استانادا ەرلى-زايىپتىلار جاڭا تۋعان ءسابيىن كولىككە ايىرباستاماق بولعان
ءسويتىپ، ايەل ءوزىنىڭ جۇكتى ەكەنىن بىلگەن كەزدە عالامتورداعى سايتتا ءالى دۇنيەگە كەلمەگەن بالاسىن 2004-2008 -جىلدارى شىققان اۆتوكولىككە ايىرباستايتىنى تۋرالى حابارلاندىرۋ قالدىرادى، دەپ حابارلايدى استانا قالاسىنىڭ پروكۋراتۋراسىنان.
بۇل حابارلاندىرۋدى كورىپ جانى تۇرشىككەن ا. ەسىمدى ازاماتشا بالانى تاۋار رەتىندە ساتقىسى كەلەتىن ايەلدىڭ ادامگەرشىلىككە جاتپايتىن ارەكەتى جايلى پوليتسيا ورگاندارىنا حابارلايدى. كەيىن ازاماتشا ا. پوليتسيا قىزمەتكەرىمەن بىرگە ەرىپ بارىپ، ەرلى- زايىپتى سەكىلدى جوعارىداعى جاندارمەن بالانى ساتىپ الۋ تۋرالى كەلىسسوزدەر جۇرگىزەدى. بالاسىن ساتپاق بولعان ەرلى- زايىپتىلار ءسابيدىڭ ورنىنا «Toyota Camri» كولىگىن سۇراپ، قولما-قول اقشا الۋدان ءۇزىلدى-كەسىلدى باس تارتادى.
2015 -جىلعى 27 -قاڭتاردا اتالعان ايەل ۇل بالا بوسانىپ، ەكى كۇننەن كەيىن پەريناتالدىق ورتالىقتان شىعادى جانە سول كۇنى ا. ەسىمدى ازاماتشاعا قوڭىراۋ شالىپ، بالانى الىپ كەتۋىن سۇرايدى.
كەزدەسۋگە تۋىلعانىنا ەندى عانا ەكى كۇن تولعان نارەستەنىڭ اتا-اناسى كەلەدى. ولار ماتەريالدىق پايدا تابۋ ماقساتىندا بالانى قۇجاتتارىمەن ا. -عا تابىستاپ، ونىڭ ورنىنا سەنىمحات بويىنشا نارەستەنىڭ اكەسىنىڭ اتىنا جازىلعان اۆتوكولىكتى الادى جانە بالاعا قاتىستى ەش نارازىلىقتارى جوقتىعى تۋرالى قولحات جازىپ بەرەدى.
استانا قالاسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنىڭ 2015 -جىلعى 22 -ساۋىردەگى ۇكىمىمەن اتالعان ازاماتتار ق ر قىلمىستىق كودەكسىنىڭ 135-بابى 2-بولىگىنىڭ 1,10-تارماقشالارى بويىنشا كامەلەتكە تولماعان ادامدى ساتۋ، ياعني ساتۋ- ساتىپ الۋ نەمەسە جابىرلەنۋشىنىڭ ماتەريالدىق نەمەسە وزگە دە تاۋەلدىلىگىن پايدالانا وتىرىپ ادامدار توبىنىڭ الدىن الا ءسوز بايلاسۋىمەن كامەلەتكە تولماعان ادامعا قاتىستى مامىلە جاساۋدا كىنالى دەپ تانىلدى.
ءسويتىپ، ولار مۇلكى تاركىلەنىپ، ءارقايسىسى جالپى رەجىمدەگى تۇزەۋ كولونياسىندا جازاسىن وتەۋمەن 7 جىلعا باس بوستاندىعىنان ايىرىلدى.
سوتتىڭ ۇكىمى ءوز كۇشىنە ەندى.
