باس ءمۇفتي: بىرلىگى بەكەم ەلدىڭ بەرەكەسى ارتادى
اسا قامقور، ەرەكشە مەيىرىمدى اللانىڭ اتىمەن باستايمىن!
حالقىمىز كوكتەمنىڭ مامىراجاي مامىر ايىنىڭ ءبىرىنشى كۇنىندە بىرلىك مەرەكەسىن اتاپ وتەدى. مەرەيلى مەيرامداعى ىزگى ءىس-شارالار ەلىمىزدى يگىلىككە، حالقىمىزدى بىرلىككە باستاپ كەلەدى.
«بىرلىك» - قاسيەتتى ءسوز. قاسيەتتى كىتابىمىز قۇراندا بىرلىك تۋرالى باياندالعان. سوڭعى پايعامبارىمىز مۇحاممەد (اللانىڭ وعان يگىلىگى مەن سالەمى بولسىن) حاديستەرىندە دە ادامزاتتىڭ اۋىزبىرشىلىگىن ۋاعىزداعان. جاراتۋشى يەمىز «ءالي يمران» سۇرەسىندە: «...بولىنبەڭدەر»، - دەپ ءامىر ەتسە، ونىڭ ەلشىسى (اللانىڭ وعان يگىلىگى مەن سالەمى بولسىن): «...كوپشىلىكپەن بىرگە بولىڭدار! بولىنۋدەن ساقتانىڭدار»، - دەپ، جاماعاتتى، بارشا ادام بالاسىن مەيىرىمدىلىككە، ورتاق ماقساتقا ۇندەگەن.
حالقىمىزدىڭ ءبي-شەشەندەرى مەن اقىن-جىراۋلارى دا ءارقاشان وسيەتتى سوزدەرى مەن عيبراتتى تولعامدارىندا، ولەڭ- جىرلارىندا بىرلىكتى ناسيحاتتاعان. مايقى ءبي بابامىزدىڭ:
«التاۋ الا بولسا، اۋىزداعى كەتەدى،
تورتەۋ تۇگەل بولسا، توبەدەگى كەلەدى»، - دەگەن ناقىل ءسوزى قانشا عاسىر وتسە دە ۇرپاققا ونەگە بولا بەرمەك. تولە ءبيدىڭ: «بىرلىك بولماي، تىرلىك بولماس»، - دەۋى دە تەگىن ەمەس. وسىناۋ پاراساتتى پايىمداۋلار حالقىمىزدىڭ ساناسىندا ساقتالىپ، دوسقا قامقور، وزگەگە ونەگە كورسەتىپ، بىرلىكتى تۋ ەتىپ كەلەدى. كەشەگى كورەگەن بيلەرىمىزدىڭ اسىل اماناتى - بۇگىن ەلباسىمىزبەن بەرەكەلى باستامالارعا، بەيبىتشىلىككە، ورتاق كەلىسىمگە باعىتتالۋدا. وسىنىڭ ارقاسىندا بۇگىنگى كۇنى ەلىمىزدى مەكەندەگەن 100 دەن استام ۇلتتار مەن ۇلىستار، ءارتۇرلى ءدىن وكىلدەرى قازاقستاندا تاتۋ- ءتاتتى ءومىر سۇرۋدە.
اللانىڭ بەرگەن ولشەۋسىز نىعمەتى ءارى سىيى - تاۋەلسىزدىگىمىزدى باياندى ەتە ءتۇسۋ ءۇشىن ەڭ الدىمەن بىرلىگىمىزگە بەكەم بولۋىمىز كەرەك.
قادىرلى باۋىرلار! 1 -مامىر بىرلىك مەرەكەسى قۇتتى بولسىن! اللا تاعالا حالقىمىزدىڭ بىرلىگى مەن بەرەكەسىن ارتتىرىپ، بولاشاققا باسقان قادامىمىزدى بەرەكەلى ەتسىن! تىلەگىمىز قابىل، مۇراتىمىز اسىل بولعاي! ءامين!
