ارمان وسپانوۆپەن ايقاسۋعا «قارا جولبارىس» كەلە جاتىر

 بالا كەزىندە ءجيى اۋىرىپ، اقىرىندا تۋبەركۋلەز دەرتىنە شالدىقتى. سول كەزدەرى دارىگەرلەر راسۋلدىڭ نەبارى ءتورت جىل ءومىرى قالدى دەپ ساۋەگەيسىگەن بولاتىن.

 ءبىراق بىرىنشىدەن اللانىڭ، ەكىنشىدەن سپورتتىڭ ارقاسىندا راسۋل جوعارىداعى جورامالدى جوققا شىعاردى. جاستايىنان ءتۇرلى سپورت ءتۇرىن مەڭگەرگەن ول جاۋىنگەرلىك سامبودان كوپتەگەن حالىقارالىق جارىستاردا جۇلدە الىپ ءجۇردى. 2010 -جىلى تاشكەنتتە الەم چەمپيونى اتاندى. سول ارالىقتا ەرەجەسىز جەكپە- جەكتەن وتكەن بايراقتى باسەكەلەردە دارا تالانتىمەن وقشاۋلاندى. ءتۇرلى نۇسقالار بويىنشا رەسەي چەمپيونى اتانىپ، الەمدىك دودالاردا جەڭىس تۇعىرىنا كوتەرىلدى.

 2011 -جىلدىڭ 13 - تامىزىندا شامامەن، تۇنگى ساعات 4 تە ماسكەۋدەگى «گاراج» تۇنگى كلۋبىنىڭ ماڭىندا ءوزىنىڭ سۇيىكتىسىمەن قىدىرىپ جۇرگەن راسۋل ميرزايەۆقا يۆان اگافونوۆ دەگەن باز بىرەۋ كەلىپ كيلىگەدى. سول جەردە ەكەۋى ەرەگەسىپ قالادى. قاپ تاۋىنىڭ قىزۋقاندى جىگىتى 19 جاسار ستۋدەنتتى ءبىر عانا سوققىمەن ەسىنەن تاندىرادى. سودان يۆان وڭالمادى. ارادا بەس كۇن وتكەننەن كەيىن اگافونوۆ ەس جيماعان كۇيى اۋرۋحانادا كوز جۇمادى.

 ءبىر جارىم جىلدان كەيىن ميرزايەۆ بوستاندىققا شىعادى. تەمىر قاپاستان بوساعاننان كەيىن ول جاتتىعۋىن قايتا جالعاستىرادى. 2013 -جىلدىڭ 31 - ناۋرىزىندا الماتىدا «الاش پرايد» كلۋبىنىڭ ۇيىمداستىرۋىمەن «ۇلى مايدان» دەپ اتالاتىن ءىرى حالىقارالىق ءتۋرنيردىڭ تۇساۋى كەسىلەدى. سول كەشتە ول ەرجان ەستانوۆپەن كەزدەستى. قانداسىمىز قانشا جانتالاسقانىمەن، ايگىلى قارسىلاسىنان ۇپاي سانىمەن ۇتىلادى. ارادا ءبىر جىل وتكەننەن كەيىن قوس سپورتشى قازاق جەرىندە قايتا جولىقتى. بۇل باسەكەدە دە راسۋلدىڭ مەرەيى ۇستەم بولدى.

راسىندا دا، ءبىزدىڭ ەلگە ەكى مارتە كەلىپ، ەكى رەتىندە دە بەلدى سپورتشىمىزدى ەش كۇمانسىز ۇتقانى جەرگىلىكتى جانكۇيەرلەردىڭ كوڭىلىنە كەلدى. سول كەزدە قاپ تاۋىنان كەلگەن قىراندى سوققىعا جىعۋعا جارايتىن قازاقتان ەشكىم تابىلماعانىنا قاتتى كۇيىنگەن ەدىك.

 مىنە، ەندى راسۋل ميرزايەۆ قازاقستانعا ءۇشىنشى مارتە ات باسىن بۇرعالى جاتىر. 4 - قىركۇيەكتە قازاق حاندىعىنىڭ 550 -جىلدىعىنا وراي الماتىداعى بالۋان شولاق اتىنداعى سپورت سارايىندا ۇيىمداستىرىلعالى وتىرعان ايتۋلى جارىستا ول ارمان وسپانوۆپەن كۇش سىناسادى.

 ارمان -  ەلىمىزدەگى بەلدى سپورتشىلاردىڭ ءبىرى. بۇركەنشىك ەسىمى -  «سۇڭقار» . ول -  جاۋىنگەرلى سامبودان الەمنىڭ ەكى دۇركىن چەمپيونى، كوپتەگەن حالىقارالىق جارىستاردىڭ جەڭىمپازى. ەرەجەسىز جەكپە- جەكتەن ءوتىپ جۇرگەن ءتۇرلى تۋرنيرلەردە دە قانداسىمىز ءوزىن جاقسى قىرىنان كورسەتە ءبىلدى. ول جاقسى كۇرەسە دە بىلەدى، جاقسى جۇدىرىقتاسا دا الادى. ءبىر سوزبەن ايتساق، ناعىز امبەباپ سپورتشى.

 وسىدان ەكى جىل بۇرىن سوچيدە «پلاتفورما S-70» دەپ اتالاتىن ءدۇبىرلى دودا وتكەن بولاتىن. سول جارىستى تاماشالاۋ ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پەن رەسەي فەدەراتسياسىنىڭ باسشىلارى -  ۆلاديمير پۋتين مەن دميتري مەدۆەديەۆ جانە باسقا دا لاۋازىمدى تۇلعالار قارا تەڭىز جاعالاۋىنا ات باسىن بۇرعان بولاتىن. سول جەكپە- جەكتە حاباروۆسكىدەن كەلگەن الەكسەي پولپۋدنيكوۆتى ءبىرىنشى راۋندتا ۇرىپ جىققان ارماننىڭ ونەرىنە جانكۇيەرلەر وتە ريزا بولدى. جارىس اياقتالعان بەتتە ەلباسى نۇرسۇلتان نازاربايەۆ ارمان باۋىرىمىزدى قۇشاعىنا قىسسا، ۆلاديمير پۋتين قازاقتىڭ قايسار ۇلىنا ارنايى سىيلىق تابىس ەتتى.

 مىنە، ءبىزدىڭ ارمان وسىنداي جىگىت! تاعى ءبىر ايتا كەتەرلىك جايت، وسپانوۆ جانە ميرزايەۆتان ەكى مارتە جەڭىلگەن ەستانوۆ -  ءبىر ءوڭىردىڭ تۇلەكتەرى. ەكەۋى دە وڭتۇستىك قازاقستان وبلىسىنىڭ وعلاندارى. ءبىراز جىل بويى ءبىر زالدا جاتتىقتى. سىيلاستىعى وتە كەرەمەت. وزىنەن بىرنەشە كويلەكتى ەرتە توزدىرعان ەرجاندى ارمان باۋىرى اركەز اعا تۇتىپ جۇرەدى. ولاي بولسا، ەستانوۆ جىبەرگەن ەسەنى بۇل باسەكەدە وسپانوۆ تولىعىمەن قايتارادى دەگەن سەنىمدەمىز.

«ايقىن» 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى