اقتاۋدا جول ەرەجەسىن ورەسكەل بۇزعان توي كورتەجىنە پوليتسەي ەشقانداي شارا قولدانباعان

ءتارتىپ ساقشىسى جول ەرەجەسىن ورەسكەل بۇزعان توي كورتەجىنە ەشقانداي شارا قولدانباعان. بۇل تۋرالى استانا ارناسىنا وبلىستىق ىشكى ىستەر دەپارتامەنتىنىڭ باسپا ءسوز قىزمەتىنىڭ وكىلدەرى حابارلادى.

تاياۋدا عالامتور جەلىسىندە كولىكتىڭ بەينەباقىلاۋ كامەراسىنا ءتۇسىپ قالعان جازبا جاريالانعان. وندا توي سەرۋەنىندە جۇرگەن جول تالعامايتىن بىرنەشە قىمبات كولىكتىڭ ەكى جولاقتى سىزىقتى باسىپ، جول قوزعالىسىن ورەسكەل بۇزعانى انىق كورىنەدى.

الايدا سول ماڭدا كەزەكشىلىكتە تۇرعان جول ساقشىسى كورمەگەن سىڭاي تانىتىپ، شارا قولدانباعان. بەينەتۇسىرىلىم «اۆتوموبيلدى اقتاۋ» ۇيىمىنا جىبەرىلگەن. وسىدان سوڭ قۇقىق قورعاۋشىلار توي كورتەجىندەگى بارلىق كولىكتەردىڭ يەسىن انىقتاپ، شارا قولدانعان.

«اكىمشىلىك قۇقىق بۇزۋشىلىق كودەكسىنىڭ 601- بابىنىڭ 1-ءبولىمى بويىنشا حاتتامالار تولتىرىلدى. بارلىعىنا شارا كورىلدى. قازىرگى تاڭدا سول جەردە بولعان جول پاترۋلدىك پوليتسياسى قىزمەتكەرىنە تەكسەرۋ جۇرگىزىلىپ جاتىر»، - دەيدى ماڭعىستاۋ وبلىستىق ءى ءى د باسپا ءسوز قىزمەتىنىڭ جەتەكشىسى ءاليا شەرماعامبەتوۆا.

ايتا كەتەيىك، اقتاۋدا وسىعان ۇقساس جاعداي بۇرىن دا بولعان. جول پاترۋلدىك پوليتسەيلەرى وسىدان ءبىر جىل بۇرىن قىزمەتتىك كولىكتەرىمەن توي كورتەجىن الىپ جۇرگەن جازبا عالامتوردى جاۋلادى.

جول جونەكەي ەرەجەنى بۇزعان توي كولىكتەرىن وزگە ساقشىلار توقتاتپاق بولعاندا، توي كولىكتەرىن الىپ جۇرگەن پوليتسەي دورەكىلىك كورسەتىپ، كەدەرگى جاساماۋدى بۇيىرعان.

 وسى جاعدايدان سوڭ، ماڭعىستاۋ وبلىستىق ىشكى ىستەر دەپارتامەنتى قىزمەتتىك تەكسەرۋ جۇرگىزدى. كورتەجدى الىپ جۇرگەن پوليتسەي جۇمىستان بوساتىلعان ەدى.
nur.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى