بۇگىن استانادا ەرەكشە بوكس كەشى وتەدى:«استانا ارلاندارى» مەن«كۋبا قابىلاندارى» شايقاسادى

ەلوردا تورىندەگى «داۋلەت» سپورت كەشەنىندە دۇنيەجۇزىلىك بوكس سەرياسىنىڭ (WSB) اقتىق سايىسىنا جولداما العان قوس كوماندا «استانا ارلاندارى» مەن «كۋبا قابىلاندارى» چەمپيوندىق اتاققا تالاسادى.

ەكى كوماندا دا بيىلعى ماۋسىمدا الدارىنا قارا سالماي، توپتىق تۋرنيردە جەكە-دارا كوش باستادى. جارتىلاي فينالدا دا ءوز قارسىلاستارىن ويسىراتا ۇتقان ولار باس جۇلدە ءۇشىن تالاسۋ قۇقىعىنا يە بولدى. ەندى ەكى مىقتىنىڭ ءوزارا ناعىز چەمپيوندى انىقتايتىن كەزى دە كەلىپ جەتتى. وسى ورايدا، دۇنيەجۇزىلىك بوكس سەرياسىنىڭ (WSB) جوباسىندا قانداي كوماندالار ونەر كورسەتكەنى تۋرالى قىسقاشا توقتالىپ وتسەك.

بيىلعى بەسىنشى ماۋسىمدا جالپى 16 كوماندا سىنعا ءتۇسىپ ءوز باقتارىن سىنادى. وسى جىلدى قوسقاندا، ياعني بەس ماۋسىمدا WSB تۋى استىندا بارلىعى 24 كوماندا باق سىنادى. ال ءبىرىنشى ماۋسىمدا چەمپيون اتانعان فرانتسيا كلۋبى بۇل جوبادا ەكى-اق ماۋسىم «جۇدىرىقتاستى». «Paris United» العاشقى ماۋسىمدا چەمپيون بولىپ، ەكىنشى ماۋسىمدا شيرەك فينالمەن شەكتەلىپ، ءۇشىنشى ماۋسىمدا كوزدەن تاسا بولدى.

سونداي- اق تۇركيا كومانداسى دا بۇكىل الەمدىك بوكس سەرياسىندا ەكى ماۋسىم ونەر كورسەتتى. ال كورەيا، ءۇندىستان جانە تايلاند كلۋبتارى ءبىر ماۋسىم ونەر كورسەتتى دە ارى قاراي جوق بولىپ كەتتى. گەرمانيا كلۋبى دا ءۇش ماۋسىم عانا ونەر كورسەتىپ، شارشى الاڭمەن قوش ايتىستى. ءبىز بۇل دەرەكتەردى بەكەردەن بەكەر ايتىپ وتىرعان جوقپىز. سەبەبى، ءبىزدىڭ «استانا ارلاندارى» - WSB جوباسىنا تۇراقتى تۇردە بەس جىل قاتارىنان قاتىسىپ كەلە جاتقان التى كوماندانىڭ ءبىرى ەكەنىن ەرەكشە اتاپ وتكىمىز كەلەدى.

«ارلانداردىڭ» جۇلدەسىز قالعان جىلى جوق

 قازاق بوكس مەكتەبىنىڭ تامىرى تەرەڭدە جاتقانىن «استانا ارلاندارى» الەمگە جىل سايىن دالەلدەپ كەلەدى. وسىعان دەيىن WSB جوباسىندا بەس جىل ونەر كورسەتكەن بوكسشىلارىمىز جىل سايىن جۇلدەسىز قالىپ كورگەن ەمەس. ەلوردامىزدا قۇرىلعان «ارلاندارىمىز» 2013 -جىلى WSB دوداسىنىڭ چەمپيونى اتاندى.

ال 2011 -جىلى فينالدا فرانتسيا بوكسشىلارىنا ءبىر عانا ەسەپ ايىرماشىلىعىمەن ەسە جىبەرىپ، كۇمىس مەدالدى قانجىعاسىنا بايلاسا، 2012 جانە 2014 -جىلدارى ۇزدىك ۇشتىكتى تۇيىندەپ، قولا مەدالعا قول جەتكىزدى. مىنە، بيىل تاعى فينالعا شىعىپ تۇرعانىمىزدى ەسكەرسەك، بەس جىل بويى جەرلەستەرىمىز جۇلدەسىز قالعان جوق. دۇنيەجۇزىلىك بوكس سەرياسى جوباسىندا جەڭىپ العان جۇلدەلەرى جاعىنان ەشبىر كوماندا قازاقستاندىق «استانا ارلاندارىنىڭ» شالىمىنا جەتپەيدى.

جالپى بيىلعى ماۋسىمدا «ارلاندار» جانكۇيەرلەرىنىڭ ءۇمىتىن سەلگە كەتىرگەن جوق. قاتارىنان 13 جەكپە- جەكتە قارسىلاس شاق كەلتىرمەي، مەرەيىمىزدى اسىرعان جەرلەستەرىمىز تەك توپتىق ءتۋرنيردىڭ سوڭعى سايىسىندا عانا يتاليا بوكسشىلارىنان 2:3 ەسەبىمەن ۇتىلىپ قالدى.

الايدا، بۇل ءبىر جەڭىلىس «ارلاندارىمىزدىڭ» ءوز توبىندا توپ باستاۋىنا ەش كەدەرگى بولا قويعان جوق. سەبەبى، جەرلەستەرىمىز العا قويعان جوسپارىن الدىن الا ورىنداپ، پلەي- وفف ماسەلەسىن كۇنى بۇرىن شەشىپ تاستاعان بولاتىن. سول سەبەپتى دە ءبىر ساتسىزدىك بىزگە كەرى اسەرىن تيگىزە قويعان جوق. سونداي-اق، بۇل جەڭىلىس ءبىزدىڭ بوكسشىلاردىڭ السىزدىگىن دە كورسەتە المادى. ويلاي دەيتىنىمىز جارتىلاي فينالدا ءبىزدىڭ جىگىتتەر رەسەي قۇراماسىن تاس- تالقان ەتتى. ەسەپ: - 9:1.

«كۋبا قابىلاندارى» وسال ەمەس

ەرتەرەكتە «بوكس» دەسە، كۋبالىقتار بىردەن ەسىمىزگە ورالاتىن. سەبەبى، كۋبالىقتار الەمدىك ارەنادا بوكستاعى جەتىستىكتەرىمەن ماقتانا الاتىن ەل. ءبىز «كۋبا قابىلاندارى» وسال ەمەس ەكەنىن جاقسى بىلەمىز.

وتكەن جىلعى ماۋسىمعا «كۋبا قابىلاندارى» اتالمىش جوباعا تۇڭعىش قاتىسىپ، سوعان قاراماستان بىردەن چەمپيون اتاندى. ال، بيىلعى ماۋسىمدا دا «قابىلاندارعا» ءوز توبىندا قارسى تۇرار بىردە- ءبىر كوماندا بولمادى. كۋبالىقتار الدىنا كەلگەنىن «جايپاپ» قانا وتىردى. ناقتىراق ايتساق، WSB دوداسىنداعى بىردە- ءبىر كوماندا بوستاندىق ارالى وكىلدەرىنە قارسى تۇرا المادى. جارتىلاي فينالدا كۋبالىقتار مەكسيكا بوكسشىلارىن سەڭ سوققانداي ەتىپ، 10:0 ەسەبىمەن ويسىراتا ۇتتى.

مىنە، جوعارىداعى اتاپ وتكەن ناتيجەگە قاراپ- اق «كۋبا قابىلاندارىنىڭ» وزگە كوماندالاردان كوشى الدەقايدا ىلگەرى، الەۋەتى الدەقايدا زور ەكەنىن اڭعارۋعا بولادى.

ال، «ارلاندارىمىز» تۋرالى جوعارىدا اتاپ وتتىك. ەندى قوس مىقتىنىڭ جولى تۇيىسكەلى وتىر. بۇل ءبىر «جان الىسىپ، جان بەرىسكەن» كەرەمەت باسەكە بولعالى تۇرعانى انىق. جەرلەستەرىمىز ءوز شارشى الاڭىندا جەرگىلىكتى جانكۇيەرلەردىڭ بەتىن جەرگە قاراتپايدى دەگەن ۇمىتتەمىز.

كۋبادان استاناعا كىمدەر كەلدى؟

جاسىراتىنى جوق، استاناعا كەلگەن قارسىلاستارىمىزدىڭ وسالى جوق. ولاردىڭ ساپىندا كىلەڭ ىعاي مەن سىعايلار ونەر كورسەتپەك. 49 كەلىدەگى يوانيس وسكار پەرەس، 52 كەلىدەگى يوسۆاني ۆەيتيا سوتو، 75 كەلىدەگى ارلەن لوپەس كاردونا جانە اسا اۋىر سالماقتاعى لەنەر ەنيس پەرو يۋستيس سىندى بوكسشىلار الەم بىرىنشىلىكتەرىندە، سونىمەن قاتار پان- امەريكا ويىندارىندا جۇلدەمەن ورالىپ جۇرگەن مىقتىلار ەكەن.

ال، 56 كەلى سالماقتا روبەيسي راميرەس كارراسانا بار. ول 2012 -جىلعى لوندون وليمپياداسىنىڭ چەمپيونى. 60 كەلى سالماقتا وليمپيادا ويىندارىنىڭ قولا جۇلدەگەرى، الەمنىڭ ەكى دۇركىن چەمپيونى لازارو الۆارەس تە ءوز ەلىنىڭ نامىسىن قورعاۋعا الىستان ات ارىتىپ جەتىپتى. 64 كەلى سالماقتا الەم چەمپيوناتىنىڭ ەكى دۇركىن كۇمىس جۇلدەگەرى، وليمپيادا ويىندارىنىڭ قولا جۇلدەگەرى ياسنيەل تولەدو لوپەس تە بار.

 ال 69 كەلى سالماق دارەجەسىندەگى جۇدىرىقتاسۋعا كەلگەن رونيەل يگلەسياس سوتولونگونىڭ اتى اڭىزعا اينالعان بوكسشى دەسەك ارتىق ايتقاندىق ەمەس. ول - لوندون وليمپياداسىنىڭ جەڭىمپازى، بەيجىڭ وليمپياداسىنىڭ قولا جۇلدەگەرى جانە 2009 -جىلعى الەم چەمپيونى ەكەنىن جاقسى بىلەمىز. 81 كەلى سالماقتا ونەر كورسەتەتىن حۋليو سەزار دە لا كرۋز دا وسال بوكسشى ەمەس. ول ەكى دۇركىن الەم چەمپيونى. 91 كەلىدە باق سىنايتىن ەريسلاندي ساۆون دا مىقتى بوكسشىلاردىڭ ءبىرى ەكەنىن بوكس سۇيەر قاۋىم جاقسى بىلەدى. مىنە، «كۋبا قابىلاندارىنىڭ» قۇرامى وسىنداي ەڭ مىقتى بوكسشىلاردان جاساقتالعان. جاسىراتىنى جوق، «استانا ارلاندارىنىڭ» نەگىزگى قۇرامىندا ونەر كورسەتىپ جۇرگەن ءبىزدىڭ جىگىتتەرگە جوعارىداعى اتاقتاردىڭ بىردە-ءبىرى باعىنعان جوق.

 مىقتىنىڭ مىقتىلىعىن ايتۋ ابەستىك ەمەس. ءبىراق، ءبىزدىڭ جىگىتتەر ەشكىمنىڭ اتاق- داڭقىنان سەسكەنەيىن دەپ تۇرعان جوق. ەڭ باستىسى بيىلعى جىلدىڭ شەشۋشى دوداسى ءوز ەلىمىزدە وتكەلى وتىر. «ارلانداردىڭ» باستى ماقساتى - بۇكىلالەمدىك بوكس سەرياسىنىڭ 2 دۇركىن چەمپيونى اتانۋ. سوندىقتان جەرلەستەرىمىز جەڭىستى وڭاي بەرە قويماسى انىق.

كىم، كىممەن جۇدىرىقتاسادى؟

ءبىرىنشى كۇنى

49 كەلى:

تەمىرتاس ءجۇسىپوۆ (قوسالقى قۇرامدا - ماردان بەرىكبايەۆ) - يوانيس وسكار ارگيلاگوس پەرەس؛

56 كەلى:

قايرات ەراليەۆ (مەيىربولات تويىتوۆ) - ەندي كرۋز گومەز (روبەيسي ەلوي راميرەس)؛

64 كەلى:

سامات باشەنوۆ (اسحات ءۋاليحانوۆ) - ياسنيەر تولەدو لوپەس؛

75 كەلى:

مەيىرىم نۇرسۇلتانوۆ (ەرىك ءالجانوۆ) - ارلەن لوپەس كاردونا؛

91 كەلى:

ۆاسيليي ليەۆيت (مۇحامەدجان ەركىن) - ەريسلاندي ساۆون كوتيللا

ەكىنشى كۇنى

52 كەلى:

ولجاس ساتتىبايەۆ (ميراس جاقىپوۆ) - يوسۆاني ۆەيتيا سوتو

60 كەلى:

زاكىر سافيۋللين (ەرجان مۇسافيروۆ) - لاسارو حورحە الۆارەس ەسترادا

69 كەلى:

اسلانبەك شىمبەرگەنوۆ (ماديار اشكەيەۆ) - رونەل يگلەسياس سوتولونگو

81-كەلى:

نۇرداۋلەت جارمانوۆ ء(الي احمەدوۆ) - حۋليو سەسار لا كرۋس پەراسا

 91+ كەلى:

يۆان دىچكو (فيليپپ حرگوۆيچ) - يوحاندي تويراك ورتەگا.

فينالدىق جەكپە- جەك 20-21 كۇندەرى استانانىڭ «داۋلەت» سپورت كەشەنىندە ساعات 17.00 دە باستالادى. ءبىرىنشى كۇنى بوكسشىلار 49, 56, 64, 75 جانە 91 كەلى سالماقتا جۇدىرىقتاسسا، كەلەسى كۇنى قالعان سالماق (52, 60, 69, 81, +91) دارەجەلەرىندە جەڭىمپازداردى انىقتايدى. ەگەر كەزدەسۋ تەڭ اياقتالار بولسا، وندا جەڭىمپاز كوماندا 56 كەلى سالماق دارەجەسىندە وتەتىن قوسىمشا جەكپە- جەكتە انىقتالادى.

كەرەك دەرەك

تاريحقا كوز جۇگىرتەر بولساق، كۋبا بوكسشىلارى وليمپيادا ويىندارىنىڭ تاريحىندا ەڭ كوپ مەدال العان ەكىنشى مەملەكەت (ا ق ش- تان كەيىن). 1896-جىلدان بەرى ۇيىمداستىرىلىپ كەلە جاتقان وليمپيالىق ويىنداردا كۋبالىقتار 34 التىن، 19 كۇمىس، 14 قولا مەدال جەڭىپ الدى. بارلىعى - 67 مەدال. 1992-جىلى بارسەلونادا وتكەن وليمپيادا ويىندارىندا كۋبانىڭ 9 بوكسشىسى فينالعا شىعىپ، سونىڭ 7 ەۋى باس جۇلدەگە يە بولدى.

 الەمدە وليمپيادا ويىندارىندا ءۇش دۇركىن چەمپيون اتانعان ءۇش بوكسشى بار. سونىڭ ەكەۋى كۋبا ەلىنىڭ وكىلى - تەوفيلو ستيۆەنسون مەن فەليكس ساۆون. ت. ستيۆەنسون 1972, 1976 جانە 1980-جىلعى وليمپيادا ويىندارىنىڭ چەمپيونى اتانسا، فەليكس ساۆون 1992, 1996, 2000-جىلعى وليمپيادادا جەڭىمپازى.

 بوكستان تۇڭعىش الەم چەمپيوناتى 1974-جىلى كۋبا استاناسى گاۆانا قالاسىندا ۇيىمداستىرىلدى.

 وليمپيادا تاريحىندا ەڭ كوپ مەدالدى اقش قۇراماسى يەلەنگەن بولسا، الەم چەمپيوناتىنىڭ تاريحىندا كۋبا بوكسشىلارى كوش باستاپ تۇر. كۋبالىقتار وسىعان دەيىن وتكەن الەم چەمپيوناتىندا جالپى 122 مەدالگە يە بولدى. ونىڭ 67 سى التىن، 31 ى كۇمىس، 24 ى قولا مەدال.

 الەم چەمپيوناتىندا 6 دۇركىن الەم چەمپيونى اتانعان كۋبالىق فەليكس ساۆون عانا. ال، حۋان ەرناندەس سەررا الەم چەمپيوناتىنىڭ ءتورت دۇركىن جەڭىمپازى اتانعان بوكسشى. بۇدان بولەك، كۋبالىقتاردىڭ اراسىندا تەوفيلو ستيۆەنسون، روبەرتو بالادو، ادولفو ورتو، ماريو كيندەلان، وبليانەر سوليس فونتە سىندى الەمنىڭ 3 دۇركىن چەمپيوندارى بار.

1993-جىلعى الەم چەمپيوناتىنىڭ قورىتىندىسى بويىنشا كۋبا قۇراماسى 11 مەدال جەڭىپ الدى. ونىڭ 8 ى التىن، 3 ەۋى كۇمىس مەدال.

دۇنيەجۇزىلىك بوكس سەرياسىنىڭ (WSB) فينالىندا كۋبا قۇراماسىنان ريو- دە- جانەيرو وليمپياداسىنا ليتسەنزياسى بار التى بوكسشىسى قاتىسادى. ولار - يوسۆاني ۆەيتيا، لاسارو حورحە الۆارەس ەسترادا، ياسنيەر تولەدو لوپەس، ارلەن لوپەس كاردونا، حۋليو سەسار لا كرۋس پەراسا جانە ەريسلاندي ساۆون كوتيللا.

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى