كەز كەلگەن انشىگە حالىقارالىق بايقاۋدا جەڭىسكە جەتۋ ءۇشىن دۇرىس ءان تاڭداۋ ماڭىزدى - ج. دۇعالوۆا

بۇل تۋرالى بۇگىن الماتىدا تۇركى تىلدەس ەلدەردىڭ تاريحىندا تۇڭعىش رەت قولعا الىنعان «Bala Turkvizyon»  حالىقارالىق بالالار ءانى بايقاۋىنا ىرىكتەۋ شارالارىنىڭ باستالۋىنا قاتىستى وتكەن باسپا ءسوز ءماسليحاتىندا بەلگىلى ءانشى، «Turkvizyon-2014»  بايقاۋىنىڭ جەڭىمپازى جانار دۇعالوۆا ءمالىم ەتتى.

«مەن، ارينە قازىلار القاسىنىڭ مۇشەسى ەمەسپىن. ءبىراق، كەز كەلگەن انشىگە، مەيلى ول جاس بولسىن، ەرەسەك بولسىن، حالىقارالىق بايقاۋدا جەڭىسكە جەتۋ ءۇشىن ءبىرىنشى كەزەكتە دۇرىس ءان تاڭداۋ ماڭىزدى. ويتكەنى، بالا قانشا جەردەن دارىندى بولعانىمەن دۇرىس ءان تاڭداپ الىنباسا، ول ءوز ونەرىن اشىپ كورسەتە المايدى. سوندىقتان، وسى جاعىنا كوپ كوڭىل ءبولۋ قاجەت» - دەدى ج. دۇعالوۆا.

سونىمەن قاتار، جانار «Bala Turkvizyon» حالىقارالىق بالالار ءانى بايقاۋىنىڭ جاس تالانتتار ءۇشىن ماڭىزدى شارا ەكەندىگىن ايتتى.

«شىنى كەرەك، قازىر بالالار اراسىندا وتەتىن ءان بايقاۋلارى كوپ ەمەس. سوندىقتان بۇل وتە ماڭىزدى باستاما بولايىن دەپ تۇر. ول، بالالارعا ءوز ونەرلەرىن بۇكىل تۇركى الەمىنە تانىتۋعا مۇمكىندىك بەرەدى. سونىڭ ارقاسىندا قازاقستاننىڭ دا بەدەلى ارتا تۇسەدى. مەن تالىمگەرلەرگە جانە ءاربىر جاس تالانتقا ساتتىلىك تىلەيمىن. باستاما ۇزاعىنان بولسىن. قازاقستاننىڭ ءان الەمىندە جاڭا جۇلدىزدار جارقىراسىن!» - دەدى ج. دۇعالوۆا.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى