رەسەي «بايقوڭىر» ايلاعىنداعى ءبىرقاتار نىسانداردى جالعا الۋدان شىعارۋعا مۇددەلى - ت. مۇسابايەۆ

جالپى وتىرىستا «2004 - جىلعى 22 - جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى ماقۇلدانعان بولاتىن.

 زاڭ جوباسىن تالقىلاۋ بارىسىندا دەپۋتات راۋان شاەكين بۇقارالىق اقپارات قۇرالدارىندا «بايقوڭىر» عارىش ايلاعىنا جالعا بەرىلەتىن مۇلىكتەر قىسقارتىلاتىنى جازىلعانىن تىلگە تيەك ەتىپ، بۇنىڭ ناتيجەسىندە ارەندالىق تولەم ازاياتىندىعى تۋرالى اقپاراتتى دا سۇراعان ەدى.

 «شىندىعىندا، 1994 - جىلى ەكى مەملەكەت باسشىلارى «بايقوڭىر» ءۇشىن ارەندالىق تولەم جىلىنا 115 ميلليون دوللار شاماسىندا بەكىتىلگەن. بۇل بۇگىنگە دەيىن ساقتالىپ كەلەدى. سونىمەن قاتار، رەسەي تاراپى «بايقوڭىر» ايلاعىنان مىڭداعان نىسانداردى ارەندادان شىعارۋعا مۇددەلى. ونداي وبەكتىلەردىڭ باسىم بولىگى ەسكىرگەن، ولاردى قازاقستان تاراپى دا رەسەي تاراپى دا كەلەشەكتە قولدانۋعا ەش قىزىقپايدى. سوندىقتان دا، ولار ونداي نىسانداردى ارەندالىق تولەمنەن شىعارعىسى كەلەدى. الايدا، قازىرگە دەيىن رەسەي تاراپىنان «بايقوڭىر» عارىش ايلاعىن پايدالانعانى ءۇشىن جالعا الۋ تولەمىن قىسقارتۋ تۋرالى ماسەلە قويىلعان ەمەس»، - دەدى ينۆەستيتسيالار جانە دامۋ مينيسترلىگى ايروعارىش كوميتەتىنىڭ ءتوراعاسى تالعات مۇسابايەۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى