قازاقستان بازارلارى وركەنيەتتى فورماتقا ءوتۋى قاجەت - ا. مىرزاحمەتوۆ
ول بۇل ويىن بۇگىن ورتالىق كوممۋنيكاتسيالار قىزمەتىندە وتكەن بريفينگتە ايتتى.
جۋرناليستەردىڭ الماتىداعى ورتەنىپ كەتكەن «ادەم» ساۋدا ءۇيى تۋرالى قويعان سۇراعىنا جاۋاپ بەرگەن پالاتا ءتوراعاسى بۇل جاعدايعا بازاردىڭ وركەنيەت تالاپتارىنا جاۋاپ بەرمەۋى كىنالى ەكەنىن ايتتى.
«ءبىز بازارلاردىڭ وركەنيەتتى كەيىپكە ەنگەنىن ءبىراۋىزدان قولدايمىز. ءبىزدىڭ ويىمىزشا، بۇل ەڭ ءبىرىنشى تۇتىنۋشىلار مەن ساۋدا ۇيلەرىن جالعا الۋشى كاسىپكەرلەردىڭ مۇددەسى بولۋى ءتيىس. ساۋداگەرلەر جۇمىس جەرىندە بارلىق جاعدايدىڭ جاسالعان بولۋىن تالاپ ەتۋى ءتيىس. وركەنيەتتى فورماتقا ەشكىم دە كەتارى ەمەس»، - دەپ اتاپ ءوتتى ا. مىرزاحمەتوۆ.
ونىڭ ايتۋىنشا، پالاتاعا كاسىپكەرلەردەن 600 دەن استام ءوتىنىش-حاتتار كەلىپ تۇكەن، ولاردىڭ جارتىسى - اتالعان ورتتە زارداپ شەككەندەردەن.
«قازىرگى كەزدە اشۋعا بوي الدىرماي، سابىرلى بولعان ابزال. زارداپ شەككەندەردەن بىزگە ۇلتتىق قوردان قارجى ءبولىنسىن، شىعىنىمىزدىڭ ورنىن تولتىرسىن دەگەن سياقتى حاتتار كەلىپ جاتىر. بۇل دا دۇرىس ەمەس، نەگە ۇلتتىق قور بارلىق حالىقتىڭ اقشاسىن ولارعا ءبولىپ بەرۋى كەرەك؟
ولاردىڭ وزدەرىندە نە ساقتاندىرۋ جوق، نە كەلىسىم شارت جوق، باسقا دا قۇقىقتىق قۇجاتتارى جوق. ەگەر دە وركەنيەتتى فورماتتىڭ بارلىعى ساقتالعان بولسا، مۇنداي بولماس ەدى، - دەپ اتاپ ءوتتى پالاتا باسشىسى. - قازىر وتە اۋىر كەلىسسوزدەر ءجۇرىپ جاتىر، ەڭ باستىسى تەكسەرۋ شارالارى ءورتتىڭ ناقتى قانداي سەبەپتەن پايدا بولعانىن انىقتاۋى قاجەت. تەك سول كەزدە عانا ساقتاندىرۋدىڭ قالاي وتەلەتىنى، ونى كىمنىڭ تولەيتىنى بەلگىلى بولادى».
ايتا كەتەيىك، 26- ساۋىردە الماتىداعى «ادەم» ساۋدا ۇيىندە سۇراپىل ءورت بولدى. ناتيجەسىندە جالىن ءتىلى 25 مىڭ شارشى مەتر اۋماقتى شارپىعان بولاتىن. قالالىق ت ج د مالىمەتى بويىنشا، ساۋدا ۇيىندە ءورت قاۋىپسىزدىگى ەرەجەلەرىنىڭ بۇزىلعاندىعى انىقتالعان.
اۆتور: ءابۋ-اسقار مەكەش ۇلى
