ايگىلى «مارجان قىز» انىنە كەيىپكەر بولعان جان دۇنيەدەن ءوتتى

مارجان ەنبايەۆا 1924 -جىلى يندەر اۋدانى ەسبول سەلوسىنا قاراستى «تولىباي» قۇمىندا دۇنيەگە كەلدى. مارجان قىز اعاسى شالاباي ەكەۋى اكەسى ەنبايعا جىلقى باعىستى. كەيىن 1944 -جىلى 19 جاستاعى شالاباي سوعىسقا اتتاندى. جىلقى باعۋدىڭ بارلىق مەحناتى ەندى قارشاداي قىز بەن اكەسىنە ءتۇستى.

«اكەمدى ءجۇنجىتىپ جىبەرگەنى جىلقىنىڭ جايى ەمەس، جالعىز ۇلىنىڭ سوعىستا حابار- وشارسىز كەتكەنى بولدى. كوزى جۇمىلعانشا «شالابايىم كەلىپ قالار» دەپ ەلەڭدەۋمەن ەسىككە قاراپ جاتتى. اعاتايىمنان قارا قاعاز كەلمەگەن سوڭ مەن دە ءۇمىتىمدى جويمادىم. ءبىراق شالاباي سول كەتكەننەن ورالمادى»، - دەگەن ەدى مارجان اجەي وتكەن كۇندەردى ەسكە الىپ.

زەينەتكەرلىك جاسقا دەيىن جىلقى باققان مارجان ەنبايەۆانىڭ باعىمىنا 1942-1946 -جىلدار ارالىعىندا 237 قۇلىن سەنىپ تاپسىرىلعان بولاتىن. ەڭبەگى ەلەنىپ، وعان 1948 -جىلى سوتسياليستىك ەڭبەك ەرى اتاعى بەرىلدى. ول كەزدە مارجان نەبارى 24 جاستا ەدى.

م. ەنبايەۆانىڭ ەرلىگى ەلدى ەلەڭ ەتكىزبەي قويمادى. ونىڭ داڭقى رەسپۋبليكاعا جايىلىپ، ءبىرقاتار باسىلىمداردىڭ باس كەيىپكەرى بولدى. جىلقىشى قىز اقىنداردىڭ دا شابىتىن وياتتى. بەلگىلى ساتيريك اقىن سادىقبەك ادامبەكوۆ مارجاندى ولەڭىنە ارقاۋ ەتىپ «مارجان قىز» ولەڭىن جازىپ، وعان تانىمال كومپوزيتور ءابىلاحات ەسپايەۆ ءان جازدى. ءسويتىپ بۇل ءان وتكەن عاسىردىڭ ەلۋىنشى جىلدارىندا جۇرتشىلىقتىڭ سۇيىكتى انىنە اينالىپ ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى