م. شاريف: قازاقستان مەن پاكىستان قارىم-قاتىناستارى كوپ عاسىرلىق بايلانىستارىنا نەگىزدەلگەن
بۇل تۋرالى اقوردانىڭ باسپا ءسوز قىزمەتىنەن حابارلادى.
م. ن. شاريف پاكىستان ۇكىمەتى مەن جەكە ءوزىنىڭ اتىنان قۇتتىقتاۋىندا نۇرسۇلتان نازاربايەۆتىڭ پرەزيدەنتتىك سايلاۋداعى ايقىن جەڭىسى مەن سايلاۋشىلاردىڭ جوعارى بەلسەندىلىگى ءوز كوشباسشىسىنىڭ ەل مەملەكەتتىلىگىن تابىستى دامىتۋداعى ەڭبەگىن حالىقتىڭ داۋسىز مويىندايتىنىن، سونداي-اق جاسامپاز ءارى كورەگەن ساياساتقا دەگەن سەنىمنىڭ جوعارى دەڭگەيىن ايعاقتايتىن اتاپ وتەدى.
پاكىستان پرەمەر-ءمينيسترى قازاقستان پرەزيدەنتىنىڭ ەلدىڭ تۇراقتىلىعى مەن دامۋىن قامتاماسىز ەتۋگە باعىتتالعان كۇش-جىگەرىنە توقتالدى.
«ءسىز ۇسىنعان بەس رەفورما ورتا تاپتىڭ ەكونوميكالىق ءوسۋى مەن نىعايۋىنا، قازاقستان حالقى بىرلىگىنىڭ كۇشەيۋىنە، ونىڭ وركەندەۋى مەن حالىقارالىق ارەناداعى بەدەلىنىڭ ارتۋىنا سەپتىگىن تيگىزەتىنىنە سەنىمدىمىن»، - دەلىنگەن قۇتتىقتاۋدا.
م. ن. شاريف قازاقستان مەن پاكىستان قارىم-قاتىناستارى ءداستۇرلى دوستىق، تاريح جانە مادەنيەت پەن باۋىرلاستىقتىڭ كوپ عاسىرلىق بايلانىستارىنا نەگىزدەلگەنىن ايتتى.
«ەلدەرىمىزدىڭ اراسىندا ءوزارا ءتيىمدى ىنتىماقتاستىق ءۇشىن زور الەۋەت بار. ەكىجاقتى ىنتىماقتاستىقتىڭ ءوزارا مۇددەلىلىك تانىتاتىن ناقتى ماسەلەلەرىن سىزبەن تالقىلاۋدى تاعاتسىزدانا كۇتەمىن»، - دەلىنگەن جەدەلحاتتا.
