تۇرىك ەلى سۇلەيمەن دەميرەلدى اقتىق ساپارعا شىعارىپ سالدى
ءومىرىنىڭ 50 جىلىن ەلىنىڭ كەمەل كەلەشەگىنە ارناعان كورنەكتى ساياساتكەرمەن قوشتاسۋعا ەل استاناسى انكاراداعى قوجاتەپە مەشىتىنە وسى ەلدىڭ زيالى قاۋىم وكىلدەرى قوعام قايراتكەرلەرى مەن قارا- قۇرىم حالىق جيىلدى.
تۇركيانىڭ 9-پرەزيدەنتى سۇلەيمەن دەميرەلدى اقتىق ساپارعا شىعارىپ سالۋ ءراسىمى انكاراداعى گيۋنيز كوشەسىندەگى ءوز ۇيىنەن باستالىپ، تالاي جىل قىزمەت ەتكەن ورتاسى تۇركيا ۇلى ۇلتتىق ماجىلىسىندە جالعاسىن تاپتى. مارقۇممەن قوشتاسۋعا ساياسي پارتيالاردىڭ جەتەكشىلەرى، پارلامەنت دەپۋتاتتارى مەن تۇركيا پرەزيدەنتى رەجەپ تايىپ ەردوعان دا قاتىستى. جيىلعان الەۋمەت كورنەكتى تۇلعانىڭ ەل ءۇشىن اتقارعان ەڭبەگىن ەمىرەنە ەسكە الدى.
رەجەپ تايىپ ەردوعان، تۇركيا رەسپۋبليكاسىنىڭ پرەزيدەنتى:
- مارقۇم سۇلەيمان دەميرەل مەملەكەتىمىزدىڭ دامۋى مەن حالقىمىزدىڭ ءال- اۋقاتىنىڭ جاقسارۋىنا بۇكىل ءومىرىن ارنادى. ونىڭ بۇل ەڭبەگىن كۇللى حالىق جوعارى باعالايدى. ونىڭ قايراتكەرلىگى ۇرپاعىمىزعا ۇلگى بولىپ قالا بەرەدى.
سۇلەيمان دەميرەل 40 جاسىندا ۇكىمەت تىزگىنىن ۇستاپ، تۇرىك تاريحىندا ەڭ جاس پرەمەر- مينيستر اتانعان بىلىكتى ساياساتكەر. ول 1965-1993 -جىلدار ارالىعىندا 10 جىلدان استام ۋاقىت ۇكىمەتكە جەتەكشىلىك ەتىپ، ودان سوڭ پارلامەنت دەپۋتاتتارىنىڭ قولداۋىمەن پرەزيدەنت بوپ سايلانادى. وسى كەزەڭدە سۇلەيمەن دەميرەل تۇركى الەمىنىڭ بىرىگۋىنە قالتقىسىز قىزمەت ەتتى. اسىرەسە ونىڭ قازاق ەلىنە دەگەن ىقىلاسى ەرەكشە بولاتىن.
- تۇركيا مەن قازاقستان دوس ءارى باۋىرلاس ەل. بۇگىنگى كۇنگە دەيىن ەكى ەل اراسىنداعى ىنتىماقتاستىق ءوزارا كەلىسىمگە قۇرىلدى. بولاشاقتا دا بۇل باياندى بايلانىس ۇزاق جالعاسادى دەپ سەنەمىن. قازاقستان تۇركى دۇنيەسىندە، حالىقارالىق قاۋىمداستىقتا مارتەبەلى ورىنعا كوتەرىلدى. مەن قازاق ەلىنىڭ ءاربىر جەتىستىگىنە بالاشا قۋانامىن جانە سىزدەرگە تولاعاي تابىس تىلەيمىن، - دەگەن بولاتىن تۇركيا رەسپۋبليكاسىنىڭ 9-پرەزيدەنتى سۇلەيمەن دەميرەل. سۇلەيمان دەميرەل تۋعان جەرى سپارتا قالاسى اتابەي اۋدانىندا جەرلەنەدى. وندا وسىدان ءبىر جىل بۇرىن ۇلكەن مەموريالدىق كەشەن سوعىلعان بولاتىن. كەشەنگە كىرە بەرىستە دەميرەلدىڭ ەسكەرتكىشى تۇرعىزىلعان. سونداي- اق مۇندا ونىڭ ءومىر جولىنان سىر شەرتەتىن مۋزەي دە اشىلدى.
www.24.kz
