الماتىدا قوعامدىق كولىك جولىمەن جۇرگەن جۇرگىزۋشىلەر كۋالىگىنەن ايىرىلۋى مۇمكىن

سوڭعى 3 كۇندە جول پوليتسياسى 100 گە جۋىق جۇرگىزۋشىنى انىقتاپ، ولارعا حاتتاما تولتىرعان. ال 40 تان استام كولىك ايىپتۇراعىنا جەتكىزىلدى.

جول ساقشىلارى تەكسەرىستى جالعاستىرا بەرەدى، دەپ حابارلايدى almaty.tv.

 اباي داڭعىلىنداعى قوعامدىق كولىككە ارنالعان ارنايى جولاق وسى ايدىڭ 15 ىنەن باستاپ كۇشىنە ەنگەن ەدى. ءۇش كۇن ىشىندە جول ەرەجەسىن ەلەمەگەن 96 كولىك جۇرگىزۋشىسى اكىمشىلىك جاۋاپكەرشىلىككە تارتىلدى. قىرىقتان استام كولىك ايىپ تۇراعىنا جەتكىزىلگەن. ولاردىڭ زاڭ بۇزعاندىعى اۆتوبۋستاعى بەينەجازباعا تىركەلگەن.

ايىپپۇل جەكە كولىكتەرگە عانا ەمەس، جولاقتان شىققان اۆتوبۋستارعا دا سالىناتىن بولادى. دەگەنمەن ازىرگە ەرەجە بۇزعان اۆتوبۋس تىركەلمەپتى. سىناق رەتىندە ەڭ الدىمەن اباي داڭعىلىنا سىزىلعان جولاق بولاشاقتا وزگە دە كوشەلەردە پايدا بولادى. ارنايى جولاققا زاڭسىز شىققان جۇرگىزۋشىلەرگە 5 ايلىق ەسەپتىك كورسەتكىش كولەمىندە ايىپپۇل سالىنادى.

«اۆتوكولىك جۇرگىزۋشىلەرىنىڭ ءالى دە بولسا زاڭ بۇزۋشىلىقتارى بار. ماسەلەن، اۆتوبۋستاردىڭ جولىنا شىعىپ، كەدەرگى كەلتىرۋى، رۇقسات ەتىلمەگەن جەرگە كولىكتەرىن قالدىرۋى. مۇنىڭ ءبارى قوعامدىق كولىكتەرگە ورناتىلعان بەينەجاباعا جازىلادى. ال، بەينەجازبا جول پوليتسياسى باسقارماسىنا بەرىلەدى»، - دەدى «الماتىەلەكتروترانس» ج ش س باسپا ءسوز حاتشىسى گاۋھار نوكەربەكوۆا.

ارنايى جولاق قوعامدىق كولىكتەردە تاسىمالداناتىن جولاۋشىلار ءۇشىن ءتيىمدى. جاڭا ەرەجە كۇشىنە ەنگەن سوڭ، ولاردىڭ دىتتەگەن جەرلەرىنە جەتۋ ۋاقىتى ءبىرشاما ۋاقىتقا ازايعان.

«جولدا كەدەرگىلەر جوق. ءوزىمىزدىڭ جولاق اشىق. سونىمەن جۇرەمىز. كەدەرگى جاسايتىن تاكسيستەر بار. بۇرىنعىدان قاراعاندا 25 مينۋتقا ەرتە بارىپ جاتىرمىز»، - دەدى اۆتوبۋس جۇرگىزۋشىسى گۇلىم دۇيسەمبيەۆا.

 جوبا بۇدان باسقا جولدىڭ جيەگىنە كولىگىن رەتسىز قاڭتارا سالاتىن پىسىقايلاردى تىپتەن شىدەرلەمەك.

سونداي- اق، جولاۋشىلار نازارىنا دا قۇلاققاعىس. قوعامدىق كولىكتە بيلەتسىز جۇرەتىندەرگە 2-ايلىق ەسەپتىك كورسەتكىش كولەمىندە ايىپپۇل سالىناتىن بولادى.

BNews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى