قىزعالداقتار ەلىنەن ۇيرەنەرىمىز كوپ
بۇل جاڭالىقتى جانكۇيەرلەر جىلى قابىلدادى.
سەبەبى سپورتتىڭ بۇل ءتۇرى بويىنشا گوللانديا الەمدەگى كوشباسشى مەملەكەتتەر قاتارىندا. ولاي بولسا، ءبىزدىڭ ولاردان ۇيرەنەرىمىز كوپ. الىسقا بارماي-اق، سوڭعى بەس جىلداعى ناتيجەلەرگە كوز جۇگىرسەك، ءبىراز نارسەگە كوز جەتكىزەمىز.
نەگىزى، شورت-ترەكتەن الەم چەمپيوناتتارىندا بارلىعى 12 مەدالدار جيىنتىعى ساراپقا سالىنادى. 2011-جىلى شەففيلدتە نەبارى جەتى مەملەكەتتىڭ وكىلدەرىنە جۇلدە بۇيىرسا، سونىڭ ءبىرىن گوللانديا قۇراماسى يەلەندى. ولار ايەلدەردىڭ ەستافەتالىق سايىسىندا قىتايدى العا جىبەرىپ، كۇمىس مەدالدى مويىندارىنا ءىلدى.
2012-جىلى شاڭحايدا وتكەن جارىستا قىزعالداقتار ەلىنىڭ وكىلدەرى سول كورسەتكىشتى قايتالادى. بۇل جولى ەرلەر كومانداسى ەستافەتادا ەرلەدى. تەك قانا كانادادان قالىپ قويعان ولار كۇمىس جۇلدەگەر اتاندى.
2013-جىلى دەبرەتسەندە گوللانديالىقتار 2 كۇمىس جانە 3 قولا مەدالدى قورجىنعا سالدى. ۆەنگرياداعى سايىستا شينكي كنەگت (1000 مەتر، ەرلەر) پەن يورين تەر مورس (1000 مەتر، ايەلدەر) مارە سىزىعىن ەكىنشى بولىپ قيىپ وتسە، فرەك ۆان دەر ۆارت (500 مەتر، ەرلەر)، يورين تەر مورس (3000 مەتر، ايەلدەر) جانە ەرلەردىڭ ەستافەتاسىندا ءۇشىنشى ساتىعا تابان تىرەدى.
2014-جىلى مونرەالدا گوللانديا قۇراماسى 1 التىن جانە 1 كۇمىس مەدالدى يەلەندى. ەكى رەتىندە دە بۇل كوماندانىڭ ەستافەتالىق باسەكەدە باعى جاندى. جوعارىدا اتالعان ءتورت جارىستىڭ بارلىعىنىڭ جالپى ەسەبىندە ولار 4-7-ورىندارعا تۇراقتادى.
2015-جىلى ماسكەۋدە وتكەن دودادا ايتۋلى مەملەكەتتىڭ ورەندەرى ءۇشىنشى تۇعىرعا كوتەرىلدى. رەسەي استاناسىندا ولار 2 التىن، 1 كۇمىس جانە 1 قولا مەدالدى قانجىعالارىنا بايلادى. سول جارىستا شينكي كنەگتىڭ جالعىز ءوزى ءۇش رەت جەڭىس تۇعىرىنا كوتەرىلدى. 25 جاستاعى ساقا سپورتشى 3000 مەترگە جۇگىرۋدە جانە كوپ سايىستا الدىنا جان سالماسا، 1500 مەترلىك باسەكەدە ەكىنشى ورىندى يەلەندى. تاعى ءبىر جۇلدەنى ەرلەر ەستافەتالىق سايىستا ەنشىلەدى.
الەم چەمپيوناتتارىندا گوللانديا شورت-ترەكشىلەرىنە بارلىعى 7 التىن، 12 كۇمىس جانە 8 قولا بۇيىرعان ەكەن. وسى كورسەتكىش جاعىنان ولار دۇنيەجۇزى بويىنشا 6-ورىندا تۇر. الدا تەك وڭتۇستىك كورەيا (84 التىن+67 كۇمىس+56 قولا)، كانادا (59+68+58)، قىتاي (58+40+38) ، ا ق ش (16+16+30) جانە جاپونيا (13+19+20) قۇرامالارى.
2010-جىلى ۆانكۋۆەر وليمپياداسىنان گوللانديالىقتار قۇرالاقان ورالسا، 2014-جىلى شينكي كنەگ ءوز كومانداسىنا قولا مەدالدى سىيعا تارتتى. عالامدىق ويىنداردا نەبارى 8 مەدال جيىنتىعى ساراپقا سالىناتىنىن ەستەن شىعارماعان ءجون. مىنە، وسى كورسەتكىشتەرگە قاراپ-اق، قىزعالداقتار ەلىنىڭ وكىلدەرى قانداي ازۋلى ەكەنىن اڭعارۋعا بولادى.
وسى ورايدا تاعى ءبىر قىزىقتى جايتقا توقتالماي كەتۋگە بولمايدى. گوللانديا قۇراماسى ساپىندا 2013-جىلعى الەم چەمپيوناتىندا كۇمىس مەدالدى موينىنا ىلگەن اتاقتى شورت-ترەك شەبەرى يورين تەر مورس 2014-جىلى سوچيدە الاۋى تۇتانعان قىسقى وليمپيادا ويىندارىندا كونكيشىلەر سايىسىندا دا باق سىناۋعا تاۋەكەل ەتتى. «شىن مىقتىعا تۇساۋ جوق» دەگەن راس ەكەن-اۋ. كونكيشىلەردىڭ جارىسىندا دا جاسىنداي جارقىلداعان 25 جاستاعى سۇلۋ ەكى رەت التىننان القا تاعىنىپ، سوچيدە ايدى اسپانعا شىعاردى.
ارينە، وسىنداي مىقتى كوماندامەن بىرلەسكەن وقۋ-جاتتىعۋ جيىنىن وتكىزۋ قازاقستاننىڭ شورت-ترەكشىلەرى ءۇشىن وتە پايدالى ەكەنى ايتپاسا دا تۇسىنىكتى. بۇل رەتتە ءبىز وليمپيادا ويىندارى مەن الەم چەمپيوناتتارىندا وتانداستارىمىزعا وسى كۇنگە دەيىن بىردە-ءبىر جۇلدە بۇيىرماعانىن ايتا كەتۋگە ءتيىسپىز. ءبىراق ءبىزدىڭ كوماندانى وسال دەپ ايتۋعا دا ەشكىمنىڭ اۋزى بارمايدى. ويتكەنى ءتۇرلى حالىقارالىق جارىستاردا جەرلەستەرىمىز تابىستى ونەر كورسەتىپ ءجۇر.
قۇرلىقتىق دودالاردا سان مارتە جەڭىس تۇعىرىنا كوتەرىلدىك. ءبىر قۋانارلىعى، كوماندانىڭ دەنى - ءوز قانداستارىمىز. وسى ورايدا، وتاندىق شورت-ترەكتىڭ دامۋىنا ولشەۋسىز ەڭبەك ءسىڭىرىپ، قازاقتىڭ ۇلدارىن سپورتتىڭ وسى تۇرىنە مىقتاپ باۋلىپ جۇرگەن بىلىكتى مامان مادىعالي قارسىبەكوۆكە ايتار العىسىمىز شەكسىز.
2014-جىلى سوچيدەگى وليمپيادا ويىندارىندا قۇرامىندا ابزال اجعاليەۆ، ايدار بەكجانوۆ، دەنيس نيكيشا، نۇربەرگەن جۇماعازيەۆ سىندى سايىپقىراندارى بار قازاقستان كومانداسى ەستافەتالىق سايىستا بەسىنشى ورىندى يەلەندى. ءبىزدىڭ ورەندەر تەك رەسەي، ا ، قىتاي جانە گوللانديا قۇرامالارىنان قالىپ قويدى. قالعان مىقتىلار شاڭىمىزعا ىلەسە المادى. سول كەزدە تورتكۇل دۇنيە جانكۇيەرلەرى قازاقتارعا «سپورتتىڭ بۇل ءتۇرىن ولار قاشان مەڭگەرىپ ۇلگەرگەن» دەپ تامسانا قارادى.
ءيا، بىلە بىلگەن ادام ءۇشىن وليمپيادا ويىندارىندا بەسىنشى ورىندى يەلەنۋدىڭ ءوزى - وتە تاماشا كورسەتكىش. وسىدان-اق قازاقستاننىڭ شورت-ترەك شەبەرلەرىنىڭ الەۋەتى زور ەكەنىن اڭعارۋعا بولادى. ءبىزدىڭ جىگىتتەردىڭ جەڭىستى كۇندەرى الدا ەكەنىنە كۇمان كەلتىرمەيمىز. ولاي بولسا، تىنىمسىز ەڭبەك ەتۋ قاجەت. الدا وتانداستارىمىزدى كوپتەگەن بايراقتى باسەكەلەر كۇتىپ تۇر.
اتاپ ايتساق، 2016-جىلى سەۋلدە جانە 2017-جىلى روتتەردامدا الەم چەمپيوناتتارىنىڭ جالاۋى جەلبىرەيدى. 2018-جىلى وڭتۇستىك كورەيانىڭ پحەنچحان قالاسىندا وليمپيادا ويىندارىنىڭ الاۋى تۇتانادى. وسى جارىستارعا ساقاداي-ساي ازىرلىكپەن بارساق، مول تابىسقا قول جەتكىزۋگە بولادى. سوندىقتان دا وسى سپورت ءتۇرى بويىنشا وتەتىن سايىستاردا وزدەرىنىڭ مىقتىلىعىن تۇبەگەيلى مويىنداتقان گوللانديا سىندى مەملەكەتتەن قازاقتار كوپ نارسە ۇيرەنۋى كەرەك.
- شورت- ترەكتەن گوللانديانىڭ ەرلەر قۇراماسى الەمدەگى ماڭدايالدى كوماندا ەكەنى داۋسىز. 2010-جىلدان بەرى ولاردى بىلىكتى باپكەر دجارۋن وتتەر باپتاپ كەلەدى. سول ارالىقتا اتالمىش مەملەكەتتىڭ وكىلدەرى تولاعاي تابىستارعا قول جەتكىزدى. مەن 1994-جىلدان بەرى وتتەر مىرزامەن دوستىق قارىم-قاتىناستامىن. ۇستىمىزدەگى جىلدىڭ اقپان ايىندا ەكەۋمىز وسى ماسەلەگە بايلانىستى ءبىراز وي ءبولىسىپ، ءوزارا اڭگىمە قوزعادىق.
اقىرىندا ورتاق مامىلەگە كەلىپ، ايتۋلى مامان 2018-جىلعى قىسقى وليمپيادا ويىندارىنا دەيىن ءبىزدىڭ كومانداعا كومەكتەسۋگە ءوز كەلىسىمىن بەردى. بۇل باستاماعا سول ەلدىڭ ۇلتتىق فەدەراتسياسى قارسىلىق بىلدىرگەن جوق. ءبىز جاقتان وسى يدەيانى مادەنيەت جانە سپورت ۆيتسە-ءمينيسترى ساكەن مۇسايبەكوۆ پەن سپورت كوميتەتىنىڭ ءتوراعاسى ەلسيار قاناعاتوۆ قولدادى، - دەيدى قازاقستان قۇراماسىنىڭ باس باپكەرى مادىعالي قارسىبەكوۆ.
قازىرگى كەزدە قىزعالداقتار ەلىندەگى ەنسحەدە قالاسىنىڭ ماڭىندا نۇربەرگەن جۇماعازيەۆ، ابزال اجعاليەۆ، دەنيس نيكيشا جانە ميرسايد جاقسىبايەۆ سىندى ورەندەرىمىز ساقا سپورتشىلارىمەن بىرگە تەر توگۋدە. 11 ماۋسىمدا باستالعان بۇل وقۋ-جاتتىعۋ جيىنى ءالى ءبىراز ۋاقىتقا سوزىلادى. مايتالمان مامان دجارۋن وتتەردىڭ ءوزى بار بىلگەنىن ءبىزدىڭ ورەندەرگە تاپتىشتەپ تۇرىپ ۇيرەتۋدە. ەڭ باستىسى، بۇل شارا قازاقستاندىق شورت-ترەك شەبەرلەرى ءۇشىن ۇلكەن تاجىريبە مەكتەبى بولاتىنى داۋسىز.
عالىم سۇلەيمەن
«ايقىن»
