تۇركيادا قانداسىمىز پارلامەنت سايلاۋىنا نە ءۇشىن تۇسكەنىن اڭگىمەلەپ بەردى
رەشيدە يۋكسەل ستامبۋل قالاسىنىڭ زەيتينبۋرنۋ اۋدانىندا دۇنيەگە كەلگەن. 1987-جىلى يسلام ۋنيۆەرسيتەتىنىڭ مەديتسينا فاكۋلتەتىن ءبىتىرىپ، 2014-جىلعا دەيىن دارىگەر بولىپ قىزمەت ىستەگەن. كەيىن زەينەتكە شىققان رەشيدە حانىم بيلىك باسىنداعى «ادىلەت پەن دامۋ» پارتياسىنىڭ قاتارىنا ءوتىپ، قوعامدىق قىزمەت ىستەي باستادى. جۋىردا پارلامەنت سايلاۋىنا ول وسى پارتيانىڭ اتىنان ءتۇستى.
«مەن قازىر ەلۋگە كەلدىم. 21 جىلىمدى دارىگەرلىك سالاعا ارناپپىن. 1987-جىلى وقۋدى بىتىرە سالىسىمەن قىزمەتكە كىردىم. سودان 2014-جىلعا دەيىن دارىگەر بولىپ قىزمەت ىستەدىم. تۇركيادا تۇراتىن قازاقتاردىڭ اراسىنان شىققان تۇڭعىش ايەل دارىگەرىمىن. ۇيدە جەتى بالا بولىپ وستىك. سونىڭ بەسەۋى جوعارعى ءبىلىم الىپپىز. جالپى ەرتەرەكتە تۇركياداعى قازاقتاردىڭ ءبىلىم الۋى نەكەن ساياق كەزىگەتىن. ءبىزدىڭ ۇيدە كەنجە ءىنىم دە تۇركياداعى قازاقتار اراسىنان شىققان تۇڭعىش اسكەري دارىگەر. 2014-جىلى زەينەتكە شىققاننان كەيىن، پارتيا قاتارىنا ەنىپ، ساياساتقا ارالاسقىم كەلدى. ءسويتىپ «اق پارتيانىڭ» («ادىلەت پەن دامۋ» - رەد.) قۇرامىنداعى ايەلدەر كەڭەسىنىڭ مۇشەسى بولىپ تىركەلدىم»، - دەيدى ول.
رەشيدە يۋكسەلدىڭ ايتۋىنشا مەديتسينادا جۇرگەنىندە ساياساتقا كوپ نازار اۋدارماعان. ءبىراق كەيبىر ازاماتتىق قوعامداردا جۇمىس ىستەگەن. سول سەبەپتى زەينەتكە شىققاننان كەيىن پارتيا قۇرامىنا كىرگەن. ونداعى ماقساتى - بىرىنشىدەن، تۇركياداعى باسقا پارتيالاردان قانداستاردىڭ جوقتىعىن تولتىرۋ؛ ەكىنشىدەن، تۇركيادا تۇرىپ جاتقان قازاقتاردىڭ «اق پارتياعا» دەگەن سەنىمىن نىعايتۋ ەكەن.
سونىمەن قاتار ول پارتيا اتىنان سايلاۋعا تۇسكەن وزگە ايەلدەر سەكىلدى سايلاۋدان وتپەي قالعانىن ايتادى. ءبىراق سوعان قاراماستان بەلسەندى جۇمىس ىستەي بەرەتىنىن جەتكىزدى.
رەشيدە تۇركيادا تۇراتىن قازاقتاردىڭ ساياسي بەلسەندىلىگى تومەن ەكەنىن مويىندادى. سەبەبى تۇركياداعى قازاق جاستارىنىڭ وقۋعا دەگەن تالپىنىسى ەندى كۇشەيىپ كەلەدى ەكەن.
«بۇرىن سوندا تۇراتىن قازاقتار بالالارىن وقىتپايتىن. قازاقتاردىڭ بارلىعى تەك ساۋدامەن اينالىساتىن ەدى. ويتكەنى ول كەزدە «اقشانىڭ كوزى - ساۋدادا» دەپ ويلايتىن»، - دەيدى رەشيدە.
سونداي-اق، ول تۇركياداعى قازاق جاستارى نەگە قازاق ءتىلىن بىلمەيتىنىن دە اتاپ ءوتتى.
«بۇل جاقتاعى قازاق ءتىلىن بىلەتىن ۇلكەن كىسىلەردىڭ بارلىعى دۇنيەدەن ءوتىپ كەتتى. ال ءومىر ءسۇرىپ جۇرگەن ورتامىزدا بارلىعى تۇرىكشە سويلەيدى. سول سەبەپتى بۇل جاقتاعى جاستاردىڭ ءتىل ءبىلۋى قيىن. مىسالى، مەن ءوزىم وسىدان ون جىل بۇرىن اكە-شەشەمنىڭ كوزى تىرىسىندە قازاقشا جاقسى بىلەتىنمىن. ويتكەنى ول كىسىلەرمەن تەك قازاق تىلىندە سويلەسەتىن ەدىم. ءتىپتى تۇرعىت ءوزالدىڭ تۇسىندا قازاقستاننىڭ دەنساۋلىق ساقتاۋ ءمينيسترى تۇركياعا ساپارلاپ كەلگەندە اۋدارماشى دا بولعانمىن. ۇلكەن كىسىلەردىڭ كوزى كەتكەننەن كەيىن مەنىڭ دە قازاقشام ناشارلاپ كەتتى. قازاقستانعا ءجيى بارامىن. سول كەزدە اۋىل بالالارىمەن كوپ سويلەسەم. ءتىپتى ەكى-ءۇش كۇننىڭ ىشىندە بالالارمەن ەركىن تىلدەسە الاتىن دەڭگەيگە جەتەم. ياعني قانىمدا بار نارسەنى تەز مەڭگەرىپ الامىن»، - دەدى ول.
ايەل ءوزىنىڭ جۇبايى فەتحي احمەت يۋكسەل ستامبۋل ۋنيۆەرسيتەتىندە گەوفيزيك بولىپ ءدارىس بەرەتىنىن ايتتى. ارالارىندا ۇرپاق بولماعاننان كەيىن، سول سەبەپتى قولىنان كەلگەن قىزمەتىن حالىققا ارنايمىن دەيدى. تۇركياداعى قازاق جاستارىنا ۇلگى-ونەگە بولسىن، ولار دا بولاشاقتا بيىككە ۇمتىلسىن دەگەن نيەتپەن ارەكەت جاساپ جۇرگەنىن دە اتاپ ءوتتى. ايتپەسە، ساياساتقا ۇمتىلىپ، سول ارقىلى پايدا تابايىن دەپ جۇرمەگەنىن، ويتكەنى وسى كۇنگە دەيىن ءبىر باسىنا جەتەتىندەي بايلىعى بارىن دا جەتكىزدى.
«ازاتتىق»
