وتىرارلىق شارۋا جەر استىنان وزدىگىنەن شىعىپ جاتقان ىستىق سۋمەن كوكونىستەرىن سۋاردى
باۋىرجان قىس بويعى ەڭبەگىنىڭ العاشقى جەمىسىن ءوز قولىمەن جيناپ جاتىر. بۇيىرتسا، گەكتارىنا 2 توننادان ءونىم الماق. «جەراستى ىستىق سۋىمەن قاتار شىرىگەن كوڭنەن جاسالعان تىڭايتقىشقا پىسكەن قيار مەن قىزاناق ءدامدى ءارى تاسىمالعا شىدامدى كەلەدى»، - دەيدى ديقاندار.
باۋىرجان مۇرات ۇلى، جىلىجاي اگرونومى:
- سورلى، تۇزدى جەر. سۋدىڭ يودى بار، ەكەۋى ءبىر- بىرىنە سايكەس كەلەدى. سودان ءونىم جاقسى بولادى. مىسالى، مالدىڭ كوڭىن پايدالانامىز. قيدىڭ بيىلعىسىن قولدانساق، ول وسىمدىكتى كۇيدىرىپ، ءولتىرىپ قويادى. تىڭايتقىش قۇرامى كۇشتى بولعان سوڭ. سوندىقتان ءبىز ەسكى 7-11 جىل تۇرعاندارىن پايدالانامىز.
جىلىجايدىڭ اينالاسى قام قىشپەن ورىلگەن. ونىسى جەلدەن قورعايدى. جىلىتۋ جۇيەسى ىستىق سۋعا قوسىلعان. تەرمالدى سۋ ىشتەگى اۋا رايىن قىسى- جازى ءبىر قالىپتى ۇستاپ تۇرادى. كومىر جاقپايدى. ارتىق شىعىن جوق. جەر استىنان وزدىگىنەن اتقىلاپ شىعىپ جاتقان ىستىق سۋ جىلىجايدان 100 مەتر جەردە تۇر. ءتىپتى قىستىڭ كۇندەرى قاقاعان ايازدا سۋدىڭ تەمپەراتۋراسى +72 گرادۋستان تومەندەمەيدى ەكەن.
ديقاندار: «قۇرامىندا يودى كوپ سۋدا پىسكەن كوكونىس باسقا جەمىستەرمەن سالىستىرعاندا، الدەقايدا دامدىرەك بولادى»، - دەيدى. «بەك» ج ش س 2 گەكتار جەرگە قىزاناق پەن قيار ەگىپتى. العاشقى ونىمدەرىن كورشى رەسەي مەن استانا جانە الماتى قالالارىنا جونەلتىپ جاتىر. بەرەكەلى ءىستىڭ جەمىسىن كورىپ وتىرعان ديحاندار كەشەن كولەمىن 5 گەكتارعا جەتكىزبەك. جىلىجايمەن اينالىساتىن شارۋاشىلىقتارعا مەمەلەكەت تاراپىنان بەرىلەتىن جەڭىلدىك پەن سۋبسيديا (قولداۋ قارجى) كولەمى دە جىل ساناپ ارتىپ كەلەدى.
باتىربەك سىزدىق، وتىرار اۋدانى جەر قاتىناستارى جانە اۋىل شارۋاشىلىعى ءبولىمىنىڭ باسشىسى:
-1 گەكتار جىلىجايعا 1 ميلليون 800 مىڭ تەڭگە سۋبسيديا بەرىلەدى. ءبىر جىلدا ەكى ەرت ەگىن ەگىپ، ءونىم جينايتىن بولسا، وندا جىلىنا 2 رەت سۋبسيديا بەرۋگە مۇمكىندىك بار.
ءشاۋىلدىر اۋىلىنىڭ ماڭىندا جەر استىنان شىعىپ جاتقان ءدال وسىنداي تەرمالدى 9 ۇڭعىما بار ەكەن. قازىر سونىڭ تورتەۋى پايدالانىلۋدا. اۋدان ورتالىعىنداعى تۇرعىن ۇيلەر مەن الەۋمەتتىك جانە كومەرتسيالىق كەشەندەر جەراستى تەرمالدى ىستىق سۋىمەن جىلىتىلادى. جەرگىلىكتى اكىمدىكتەگىلەر تاعى وسىنداي 4 ۇڭعىمانى كادەگە جاراتىپ، اۋدانداعى جەكە ۇيلەرگە دە جىلۋ بەرۋ جولدارىن قاراستىرىپ جاتىر.
