اتىراۋ وبلىسى اۋماعىندا وعىزدار قورىمى تابىلدى
بۇعان دەيىن اۋىل تۇرعىندارى ۋنيۆەرسيتەت عالىمدارىنا وسى ماڭايدان ادام سۇيەگىن، ساۋىت-سايمان تۇرلەرىن تاۋىپ العاندىقتارىن ايتقان. بيىل قازبا ورنىنا حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ 1- كۋرس ستۋدەنتتەرى كەلىپ، ىسكە كىرىسكەن ەدى. قازبا كەزىندە قورىمنان ادام مۇردەسىنىڭ بولشەكتەرىمەن بىرگە جىلقى سۇيەكتەرى دە تابىلعان. جىلقىنىڭ جانىندا تەمىر ساۋىت، ۇزىندىعى 1 مەترگە جۋىقتايتىن قىلىش جانە باسقا دا ات ابزەلدەرى بولعان. عالىمدار بۇل تەمىر ساۋىت ادامعا ەمەس، اتقا ارنالعان دەگەن تۇجىرىم جاساپ وتىر. ويتكەنى ساۋىتتىڭ سالماعى - 20 كەلى، ۇزىندىعى 1 مەتردەن اسادى.
«مۇنداي ساۋىتتار ورتا عاسىردا وعىزدار تايپاسىندا كەڭىنەن قولدانىلعانى بەلگىلى جانە قازىرگى كەزەڭدە وتە سيرەك كەزدەسەدى. اتىراۋ جەرىندەگى قۇم شاعىلداردا، نارىن قۇمىندا بۇل ساۋىت وتە جاقسى ساقتالعان. بۇل قۇرعاق كليماتتىڭ ارقاسى»، - دەيدى ارحەولوگيالىق توپتىڭ جەتەكشىسى مارات قاسەنوۆ.
