سوزاق كوتەرىلىسى جايلى «زۇلمات» قىسقا مەتراجدى فيلمى جارىق كوردى

1925 - جىلى ي. ستالين قازاقستان ۇكىمەتىن باسقارۋعا ي. ش. گولوشەكيندى جىبەردى. «اسىرا سىلتەۋ بولماسىن، اشا تۇياق قالماسىن» دەگەن ءازازىل ۇراندارمەن 1930-33 - جىلدارى ادەيى، قولدان جاسالعان بۇل زۇلماتتا 6 ميلليون قازاقتىڭ 3 ميلليونى قىرىلدى.

كارتيناعا سوزاق كوتەرىلىسى كەزىندە ءبىر عانا اۋلەتتىڭ باسىنان وتكەن قاسىرەتتى وقيعا ارقاۋ بولعان. رەجيسسەر اجالمەن بەتپە- بەت كەلگەن ءبىر ءۇيدىڭ التى بالاسى ارقىلى التى الاشتىڭ ازاپتى تاعدىرىن كورسەتىپ بەرگەن.

قويۋشى- رەجيسسەر ءسابيت ءابدىحالىقوۆتىڭ ايتۋىنشا، كينونى تۇسىرۋگە 3 ايدان استام ۋاقىت كەتكەن.

«بۇل - «قازىعۇرت» كينوستۋدياسىنىڭ 7 - جوباسى. تاريحي كينو. سوزاق كوتەرىلىسى تۋرالى كوپ ماعلۇمات جوق. تەك وتەش قىرعىزبايەۆتىڭ كىتابىن وقىدىق. مولداسىن تاستانوۆ دەگەن جىگىت سوزاق كوتەرىلىسىنەن كەيىن ءبىر ءۇيدىڭ 6 بالاسىن قاتار اتۋ جازاسىنا كەسكەن كەزدە ەڭ كەنجەسىن امان الىپ قالعانى تۋرالى شىنايى وقيعانى ايتىپ بەرگەن بولاتىن. سول تۋرالى تۇسىردىك»، - دەدى ءسابيت ءابدىحالىقوۆ.

رەجيسسەردىڭ ايتۋىنشا، سۇرانىس ءتۇسىپ جاتسا قىسقا مەتراجدى كوركەم فيلم كۇزگە تامان وتاندىق تەلەارنالار ارقىلى كورەرمەنگە جول تارتپاق.  
 فيلمدى ناسيحاتتاۋ عالامتور ارقىلى جۇزەگە اسادى. اۆتورلار تۋىندىنى لوندونداعى كينوفەستيۆالگە اپارۋعا نيەتتى.

«سوزاق كوتەرىلىسى - ەشكىمنىڭ ءتىسى باتا بەرمەيتىن تاقىرىپ. ماعان ەڭ العاش ءسابيت سسەناريىن كورسەتكەندە، ۇلكەن كۇدىك پايدا بولدى. كومەديا جانرىنداعى ادام قالاي تراگەدياعا قالاي بارادى دەپ. بۇگىن سىزدەردىڭ الدارىڭىزدا ونى قۇتتىقتاعىم كەلىپ وتىر. وسىنداي تراگەديانى ايناماي بەرۋ ەرلىك. تراگەديانى كورسەتەتىن بولسا، ادامدار ەركسىز كوزىنە جاس الادى»، - دەدى بەلگىلى رەجيسسەر ساتىبالدى نارىمبەتوۆ. بالالاردىڭ اناسىن بەلگىلى اكتريسا رايحان ايتقوجانوۆا سومداعان. باستى رولدەردە مۇحامەدجان بايزاق، ەرجان جارىلقاسىن ۇلى، الىشەر اركەمباي، ايدار اقىلباي، اسىلحان تولەپوۆ وينايدى.

اۆتور:   گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى