قاراعاندى اۋەجايىندا جەرگە ورالعان عارىشكەرلەردى قارسى الدى - فوتو
قاراعاندىنىڭ اكىمى نۇرلان اۋباكىروۆ رەسەيلىك عارىشكەر انتون شكاپلەروۆتى، ەۋروپالىق عارىش اگەنتتىگىنىڭ استروناۆتى سامانتا كريستوفورەتتيدى جانە NASA استروناۆتى تەرري ۆەرتستى قارسى الدى.
«سىزدەر وربيتادا ۇزاق ۋاقىت بولىپ، بارلىق تاپسىرمالاردى جاۋاپكەرشىلىكپەن ورىندادىڭىزدار. سىزدەردى قوناقجاي قاراعاندىنىڭ جەرىنە ءساتتى قونۋلارىڭىزبەن قۇتتىقتاۋعا رۇقسات ەتىڭىزدەر»، - دەدى قالا باسشىسى سالتاناتتى قارسى الۋ راسىمىندە.
ءداستۇر بويىنشا عارىشكەرلەردىڭ يىقتارىنا قازاقتىڭ ۇلتتىق كيىمى- شاپان مەن كامزول جابىلدى. بۇدان باسقا كادەسىيلار، اتاۋلى ماترەشكالار جانە بايقوڭىردىڭ 60 جىلدىعىنا شىعارىلعان كىتاپتار سىيعا تارتىلدى.
ءوز كەزەگىندە ەكيپاج كومانديرى ەرەكشە سىيلىق تاپسىردى. حالىقارالىق عارىش ستانساسى جەرگە قاراعاندىلىق اۋليە سيەۆاستيان يكونىمەن ورالعان.
«ماعان ح ع س- قا اۋليەنىڭ قۇدىرەتتى كۇشىن جەتكىزۋ باقىتى بۇيىرعاندىعىن ماقتان تۇتامىن. بۇل يكون كايۋتادا 200 تاۋلىك بويى مەنىمەن بىرگە بولدى، ول مەنى ساقتادى. جانە بۇگىنگى امان-ەسەن قونۋىمىزعا شاپاعاتى ءتيدى دەگەن ويدامىن. مەن وتە باقىتتىمىن جانە يكوندى سىزدەرگە تابىس ەتەمىن»، - دەدى ا. شكاپلەروۆ قاراعاندى جانە شاحتينسك ەپارحياسىنىڭ حاتشىسى ۆلاديمير اكەيگە (فرەيگانگ) ونى بەرىپ جاتىپ.
بۇدان بۇرىن حابارلانعانداي، 11- ماۋسىمدا استانا ۋاقىتىمەن ساعات 19:44 تە حالىقارالىق عارىش ستانساسىنىڭ 42/43 ەكيپاجى جەزقازعان قالاسىنان 146 شاقىرىم جەردە ءساتتى قونعان بولاتىن.
جارتى جىلعا سوزىلعان عارىشتىق ۆاحتادان كەيىن رەسەيلىك انتون شكاپلەروۆ، ەۋروپالىق عارىش اگەنتتىگىنىڭ استروناۆتى سامانتا كريستوفورەتتي جانە امەريكاندىق تەرري ۆەرتست جەرگە ورالدى.
ولار ساپار كەزىندە ستانسادا عىلىمي- قولدانبالى زەرتتەۋ باعدارلامالارىن تولىقتاي اتقاردى جانە ەكى رەسەيلىك، ءبىر امەريكاندىق جۇك كەمەلەرىنىڭ جۇمىستارىن قامتاماسىز ەتۋگە قاتىستى.
رەسەي عارىشكەرى گەننادي پادالكا جانە ميحايل كورنيەنكو، سونداي-اق NASA استروناۆتى سكوتت كەللي ۆاحتالىق جۇمىستار اتقارۋ ءۇشىن ح ع س بورتىندا قالدى.
ال جاڭا ەكسپەديتسيا ەكيپاجى حالىقارالىق عارىش ستانساسىنا 24- شىلدەدە «سويۋز ت م ا-17م» كەمەسىمەن اتتانادى.
