مەملەكەت ەكونوميكانى دوللارسىزداندىرۋ ارقىلى ۇلتتىق ۆاليۋتاعا قولداۋ جاسايدى - ق. كەلىمبەتوۆ
بۇل تۋرالى ك ت ك تەلەارناسىنىڭ «حالىق قىزمەتشىسى» باعدارلاماسىنا سۇحبات بەرگەن ق ر ۇلتتىق بانكىنىڭ ءتوراعاسى قايرات كەلىمبەتوۆ ءمالىم ەتتى.
ۇلتتىق بانك ءتوراعاسى ەكونوميكانى دوللارسىزداندىرۋ ماسەلەسىنە توقتالا كەلە، جوسپار باستى ءۇش باعىتقا نەگىزدەلگەنىن، ءبىرىنشى باعىت - ماكروەكونوميكالىق تۇراقتىلىقتى قامتاماسىز ەتۋ ەكەندىگىن، ەكىنشى باعىت - قولما-قول اقشا وپەراتسيالارىن ازايتىپ، كولەڭكەلى اينالىمدى تومەندەتۋ، سونداي-اق ءۇشىنشى باعىت - ۇلتتىق ۆاليۋتانىڭ شەتەلدىك ۆاليۋتاعا قاراعاندا باسىمدىعىن كوتەرۋ ەكەندىگىن اتاپ ءوتتى.
ونىڭ سوزىنە قاراعاندا، ەلىمىزدەگى 17 ميلليون تولەم كارتوچكالارى وپەراتسيالارىنىڭ 80 پايىزى بانكوماتقا كەلىپ، اقشانى قولما-قول الۋعا بايلانىستى كورىنەدى.
«دوللارسىزداندىرۋ ءبىر كۇندە شەشىلەتىن ماسەلە ەمەس. بۇل تۇرعىدا زاڭنامانى وزگەرتۋ، نورماتيۆتىك-قۇقىقتىق اكتىلەرگە تولىقتىرۋلار ەنگىزۋ، قارجىلىق ساۋاتتىلىق جانە باسقا دا قادامدار قامتىلادى. وسى جۇمىستار ىسكەرلىك تاجىريبە. كەم دەگەندە 3-5 جىلدا وسى شارالار جۇزەگە اسىرىلادى. بارشا الەمدە قولما-قول اقشا وپەراتسيالارىمەن كۇرەس ءجۇرىپ جاتىر.
ماسەلەن، بىزدە قولما-قول اقشامەن تولەمدەردىڭ دەڭگەيى 93 پايىزدى قۇراسا، كەيبىر ەۋروپالىق ەلدەردە قولما-قول اقشامەن ەمەس تولەمدەر 90 پايىزدان اسىردى»، - دەپ توقتالدى ق. كەلىمبەتوۆ.
2017 -جىلدان باستاپ قازاقستاندا تابىستاردى جالپىلاما دەكلاراتسيالاۋ ىسكە قوسىلاتىندىعىن ەسكە سالىپ وتكەن ول وسى ورايدا سول كەزدە حالىقتا دەكلاراتسيالانباعان مۇلىكتى نەمەسە قارجىنى يەمدەنۋ مۇمكىن بولمايتىندىعىن اتاپ ءوتتى .
«بۇل تۇرعىدا مەملەكەت زاڭداستىرۋ تۇرىندە جاقسى مۇمكىندىك جاساپ وتىر. اتاپ ايتقاندا، اقشامەن جۇمىس ىستەۋدە جاڭا مادەنيەتكە كوشۋ ءۇردىسى ءجۇرىپ جاتىر. ياعني، جاڭا سالىقتىق مادەنيەتكە، تولەمدەردىڭ جاڭا مادەنيەتىنە بەتبۇرىس كوزدەلىپ وتىر»، - دەدى ۇ ب باسشىسى.
سونىمەن قاتار ەكونوميكاداعى ىنتالاندىرۋ شارالارىنا توقتالعان كەلىمبەتوۆ قازىرگى كەزدە تەك تەڭگە بويىنشا دەپوزيتتەرگە كەپىلدەندىرۋ كولەمى 5 تەن 10 ميلليون تەڭگەگە دەيىن ارتقاندىعىن اتاپ ءوتتى.
اۆتور: رۋسلان عابباسوۆ
