موڭعوليا ساراپشىسى: قازاقستاننىڭ ەكونوميكالىق جوسپارلاۋ تاجىريبەسى مەن ساياسي تۇراقتىلىعى - ونىڭ تابىستىلىعىنىڭ نەگىزى
بۇل تۋرالى قازاقپارات تىلشىسىنە بەرگەن ەكسكليۋزيۆتى سۇحباتىندا موڭعوليا ۇلتتىق ۋنيۆەرسيتەتىنىڭ پروفەسسورى، ەكونوميكالىق عىلىمدار دوكتورى چۋلۋۋندورج حاشچۋلۋۋن مالىمدەدى.
«قازاقستان - ەكونوميكاسىمەن كوش باستاعان ورتالىق ازياداعى ءىرى مەملەكەت. ونىڭ ەنەرگەتيكالىق سەكتوردى دامىتۋدا، ترانسۇلتتىق كورپوراتسيالارمەن جۇمىس ىستەۋدە، حالىقارالىق نارىقتارداعى قىزمەتتە تاجىريبەسى مول. ق ر تابىستىلىعىنىڭ ەلەۋلى فاكتورى ەكونوميكالىق جوسپارلاۋ تاجىريبەسى دەر ەدىم. بۇل كوپ جاعدايدا باسقا ەلدەرگە، ونىڭ ىشىندە موڭعولياعا ۇلگى بولۋدا»، - دەدى ول.
چۋلۋۋندورج حاشچۋلۋۋن ءبىرىنشى كەزەكتە، قازاقستاننىڭ 2030 جانە 2050 گە دەيىنگى دامۋ ستراتەگياسى مەن نۇرلى جول باعدارلاماسىن العا تارتقانىن ءتۇسىندىردى.
موڭعوليا ەكونوميسىنىڭ ايتۋىنشا، قازاقستاننىڭ باستى ەكونوميكالىق باسىمدىقتارىنىڭ ءبىرى ونىڭ ازيادان ەۋروپاعا باراتىن جولداردىڭ قيىلىسىندا ورنالاسۋى. بۇل وراسان زور ترانزيتتىك مۇمكىندىكتەر اشادى.
«موڭعوليانى قوسا العاندا، ءوڭىردىڭ باسقا ەلدەرىنە قاراعاندا، قازاقستاننىڭ ينۆەستيتسيالىق الەۋەتى زور. بۇل ونىڭ ءىرى نارىقتارىمەن، حالقىمەن، تۇتاستاي ۇلكەن ەكونوميكاسىمەن شارتتاسقان. مىسالى، موڭعوليادا بارلىق يندۋستريالىق جوبالار ىشكى تۇتىنۋعا ەمەس، باسىم بولىگى ەكسپورتقا نەگىزدەلگەن»، - دەپ قوستى ول.
