «باتىل جۇرەك» پەن «جالعىز رەيندجەر» عانا. 2012 -جىلى 21 -ماۋسىمدا قازاقستاندىق كورەرمەنىنە جول تارتقان «باتىل جۇرەك» ءبىزدىڭ ەلىمىزدەن 126499735 تەڭگە (739941 ا ق ش دوللار) تابىس تاپتى. ونىڭ قازاقشا پروكاتىنىڭ ۇلەسى - نەبارى 1988610 تەڭگەنى (12481 ا ق ش دوللارى) قۇرادى. دۋبلياج جۇمىستارىنا 19 ميلليون تەڭگە قارجى جۇمسالعان. ويتكەنى «باتىل جۇرەكتى» اۋدارعاندار ديالوگتاردىڭ اۋدارماسىمەن شەكتەلىپ قالماي، فيلمگە ەكى ءان دە جازدى. مۋلتفيلمدەگى حانشايىم مەريدا قازاق ءانشىسى ماقپال يسابەكوۆانىڭ داۋسىمەن ءان سالعانى ەسىمىزدە.
قازاقشا دۋبلياجدىڭ جۇمسالعان شىعىندى اقتاماۋى ۇگىت-ناسيحاتتىڭ ازدىعىنان، جارنامانىڭ جۇيەسىزدىگىنەن دەپ توپشىلايمىز. الىسقا بارماي-اق، تۇساۋكەسەر قارساڭىندا قالانى اينالدىرا ىلىنگەن بيلبوردتار مەن باننەرلەردە ءفيلمنىڭ قازاق تىلىندەگى اتاۋىنىڭ كوزگە كورىنەر- كورىنبەس قارىپتەرمەن جازىلۋى پروكات كەزىندە ورىس ءتىلىنىڭ ۇستەمدىگى ورنايتىنىن ۇقتىرىپ قويعان-دى. تاڭعالا قويمادىق.
قازاق تىلىندەگى سەانستاردىڭ ازدىعى، پرايم-تايمعا ىلعي ورىس تىلىندەگى سەانستاردىڭ قويىلۋى دا كينو نارىعىنداعى مەملەكەتتىك ءتىلدىڭ مەرەيىن وسىرمەي قويدى. 2013 -جىلى 4 -شىلدەدە پروكاتقا شىققان شىتىرمان وقيعالى ۆەستەرن- بويەۆيك «جالعىز رەيندجەردىڭ» قازاقشا كورسەتىلىمنەن نەبارى 510130 تەڭگە جيناۋىنىڭ سەبەبىن دە الىستان ىزدەۋدىڭ قاجەتى جوق. وتاندىق كينوتەاترلاردا اتالمىش ءفيلمنىڭ كورسەتىلىمى ءجۇرىپ جاتقاندا بەلگىلى جۋرناليست ءاسيا باعداۋلەت قىزى ءوزىنىڭ «فەيسبۋكتاعى» جەكە پاراقشاسىنا: «جالعىز رەيندجەردىڭ» قازاقشا نۇسقاسىن كورەيىن دەسەك، جالعىز سەانس بار ەكەن. ونىسى 13.45 تە «Silk way city»- دا. ونداي ۋاقىتتا جۇمىستان قايتىپ كەتىپ قالاسىڭ؟ الماتىداعى 22 كينوتەاتردا ءدال وسى ءفيلمنىڭ 78 ورىسشا سەانسى بار ەكەن»، - دەپ جازدى.
ەكى تىلدەگى سەانس سانىن سالىستىرۋدىڭ ءوزى ۇيات، ەندەشە تابىستى جارىستىرۋ قانشالىقتى قيسىندى؟
«سىن تۇزەلمەي ءمىن تۇزەلمەيدى» دەمەي مە قازاق؟ قازاق ءتىلدى كورەرمەننىڭ نارازىلىعى مەن الەۋمەتتىك جەلىلەردەگى قىزۋ تالقىلاۋلاردان كەيىن 2014 -جىلى قازاق تىلىنە اۋدارىلعان «مالەفيسەنتا» مەن «گالاكتيكا ساقشىلارىنا» كينوتەاترلار كەستەسىنەن لايىقتى ورىن بەرىلدى. ناتيجەسىندە قازاقستاندىق پروكاتقا شىققان العاشقى ءۇش كۇن ىشىندە-اق (31 -شىلدە - 3 -تامىز) «گالاكتيكا ساقشىلارى» 98446600 تەڭگە نەمەسە 540766 ا ق ش دوللارىن جينادى.
بۇل - «بولاشاق» قاۋىمداستىعى قازاقشا سويلەتكەن توعىزىنشى فيلم.
مەملەكەتتىك تىلگە اۋدارىلعان ءفيلمنىڭ مۇنداي تابىسقا قول جەتكىزۋىن بۇقارالىق اقپارات قۇرالدارى ارقىلى كەڭ ناسيحاتتالۋىمەن دە بايلانىستىردىق. تۇساۋكەسەر قارساڭىندا «گالاكتيكا ساقشىلارىنىڭ» جارناماسى جاراپ تۇردى.
العاشقى كورسەتىلىمگە «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك پەن «بولاشاق» قاۋىمداستىعى وكىلدەرىنىڭ ارنايى كەلۋى، تانىمال ونەر جۇلدىزدارىنىڭ شاقىرىلۋى دا قازاقشا سويلەگەن ءفيلمنىڭ سالماعىن ارتتىرا ءتۇستى.
جاستارعا ادەتتە تانىمال ادامداردىڭ ءسوزى وتىمدىرەك ەمەس پە؟ تۇساۋكەسەردەن كەيىن ونەر جۇلدىزدارى الەۋمەتتىك جەلى ارقىلى فيلمنەن العان اسەرلەرىن كوپشىلىكپەن ءبولىستى، گولليۆۋدتىق تۋىندىنى قازاق تىلىندە تاماشالاۋعا شاقىردى. ناسيحاتتىڭ ناتيجەسىن جوعارىدا سيفرمەن ورنەكتەدىك. سوزدەن گورى سانعا سۇيەنەتىندەرگە قازاق تىلىنە ىقىلاستىڭ كەمىمەگەنىن كورسەتكىمىز كەلدى.
انار لەپەسوۆ
«تۇركىستان»
