ورالحان بوكەي اتىنداعى كوركەم ءسوز وقۋ شەبەرلەرىنىڭ بايقاۋى ءوتتى

وبلىستىق ءبىلىم، جاستار ساياساتى جانە تىلدەردى دامىتۋ باسقارماسىنىڭ ۇيىمداستىرۋىمەن وتكەن شاراعا اۋداندار مەن قالالاردان ىرىكتەلگەن 14 ۇمىتكەر قاتىستى.

بايقاۋعا ءۇش شارت نەگىزىندە (پروزالىق، درامالىق شىعارمادان ءۇزىندى وقۋ جانە مانەرلەپ ولەڭ وقۋ) باق سىناسقان قاتىسۋشىلار مەن جەڭىمپازدارعا ديپلومدارمەن، باعالى سىيلىقتار تابىستالدى. باس جۇلدەنى يەمدەنگەن تۇركىستاندىق فاريزا الييەۆا استانا قالاسىندا وتەتىن رەسپۋبليكالىق بايقاۋعا جولداما الدى.

مەملەكەتتىك ءتىلدىڭ قولدانۋ اياسىن كەڭەيتۋ، ءتىل مادەنيەتىن كوتەرۋ جانە كوركەم ادەبيەتتى ناسيحاتتاۋ، جانداندىرۋ، حالىق اراسىنان تالاپتى، تالانتتى جاستارعا مۇمكىندىك بەرەتىن بۇل ءداستۇرلى بايقاۋ ەلىمىزدە 1998 -جىلدان بەرى وتكىزىلىپ كەلەدى.

قازاقستان رەسپۋبليكاسى مەملەكەتتىك سىيلىعىنىڭ، جاستار سىيلىعىنىڭ، ن. وستروۆسكي اتىنداعى بۇكىل وداقتىق ادەبي سىيلىقتىڭ لاۋرەاتى، بەلگىلى جازۋشى، ورالحان بوكەيدىڭ وقىرمانداردى باۋراپ الاتىن «قامشىگەر»، «ۇركەر»، «قايداسىڭ، قاسقا قۇلىنىم؟»، «مۇزتاۋ»، «ءان سالادى شاعىلدار»، «ءوز وتىڭدى وشىرمە»، «ماشابينا»، «قاسقىر ۇلىعان ءتۇن»، «انا قۋانىشى»، تاعى باسقا شىعارمالارىن جاستار ءالى كۇنگە دەيىن ىزدەپ ءجۇرىپ وقيدى.

ونىڭ شىعارمالارى ورىس، اعىلشىن، فرانسۋز، نەمىس، جاپون، اراب، قىتاي، ت. ب. تىلدەرگە اۋدارىلعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى