الماتىدا كولىك ورتەگىشتەر قايتادان پايدا بولدى
تۇگى قالماي ورتەنگەن كولىكتەر ەشكىمگە دە كەدەرگىسىن تيگىزبەي، كوشە بويىندا قاڭتارىلىپ تۇرعان. بۇزاقىلار بۇعان دەيىن دە جۇرگىزۋشىلەردى زار قاقساتقان بولاتىن. بىلتىر 5 بىردەي ماشينانى ورتەپ قاشقان. كوپتەن بەرى ۇستاتپاي جۇرگەن كۇدىكتى اقىرى قولعا ءتۇستى. جۇرتتىڭ كولىگىنە قىرعيداي ءتيىپ جۇرگەن جۇگەرمەك جاس قىز بوپ شىقتى.
جۇرگىزۋشىلەردىڭ ۇرەيىن تۋعىزعان، قارا كيىنگەن بەلگىسىز بىرەۋ كولىكتەردى بىرىنەن سوڭ ءبىرىن ورتەگەن. ال ەڭ سوڭعى ورتەنگەن كولىكتى، قاسكوي ەندىگى جاراماستاي ەتىپ جانارماي قۇيىپ جاندىرىپ جىبەرىپتى.
قاتتى جارىلىستان شوشىپ ويانعان جۇرت دالاعا قاراي تۇرا قاشقان. الاۋلاپ جانعان كولىكتى كورىپ، سۋ شاشىپ سوندىرمەك بولىپتى. ءبىراق وشىرمەك تۇگىلى، جانىنا دا جولاي المادى. جان- جاقتى شارپىعان الاپات ءورت قاسىنداعى كولىكتى دە كۇل- تالقان ەتكەن.
ەۆگەني ماحونيننىڭ وسىمەن ەكىنشى كولىگى ورتەنىپ كەتتى. وتكەن جىلى جازدا ول سۋ جاڭا «تويوتاسىنان» ايىرىلعان. ال تۇندە الاۋلاپ جانعان «ماتيزدى» ەۆگەني ءالى ايداپ تا ۇلگەرمەپتى.
«تارس ەتكەن دىبىستى ەستىپ جۇگىرىپ شىقتىم. ءبىراق، ءبارى كەش ەدى. كولىكتى قۇتقارا المادىم. جاقىندا عانا ساتىپ العان ەدىم. ەندى جاياۋ قالدىم»، - دەيدى جابىرلەنۋشى ەۆگەني ماحونين.
جايىمەن تۇرعان كولىكتى ورتەگىشتەر قالادا بىلتىر جازدا پايدا بولعان. ول كەزدە قارا كيىنگەن الدەبىرەۋ بەينەباقىلاۋ كامەراسىنا ءتۇسىپ تە قالعان. ونىڭ جانارماي تولى ىدىسىن اۆتوتۇراققا سۇيرەتىپ اكەلىپ، ارتىنشا قاڭتارىلىپ تۇرعان كولىككە شاشىپ جۇرگەنى انىق كورىنىپ تۇر.
وسىلايشا وتكەن جىلى بەس كولىك ورتەندى. پوليتسيا بيىلعى وقيعاعا بايلانىستى ۇستالعان 20 جاسار قىزدىڭ بىلتىرعىعا دا قاتىسى بولۋى مۇمكىن دەيدى.
«بوتەن ادامنىڭ مۇلكىن قاساقانا جويۋ ىسىنە قاتىسى بار ازاماتشانى قۇرىقتالدى. ول سول المالى اۋدانىنىڭ تۇرعىنى بولىپ شىقتى. بىلتىر ءتورت بوتەننىڭ اۆتوكولىكتەرىن قاسقانا جاندىرۋ فاكتىسى ورىن العان. بۇل كىسى الدىن الا بولجامىمىز بويىنشا وسى فاكتىلەرگە قاتىسى بار»، - دەيدى الماتى قالالىق ءى ءى د باسپا ءسوز حاتشىسى سالتانات ازىربەك.
كوشەدەگى كولىكتەرگە قىرعيداي تيگەن بويجەتكەن جانارمايدان بولەك گاز باللوندارىن دا وزىمەن الىپ ءجۇرىپتى. قاۋىپتى جارىلعىشتى ول جۇك سالعىشقا قىستىرىپ بارىپ، وت قويعان. قىرۋار شىعىننىڭ ورنى تولتىرىلا ما، جوق پا، ازىرگە بەلگىسىز. ويتكەنى الاۋعا جاقىن ارۋدىڭ ەسى اۋىسقان بولۋى مۇمكىن.
