الەمدەگى اباي ەسكەرتكىشتەرى - فوتو
مىسال ءۇشىن ايتار بولساق، بەلارۋس ەلىندە اباي قۇنانبايەۆتىڭ 170 جىلدىق مەرەيتويىنا بايلانىستى «اباي جالپاق الەمدە سالتانات قۇرۋدا» (http://sozvuchie.zviazda.by/abaj) دەپ اتالاتىن سايت اشىلدى. بۇل ابايدى تەك ءوز ەلىندە عانا ەمەس، قازاق جۇرتىن تانيتىن بارلىق ەل تانيدى دەگەندى بىلدىرەدى. سەبەبى اباي مەن قازاق - ەگىز ۇعىم.
ال ەندى ول ۇلى اقىنعا ارناپ قانداي شەت مەملەكەتتەردە كوشەلەرگە اقىن ەسىمى بەرىلىپ، ەسكەرتكىشتەر قويىلعان، سولارعا كوز جۇگىرتىپ كورەلىك.. .
1988 - جىلدان بەرى كيەۆتە اباي قۇنانبايەۆ كوشەسى اشىلعان. اقىن اتىنداعى كوشە سونداي- اق ۋكراينانىڭ كراماتورسك، دنەپروپەتروۆسك قالالارىندا دا بار.
1995 - جىلى 15 - اقپاندا الەمنىڭ ورتالىعى سانالاتىن لوندون قالاسىندا روللان سەيسەمبايەۆتىڭ باستاماسىمەن اباي ءۇيى اشىلدى.
كايردە اباي اتىنداعى كوشە 1998 - جىلى پايدا بولسا، بەرليندە 2000 - جىلى 18- اقپان كۇنى اباي- شتراسسە اشىلعان. سونىمەن بىرگە تاشكەنت، بىشكەك قالالارىندا دا، ءتىپتى ءۇندىستاننىڭ استاناسى نيۋ دەليدە دە اباي قۇنانبايەۆ اتىنداعى كوشە بار.
بەرليندەگى اباي كوشەسى
بىشكەكتەگى اباي كوشەسى
تاشكەنتتەگى اباي كوشەسى
2006 - جىلى رەسەي استاناسى ماسكەۋدىڭ «چيستىە پرۋدى» بۋلۆارىندا اباي ەسكەرتكىشى اشىلدى. ەسكەرتكىش قازاقستان ەلشىلىگى ماڭايىنا قويىلعان. ورىنداعان اۆتورلىق ۇجىم: ءمۇسىنشى مارات اينەكوۆ، ديزاينەر تيمۋر سۋلەيمەنوۆ، سۋرەتشى ەدۋارد دروبيتسكي، ساۋلەتشى ۆياچەسلاۆ رومانەنكو.
2007 - جىلى قازان ايىندا يران يسلام رەسپۋبليكاسى تەگەران قالاسىندا اباي ءمۇسىنى اشىلدى. ءمۇسىن ۇلتتىق كىتاپحاناعا كىرەبەرىس اللەيادا ورناتىلعان. سونداي- اق يران ۇلتتىق كىتاپحاناسىندا دا ابايدىڭ ءمۇسىنى قويىلعان.
ال 2011 - جىلى جەلتوقسان ايىندا ازەربايجان استاناسى باكۋدە اباي قۇنانبايەۆتىڭ اتىمەن اتالعان كوشەنىڭ سالتاناتتى اشىلۋ ءراسىمى ءوتتى.
2013 - جىلى ماۋسىم ايىندا قازاقستان پرەزيدەنتى نۇرسۇلتان نازاربايەۆ پەن وزبەكستان پرەزيدەنتى يسلام كاريموۆتىڭ قاتىسۋىمەن تاشكەنتتەگى اباي كوشەسىندە اقىن ەسكەرتكىشى اشىلدى. اباي ەسكەرتكىشىنىڭ اۆتورلارى بەلگىلى قازاق ءمۇسىنشىسى نۇرلان دالباي جانە ساۋلەتشى راسۋل ساتىبالديەۆ. اۆتورلار اقىن بەينەسى ارقىلى بۇكىل قازاق حالقىنىڭ دارحان كوڭىلى مەن ۇلى ويشىلدىڭ دانا تۇلعاسىن سومداعان. ەسكەرتكىشتىڭ بيىكتىگى - 9,2 مەتر.
2014 - جىلى ناۋرىزدا قىتاي استاناسى بەيجىڭنىڭ ورتالىعىنداعى «چاويان» ساياباعىندا ابايعا ارنالعان ەسكەرتكىش اشىلدى. بۇل سالتاناتقا قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ قاتىستى. ءمۇسىننىڭ اۆتورى - يۋان سيكۋن.
2014 - جىلى ۆەنگريا استاناسى بۋداپەشتتەگى استانا كوشەسىنە ابايدىڭ ەسكەرتكىشى ورناتىلدى. اشىلۋ سالتاناتىنا قازاقستان رەسپۋبليكاسىنىڭ پرەمەر- ءمينيسترى كارىم ءماسىموۆ قاتىستى. ءمۇسىن قولادان جاسالعان، ونىڭ بيىكتىگى -1070 م م، ەنى - 900 م م.
