ول قازاقستاننان ا ق ش-قا بوكس ەمەس، وقۋ ىزدەپ بارىپ ەدى

قازاق جۇدىرىعىنىڭ قايراتىن امەريكادا «بولاشاق» باعدارلاماسىمەن وقىپ جاتقان ستۋدەنت داۋرەن نيازبايەۆ تا دالەلدەپ ءجۇر.

ول وندا بوكس ىزدەپ بارعان جوق، وقۋ ىزدەپ باردى. مۇندا اكە-جاكەسىنىڭ ءۇيى جوق، قولى بوساعاندا ەرمەك كەرەك بولعان سوڭ ۋنيۆەرسيتەت ماڭىنداعى بوكس زالىنا كەلگەن.

قوجايىنى كەزىندە رەسەيدەن كەلگەن ەميگرانت ارتەم شاروشكين داۋرەننىڭ قازاق ەكەنىن بىلگەننەن كەيىن: «و، ورىس پەن قازاق باۋىر. ەكەۋى دە اقكوڭىل، جاقسى ۇلت. سەن ەشقانداي اقشا تولەمە، تەگىن جاتتىق»، دەيدى.

امەريكادا ءاربىر بوكس كلۋبتارى اقشاعا ماتچ وتكىزىپ تۇرادى. كورەرمەن كوپ جينالادى. سونداي كلۋبتاردىڭ ءبىرى ارتەم شاروشكيننىڭ كاليفورنيا شتاتىنداعى «لا-حويە» كلۋبىنا كەلەدى. سول جەردە جاتتىعۋ جاساپ جاتقان داۋرەندى بايقاعان يسپان باپكەرلەرى ونىڭ ۇرىس مانەرىنە قىزىعادى.

وزىنەن سالماعى دەڭگەيلەس كاسىپقوي بوكسشىمەن رينگتە سايىسقا تۇسكەنىن قالايدى. سونىمەن نە كەرەك، بويى ۇزىن، قولدارى سىرعاۋىلداي داۋرەن الگى بوكسشىنى سويىپ سالادى. كەيىن تاعى بىرەۋىن شىعارادى، ول دا جەڭىلەدى.

ارتەم شاروشكين دە، يسپان باپكەرلەرى دە رازى. داۋرەنگە دە جامان ەمەس، كاليفورنيادا 600 دوللارعا پاتەر جالداپ تۇرادى. كوممۋنالدىق قىزمەت اقىسى، ونى-مۇنىسى بار كەمىندە اي سايىن 1000 دوللار كەرەك.

اكەسى ەرتەرەكتە دۇنيەدەن وتكەن، باۋىرلارىنىڭ نەسىبەسىن اۋىزدارىنان جىرعىسى كەلمەيدى. كوممەرتسيالىق تۋرنير بولعاندىقتان داۋرەنگە اقشا تولەنىپ، اي سايىنعى پاتەر اقىسىن جاۋىپ تاستايدى.

وۋشەنسايد قالاسىندا برايان نيەۆارەس دەگەن كاسىپقوي بوكسشىنىڭ اتى دۇرىلدەپ شىعىپ تۇرعان. بەس جەكپە-جەك وتكىزىپ بەسەۋىندە دە جەڭىسكە جەتكەن. اۋزىمەن قۇس تىستەگەن مىقتىڭىزدىڭ ءوزى. سول براياننىڭ پروموۋتەرلەرى بايقاماي داۋرەن نيازبايەۆتى بوكستاسۋعا شاقىرادى عوي. ولاردىكى دە دۇرىس. برايان سياقتى ەندى كاسىپقوي بوكستا كورىنىپ كەلە جاتقان بوكسشىعا تىسكە جۇمساقتاۋ جەمتىك كەرەك. شارشى الاڭنىڭ ورتاسىندا ءبىراز سوققىلاسقاننان كەيىن ەكى-ءۇش مارتە اش باۋىردان تاستاي جۇدىرىق وتكىزىپ العان برايان نيەۆارەز قورعانىستى تاڭداپ، سىتىلا جونەلەدى.

داۋرەنگە دە كەرەگى سول. سويداۋىلداي قولدارىمەن قورعانىسىن بۇرىپ براياندى پۇشايمان كۇيگە تۇسىرەدى. الدىن كەسىپ اتتاتتىرمايدى. اشىلسا قاسقا ماڭدايدان ۇرىپ، سوققىعا كومىپ تاستايدى. ماتچ اياقتالعاندا بەت اۋىزى قيسايىپ كەتكەن شاكىرتىن كورىپ باپكەرلەرى ءتىلىن تىستەپتى.

قازاق تىسكە جۇمساق ەمەس ەكەن. اتاعى جوعىنا الدانىپ قالىپتى. ءۇش تورەشى دە جەڭىستى داۋرەنگە بەرگەن. ءسويتىپ، جەڭىلىسسىز كەلە جاتقان برايان پاقىر ءبىر كۇندە بەدەلىنەن جۇرداي بولعان. ەندى داۋرەنگە، قوستانايدان امەريكاعا ءبىلىم ىزدەپ بارعان ءبىزدىڭ وعلانعا قيىن بولىپ تۇر.

سەبەبى، قولى سىرعاۋىلداي قازاقپەن ەشكىم رينگكە شىققىسى كەلمەيدى. وسىلايشا، داۋرەنىڭىزدىڭ كاليفورنيادا داۋرەنى ءجۇرىپ تۇر. ايتقانداي، داۋرەن نيازبايەۆ امەن حايداروۆ باتا بەرگەن بەلگىلى انيماتور كەرىمبەك نيازبايەۆتىڭ نەمەرە ءىنىسى.

باقتيار تايجان،

«ەگەمەن قازاقستان».

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى